Zozuwe 9 - SEBR SÕNGO

Gabaõ rãmb kibare

¹ Ayi kibara zẽkame n ta dĩm dãmba sẽn da be Zʋrdẽ Dʋʋre, tãng zug rãmba, sẽn da ti-b tẽn-nabrẽ, Mog Kãsenga noorẽ dãmba, n ta Libã. Da yaa Ititse, Amoritse, Kanaã rãmba, Perizitse, Ivitse, Zebuzitse.

² B sũu taaba n na n tak zabre ne a Zozuwe la a Israyɛl.

³ Gabaõ rãmb me sẽn wʋm a Zozuwe kibare, b sẽn wʋm sẽn yɩ bũmb ning ne Zeriko la Ayi rãmba,

⁴ b bao yam sɩlenga n kõ b menga. B maana b mens wa so-toagdba, n zɩlg b bõeens ne yond la rãam waoos sẽn po tɩ b zap-zape.

⁵ B wida neooda sẽn po tɩ b maneg n sẽ, b yeelga fu kʋdse. B sor zug rɩɩb da yaa bur sẽn kʋɩ n kaood zeremse.

⁶ B kolga a Zozuwe ne Israyɛl kamba Gilgal sika, n yeele: «Tõnd yii tẽn-zãoorgẽ tɩrga n wa ka. Ges-y n yõg zood ne tõndo.»

⁷ Israyɛl leoka Ivitsã: «Tõe tɩ y wẽneg n be-la d sʋka. D na n yɩɩ wãn n yõg zood ne yãmba.»

⁸ B yeela a Zozuwe: «Tõnd yaa yãmb yemse.» T'a sok-ba: «Yãmb la m ba bõe rãmba, yãmb yita yɛ?»

⁹ B leokame: «Tõnd yii tẽn-zãoorgẽ la yaa yãmb Wẽnda waoogr yĩnga, tɩ d wʋma b sẽn maan Ezipt tẽnga.

¹⁰ D wʋma b sẽn maan ne Amoritsa dĩm dãmb a yiib sẽn da be Zʋrdẽ rʋʋre, Esbõ dĩm a Siyõ la Bazã dĩm a Og sẽn da be Astarot.

¹¹ Tõnd nin-kẽemse la d tẽnga rãmb yeel-d lame: ‹Bao-y sor dɩɩbo la y yi n tɩ seg-ba la y gom ne b woto: tõnd yaa yãmb yemse.› Wa-y tɩ d yõg zoodo.

¹² Ges-y tõnd buri, a ra ket n yaa tʋʋlga d sẽn wa n yitã la marsã a kʋɩɩme n kaood zeremse.

¹³ Tõnd waoosa ra ket n yaa paala tɩ d sui d rãam la marsã b wurame. D neooda la d fut lebga kʋdse, d sora yɩɩ wok tɩ looge.»

¹⁴ Israyɛl taoor dãmba reega rɩɩb bilfu b nengẽ n pa reng n sok Soaala-Wẽnd ye.

¹⁵ A Zozuwe saka b zoodã tɩ b paam n põse. Taoor dãmba tol n wẽename tɩ bũmb kõn maan-b ye.

¹⁶ La rasem ka yãe n maan a tã zooda yõgb poore, la b sẽn bãnge tɩ b pa yi tẽn-zãoorgẽ ye, b ra yaa a Israyɛl yagse, b ra kẽeda a Israyɛl sʋka.

¹⁷ A Israyɛl sẽn yiki, a wẽneg n kẽe b tẽngẽ. B soolem da yaa Gabaõ, Kefira, Beerot la Kiriyat-Yearim.

¹⁸ A Israyɛl ka tak zabr ne b ye, a sẽn da wẽen ne Soaala-Wẽnda yĩnga. La zãma wã sɩnga guglengu ne taoor dãmbã.

¹⁹ Taoor dãmba tigma taaba la ad-b sẽn yẽse: «Tõnd ka tõe n le sɩɩs-b ye tɩ d wẽena ne Israyɛl Wẽnde.

²⁰ La ad-d sẽn na n maan ne-ba. D na n bas-b lame tɩ b vɩɩnde, ka rẽ d wat n taka Soaala-Wẽnd beem d zugu, tɩ tõnd n wẽene.

²¹ B pa ne tõndo la b lebg da-wesdba la ko-toadba, zãma wã fãa yĩnga.» La b maana wa nin-kẽembã sẽn togsã.

²² A Zozuwe boola Gabaõ rãmbã la a yeel-b lame: «Bõe tɩ yãmb tudg tõndo? Bõe tɩ y togs-d woto: ‹Tõnd yii tẽn-zãoorgẽ!› Tɩ y tẽng yaool n be tõnd sɛɛgẽ?

²³ Dũnna Soaala-Wẽnd yãka y barka la y kõn yi yembdẽ abada ye. Y kõn vʋʋs ne raad wesbo la koom yõngr, Soaala-Wẽnd buuda sʋk ye.»

²⁴ Gabaõ rãmba leokame: «Ade, y yemsa paam n wʋma neere Soaala-Wẽnd sẽn da kõ noor ning b tʋʋm-tʋmd a Moyiiz. B ra kãab-a lame tɩ b na n dɩka tẽnsã n ning a nugẽ. Bãmb n kõ y noore tɩ y kʋ n da kees ned ye. Yaa rẽ yĩnga la y waoonga kẽes-d dabeem kãsenga tɩ d kong n maan wa y sẽn mi wã.

²⁵ Ade, d bee y nusẽ, y sẽn dat n maan d bũmb ninga sã n togame la zemsame bɩ y maan.»

²⁶ Ad-a Zozuwe me sẽn maan bũmb ninga n fãag-ba a Israyɛl nugẽ tɩ b pa ki ye.

²⁷ Ba raar tɛka a rɩk-b lame n kõ zãma wã tɩ b wesd daado la b yõngd koom, Soaala-Wẽnd sẽn yãk b waoogr tẽngẽ, la rẽ n ket n be rũnna.