Hahatakei Haeu 15 - Seimat

Paki *Moses ma tok *sipsip uluha

¹ Imuh tenen waliko pate lalap ma tuah wanen sohotuma tesol *tone Haeu. Nga ningahi tepanim hua *engel ti axiai tepanim huohu kawatan tiliai lengei Haeu.

² Muhin nga ningahi tenen waliko paxaian hanowi kanitax tenen masin kalas i talepalep hanowi xekei ah. Hina seilon tutu ngixi kanitax ien. Lato tetesol lato waxainiwen tok manihuh tumun kalimen i ahutama itax ma tok hosaun ma lato tai uke kikilam tetan. Lato akekeni tesol harp ti Haeu haniwen lato wexoiai tangiai pak.

³ Ape lato papakui tenen paki Moses tel unaui Haeu ma tok sipsip uluha i ukek, “Tel Masiwi Haeu tel pohen tapein, soliai lalape pupuasam. Tel Masiwi ti hatesol seilon, woum, kakaiam ma pupuasam lawe sawisawin ma salan.

⁴ Lehe aita tel na tap lon tetam? Lehe aita tel na kum haxawa axam? Mewenae o tetel sawisawin tapein. Hatesol seilon lotu sameni o nake laha ningahiwen sawisawiai pupuasam.”

Tepanim huohu kapi hetekie tepanim huohu kawatan

⁵ Muhin *Ingi Haeu ti tesol tonan i hea ape nga ningahi tesol Pate Tuah ti Haeu.

⁶ Tesol tepanim hua engel ti axiai tepanim huohu kawatan lato sohotuma leili Ingi Haeu. Puxuaulato papaxaxun ma i talehaleh. Patanawalato tahaian teik tah ani gol.

⁷ Kakanua, tel ti tetesol hinalo seilon ien hani tesol tepanim huhua engel tepanim huohu kapi ani gol. Waliko ti leilon i kikilami lengei Haeu, tel tap tahi matean.

⁸ Ape axuan i xuh tesol Pate Tuah ti leili Ingi Haeu. I kola ka Haeu tel pate pohen ma axan lalap. Tap tel i soh uke hani ien atengi tataen tepanim huhua engel axi hatapoa tesol tepanim huohu kawatan.