1 Timothea 2 - Sesotho 1909/1961 (SO)

Ho rapellwe bohle. — Ditshwanelo tsa basadi.

¹ Jwale, kgothatso ya ka ya sehlooho, ke re: Diqelo, le merapelo, le dithapello, le diteboho, di etsetswe batho bohle,

² le marena, le bohle ba boholong, hore re tle re iphelele kgotsong le boiketlong ka borapedi bohle le ka bokgabane.

³ Hobane hoo ke ho molemo, ho kgahlehang ho Modimo, Mmoloki wa rona,

⁴ o ratang hoba batho bohle ba bolokehe, mme ba fihle tsebong ya nnete.

⁵ Hobane Modimo o mong feela, le Mmuelli mahareng a Modimo le batho o mong, e leng Jesu Kreste motho,

⁶ ya ineetseng ho ba topollo ya bohle. Ke boo bopaki bo beilweng mehleng ya teng,

⁷ boo ke beilweng mmoledi le moapostola ka baka la jona — ke bolela nnete ka Kreste, ha ke etse leshano — le moruti wa baditjhaba ho ba isa tumelong le nneteng.

⁸ Ke fela ke rata hoba banna ba rapele kahohle, ba phahamise matsoho a masweu, ho se bohale le kgang.

⁹ Basadi le bona ba apare seaparo se lokelang, ba itlhophe ka boitlhompho le ka tshabo, e seng ka moriri o forilweng, le ka kgauta, leha e le diperela, leha e le meaparo e kgabisitsweng;

¹⁰ e mpe e be ka mesebetsi e molemo, jwalokaha ho tshwanela basadi ba ipolelang hoba ba sebeletsa Modimo.

¹¹ Mosadi a ithute a kgutsitse, ka kutlo yohle.

¹² Hobane ha ke dumelle mosadi ho ruta, leha e le ho laola monna; a mpe a itulele ka ho ikgutsetsa.

¹³ Hobane Adama o bopilwe pele, hamorao ha bopjwa Eva;

¹⁴ mme hase Adama ya thetsitsweng, empa mosadi, hobane a thetswe, o hlahisitse tlolo.

¹⁵ Leha ho le jwalo, o tla bolokeha ha a tswala bana, ha a hlola tumelong, le leratong, le kgalalelong, a ena le tshabo.