1 Timothea 4 - Sesotho 1909/1961 (SO)

Timothea o eletswa bakeng sa baruti ba thuto tse kgelohileng, le bakeng sa mosebetsi wa hae wa boruti, le sa kamoo a tshwanetseng ho kgalemela le ho laya kateng.

¹ Empa Moya o ometse hore, mehleng ya morao, ba bang ba tla kwenehela tumelo, ba kgomarele meya e thetsang le dithuto tsa batemona;

² ka ho ya ka boikaketsi ba baruti ba bohata, bao matswalo a bona a tjhesitsweng ka tshepe;

³ ba tlang ho hana ha batho ba nyala, ba tla re, ho tshajwe dijo tseo Modimo o di bopileng hore ba dumetseng, ba tsebang nnete, ba di amohele ka teboho.

⁴ Hobane tsohle tse bopilweng ke Modimo di ntle, mme ha ho letho le tshwanetseng ho kgeswa ha ho jewa ka teboho;

⁵ hobane tsohle di halaleditswe ke lentswe la Modimo le thapelo.

⁶ Ha o beela baena taba tseo, o tla ba mohlanka ya molemo wa Jesu Kreste, ya otlilweng ka dipolelo tsa tumelo le ka thuto e molemo, eo o e latetseng.

⁷ Empa o hane ditshomo tsa bosawana, tse kang tse bolelwang ke basadi ba tsofetseng, mme o itlhakisetse borapeding.

⁸ Hobane hlakiso ya mmele ha e thuse hakae, empa borapedi bo thusa kahohle, bo tswe bo ena le pallo ya bophelo ba jwale le ya bo tlang ho tla.

⁹ Taba eo ke ya nnete, mme e tshwanelwa ke kamohelo yohle.

¹⁰ Efela ke ka baka la yona re sebetsang, re lwanang; kahobane re itshepetse Modimo o phelang, oo e leng Mmoloki wa batho bohle, haholo wa ba dumetseng.

¹¹ Laela taba tseo, mme o di rute batho.

¹² Ho se ke ha eba ya nyatsang botjha ba hao; empa e be wena o etsetsang badumedi mehlala ya dipolelo, ya metsamao, ya lerato, ya tumelo, le ya hlweko.

¹³ O ineele ho bala, le ho kgothatsa, le ho ruta, ke be ke fihle.

¹⁴ Hape, o se ke wa lebala mpho e ho wena, eo o e filweng ka boporofeta hammoho le peo ya matsoho a baholo.

¹⁵ Hlokomela taba tseo, mme o be ho tsona; ho tswela pele ha hao ho nne ho lemohuwe ke bohle.

¹⁶ O ke o itebele, o lebele le yona thuto; mme o tiye teng; hobane, ha o etsa jwalo, o tla ipholosa, o pholose le ba o utlwang.