Dipesaleme 137 - Sesotho 1909/1961 (SO)

Dillo tsa ba ileng kgolehong Babilona.

¹ Mabopong a dinoka tsa Babilona re ne re dutse, re lla, ha re hopola Sione;

² ra feha diharepa tsa rona meduwaneng ya teng;

³ hobane, teng, ba neng ba re isitse kgolehong, ba ne ba kopa dipina ho rona, mme batubi ba rona ba ne ba re qela difela tsa thabo, ba re: A le ke le re bineleng difela tsa Sione!

⁴ Re ka bina difela tsa Jehova jwang lefatsheng la baditjhaba?

⁵ Ha nka o lebala, Jerusalema, letsoho la ka le letona le ke le ntebale;

⁶ leleme la ka le ke le kgomarele mahalapa a ka, ha nka o lebala, ha ke sa bee Jerusalema hore e be thabo ya ka ya pele ho dithabo tse ding!

⁷ Jehova, o elellwe bana ba Edomo, kamoo ba itseng letsatsing la Jerusalema kateng: Qhaqhollang, qhaqhollang ho isa metheong ya hae!

⁸ Moradi wa Babilona, ya tlang ho etswa dithako, ho lehlohonolo ya tlang ho busetsa ho wena seo o re entseng sona!

⁹ Ho lehlohonolo motho ya tlang ho tshwara bana ba hao, a ba pshatlanye majweng!