Dipesaleme 115 - Sesotho 1909/1961 (SO)

Ho rapelwa Modimo wa Iseraele hore o tlotlise lebitso la wona.

¹ Kganya ya hao, Jehova, se e nee rona; se e nee rona, o mpe o e nee lebitso la hao, ka baka la mohau wa hao le la nnete ya hao!

² Ke kang ha ditjhaba di tla re: Na jwale Modimo wa bona o kae?

³ Athe Modimo wa rona o mahodimong; o etsa tsohle tseo o di ratang.

⁴ Ditshwantsho tsa bona ke silefera le kgauta, mosebetsi wa matsoho a batho.

⁵ Di na le melomo, mme ha di bue; di na le mahlo, mme ha di bone;

⁶ di na le ditsebe, mme ha di utlwe; di na le dinko, mme ha di fofonele;

⁷ di sitwa ho tshwara ka diatla tsa tsona; ka maoto a tsona ha di tsamaye, ha ho lentswe le tswang mmetsong wa tsona.

⁸ Kamoo di leng kateng, ba di etsang ba tla ba jwalo, le bohle ba beang tshepo ya bona ho tsona.

⁹ Iseraele, o itshepele Jehova: ke yena thuso ya bona le thebe ya bona.

¹⁰ Ntlo ya Aarone, o itshepele Jehova: Ke yena thuso ya bona le thebe ya bona.

¹¹ Lona ba tshabang Jehova, itshepeleng Jehova: ke yena thuso ya bona le thebe ya bona.

¹² Jehova o re hopotse; o tla re hlohonolofatsa; o tla hlohonolofatsa ntlo ya Iseraele; o tla hlohonolofatsa ntlo ya Aarone;

¹³ o tla hlohonolofatsa ba tshabang Jehova, ba banyenyane le ba baholo.

¹⁴ Jehova o tla le atisa, lona le bana ba lona.

¹⁵ Le bahlohonolofatswa ba Jehova, ya entseng mahodimo le lefatshe.

¹⁶ Haele mahodimo, ke mahodimo a Jehova, mme lefatshe o le neile bana ba batho.

¹⁷ Hase bafu ba ka rokang Jehova, leha e le ba theohelang nqalong e kgutsitseng;

¹⁸ empa rona, re tla boka Jehova, jwale le ho isa ho bo sa feleng! Bokang Jehova!