Dipesaleme 111 - Sesotho 1909/1961 (SO)

Thoko ya Modimo.

¹ Bokang Jehova! Ke rorisa Jehova ka pelo ya ka yohle, mokgatlong wa ba lokileng le phuthehong.

² Mesebetsi ya Jehova e meholo, e batlisiswa ke bohle ba kgahlwang ke yona.

³ Seo a se etsang ke bokgabane le kganya, ho loka ha hae ho hlola ka ho sa feleng.

⁴ O etseditse mehlolo ya hae kgopotso.

⁵ Jehova o mohau, o lereko. O nea ba mo tshabang dijo; o hopola selekane sa hae kamehla le mehla.

⁶ O bonahaditse matla a diketso tsa hae ho setjhaba sa hae ka ho se nea lefa la ditjhaba.

⁷ Mesebetsi ya diatla tsa hae ke nnete le ho loka;

⁸ ditaelo tsa hae kaofela ke tsa sebele, tse tiileng ka ho sa yeng kae le ka ho sa feleng; di theilwe nneteng le ho lokeng.

⁹ O rometse setjhaba sa hae poloko, o laetse selekane sa hae, e be se sa feleng. Lebitso la hae le a halalela, mme le a tshabeha.

¹⁰ Qalo ya bohlale ke ho tshaba Jehova; bohle ba ineelang hoo ba na le kutlwisiso e lokileng. Kganya ya hae e hlola ka ho sa feleng.