Dipesaleme 116 - Sesotho 1909/1961 (SO)

Teboho ya ya phonyositsweng lefung.

¹ Ke rata Jehova, hobane o utlwile lentswe la ka, le merapelo ya ka;

² hobane o ntshekehetse tsebe; ke tla mo rapela ke hona ka matsatsi wohle a ho phela ha ka.

³ Ditlamo tsa lefu di na be di nthatetse, ke na be ke tshwerwe ke matswalo a nqalo ya bafu, ka fumana matswalo le hlokofalo.

⁴ Empa ka rapela lebitso la Jehova, ka re: Oho Jehova, o boloke moya wa ka!

⁵ Jehova o lereko, o lokile, Modimo wa rona o tletse mohau.

⁶ Jehova o boloka ba bonolo; ke ne ke hlomohile, mme a tlisa thuso ho nna.

⁷ Moya wa ka, o boele phomolong ya hao, hobane Jehova o o entse hantle.

⁸ Efela o ntshitse moya wa ka lefung, le mahlo a ka dillong, le maoto a ka kgothometsehong.

⁹ Ke tla nne ke tsamaye pela sefahleho sa Jehova, lefatsheng la ba phelang.

¹⁰ Ke dumetse, ke boletse ke hona. Ka na ka hlokofala ka mokgwa o fetisang!

¹¹ Ka ba ka re matswalong a ka: Batho bohle ke bathetsi.

¹² Ke tla busetsang ho Jehova? Melemo yohle ya hae e ho nna.

¹³ Ke tla emisa senwelo sa topollo, ke rapele lebitso la Jehova;

¹⁴ ke tla phetha dikano tsa ka ho Jehova, pontsheng ya setjhaba sa hae kaofela.

¹⁵ Ho leng thata mahlong a Jehova, ke lefu la bakgethehi ba hae.

¹⁶ Oho Jehova, ke mohlanka wa hao; ke mohlanka wa hao ka sebele, mora wa lekgabunyane la hao. O lokolotse ditlamo tsa ka.

¹⁷ Ke tla o hlahisetsa sehlabelo sa teboho, ke rapele lebitso la Jehova.

¹⁸ Ke tla phetha dikano tsa ka ho Jehova, pontsheng ya setjhaba sa hae kaofela,

¹⁹ mabaleng a ntlo ya Jehova, kahare ho wena, Jerusalema! Bokang Jehova!