Dipesaleme 114 - Sesotho 1909/1961 (SO)

Dintho tse hlodilweng kamoo di tshabileng ya pholositseng Baiseraele Egepeta kateng.

¹ Enereha Iseraele a etswa Egepeta, le ntlo ya Jakobo ha e tloha setjhabeng sa puo esele,

² Juda a fetoha sehalalelo sa Jehova, Iseraele ya eba mmuso wa hae.

³ Lewatle eitse ha le mmona, la baleha, Jordane a kgutlela morao,

⁴ dithaba tsa tlola jwaloka dipheleu, le dithabana jwaloka dikonyana.

⁵ O ne o na le eng, wena lewatle, ha o tla baleha, le wena Jordane, ha o tla kgutlela morao?

⁶ le lona, dithaba, ha le tla tlola jwaloka dipheleu, le lona dithabana, jwaloka dikonyana?

⁷ Wena lefatshe, o ke o thothomele pela sefahleho sa Morena, pela sefahleho sa Modimo wa Jakobo,

⁸ o fetolang lefika matsha a metsi, le lehakwe le thata mohlwedi o tsaratsehang!