Zozuwe 7 - SEBR SÕNGO

Kisgu tõdgre

¹ Israyɛl kamba tõdgame n dɩk bũmb dɩkr sẽn lebg kisgu. A Akã n dɩk sẽn kisã tɩ Soaala-Wẽnd sũur puugi ne Israyɛl kamba. A Akã yaa a Karmi biiga, t'a Karmi ba yaa a Zabdi, t'a Zabdi yaa a Zera biiga, a Zɩɩda roogẽ.

² A Zozuwe zĩnda Zeriko n tʋm neb Ayi tẽnga sẽn be Betɛl yaanga. A yeel-b lame: «Kẽng-y n tɩ bãng tẽngã.» B kẽngame n tɩ bãng Ayi.

³ B sẽn lɛɛg n wa b yeela a Zozuwe: «Ka modgre tɩ neba fãa kẽng n tɩ tak zabr ye. Neb tus a tã bɩ a naas bal tõe n sekame. Ka modgre tɩ neba fãa nams n kẽng ye, Ayi rãmb sõora paooda wʋsgo.»

⁴ Dɩlla yɩɩ sẽn zems neb tus a tã n kẽng Ayi la b zoe Ayi neba taoore n lɛɛg n wa.

⁵ Ayi rãmba tol n paama neb pis-tã la a yoobe n kʋ, n dig sẽn kell-bã, al tẽnga noorẽ kʋɩlense, n ta Sebarim. Yaa b sẽn wa n lɛɛg n sigdã la Ayi rãmb kʋ-ba. Israyɛl kamba wʋmame tɩ b sũur bondg zãnga.

A Zozuwe pʋʋsgo

⁶ Sũ-sãang kɩtame t'a Zozuwe kẽes a futu la a lʋɩ-la a yãvabg, kuga walsa koglga taoore, n pa be tɩ wĩndig wa kẽ. Nin-kẽemba me maana wa yẽnda; b fãa wʋka tom n yug b zutu.

⁷ A Zozuwe ra yetame: «Kato, Soaala-Wẽnde, bõe yĩng la yãmb bas y nebã tɩ b rʋʋg Zʋrdẽ n na n lʋɩ Amoritsa nugẽ, n ki? Tõnd n kos n na n kẽe Zʋrdẽ rʋʋnd bɩ?

⁸ Maan-y sugri, Soaala-Wẽnde, m yetame tɩ bõe marsã, t'a Israyɛl ning tĩig a bɛɛba taoore?

⁹ Kanaã rãmba la b yagse na wʋmame, b na n sũu taaba n tak zabr ne do la b na n menesa d yʋʋr tẽng zugu. Bõe la y na n maan n le maneg y yʋʋra sẽn tog ne pẽgr kãsengã, Soaala?»

¹⁰ Dẽ la Soaala-Wẽnd yeel a Zozuwe: «Yiki, bõe tɩ f kɩ f neng tẽng woto?

¹¹ Ad-a Israyɛl n maan wẽnga n sãam m zoodã. N-ye! Bũmb rɩkr sẽn kis la b rɩk yã, bũmb la b zuk yã n solg b teedẽ wã.

¹² A Israyɛl kõn tõog a bɛɛba ye, a na n lɛɛg n zoeeme tɩ yẽ meng rɩka sẽn kis rɩkre, la m kõn le zĩnd ne yã, y meng sã n ka yiis kisga sẽn be y sʋka ye.

¹³ Yiki, Zozuwe, yɩlg f neba. F na n yeelame: ‹Yɩlg-y mens beoog yĩnga tɩ Soaala, Israyɛl Wẽndã, gomda woto: Tʋʋmd wẽng n tʋm y sʋka, Israyɛl kamba, la y kõn tõog n yals y bɛɛba taoore y sã n ka reng n yiis kisgã y sʋk ye.›

¹⁴ Dɩlla beoog yibeoogo bɩ y wa roog-roogo. Roog ninga Soaala-Wẽnd sẽn na n paalg a soaba na n waa sak-saka. Sak ninga Soaala-Wẽnd sẽn na n paalg a soaba na n waa zak-zaka. Zak ning Soaala-Wẽnd sẽn na paalg a soaba na n waa nin-yend, nin-yende.

¹⁵ B sẽn na n mik bũmb ning rɩkr sẽn kisa ned ning teedẽ, b yõogda a soab bugmẽ, yẽnda ne a sẽn so fãa, t'a sãama Soaala-Wẽnd zoodo, n maan wɩɩbdo, Israyɛl tẽmpeelmẽ.»

B yãee yella soaba

¹⁶ A Zozuwe sãda beoogo n kɩt tɩ neba kolg roog-roogo la yɩ-la a Zɩɩda rooga zugu la yella lʋɩ yã.

¹⁷ A Kɩtame t'a Zɩɩda rooga kolg la yaa a Zera saka n pa yellẽ wã. A Zera sak kolgame la yella paa a Zabdi zaka,

¹⁸ A Zabdi zaka kolgame, nin-yend, nin-yende, la lʋɩ-la a Akã zugu; a Akã yaa a Zera biiga, a Zɩɩda yagenga.

¹⁹ Dẽ la a Zozuwe yeel a Akã: «M ned sõngo, pẽg a Israyɛl Wẽnnaam, waoog-ba la togs maam f sẽn maane, da solg bũmb ye.»

²⁰ A Akã leokame: «Yaa sɩda, maam n beeg Soaala, a Israyɛl Wẽnnaam, la ad-m sẽn maane:

²¹ M yãenda bɛɛba laog sʋka, Sinear fu yorg neer gɩfẽ, wanzurf zɩslem sẽn ta wakɩ koeems kobs-yi rẽnna la sãnem gilgu zɩslem sẽn ta wakɩ keems pis-nu rẽnna. Raab wẽng wala m yamẽ tɩ m dɩk-ba. M solga fãa bokẽ, m doog tẽnsʋka.»

²² A Zozuwe tʋma neb a yirã la b tɩ yãenda me tɩ fãa busa bokẽ, a roogẽ.

²³ B yãee fãa a rooga tẽnsʋka n dɩk n wa. A Zozuwe ne nin-kẽembã yãeeme la b reeg-b lame n dɩgl Naaba-Wẽnd taoore.

²⁴ B talla a Zera biig a Akã n looge, yẽ ne wanzurfã, ne fu-yorgã la sãnem gilgã, n paas a kom-dibli la a kom-pugli, a loalga, a bõanga, a rũm bõonese, a rooga raad la pɛɛla la a sẽn da so fãa. Israyɛl zãma wã fãa yãag-a lame n tees Akor weoogo.

²⁵ A Zozuwe yeelame: «Yaa bõe la f tak yel-beed d zugu? Bɩ yel-beeda lɛɛg n dɩ-f rũnna!» Neba fãa wẽneg n lab-a-la ne kuga.

²⁶ B wʋka kug zembala n sam a zugu la kuga saongã keta ne rũnna. Yaa rẽ yĩng me la b pʋd zĩigã tɩ Akor, zu-beed tẽnga, la b ket n boond-a-la boto al ne rũnna. Dẽ marsã la Soaala-Wẽnd sũura maag yã.