Zozuwe 6 - SEBR SÕNGO

Zeriko wãabo

¹ Israyɛl kamba yĩnga, Zeriko kʋɩlensa sẽn da pag la b sẽn page. Ned da ka le kẽede, ned da ka le yita.

² Naaba-Wẽnd yeela a Zozuwe: «Gese, m basda f nugẽ, Zeriko ne a dĩma la a gãndaadã.

³ Yãmb zab-zabdba fãa, sẽn tar b zabr sũur fãa, y na n gilga tẽngã n sege la beoog sẽn vẽeg fãa, y na n maana boto n ta rasem a yoobe.

⁴ Maan-kʋʋdba a yopoe n na n lʋɩ zood kasetã, kuga walsa koglga, taoore ne bard a yopoe. Daar a yopoe soaba, y na n gilga tẽnga naoor a yopoe la wakat kãnga, maan-kʋʋdba na n peeba b bardã sẽn maan ne pe-raad yɩɩla.

⁵ Baorga sã n peeb raaga n kaoose, tɩ y wʋme, bɩ neba fãa naag taaba n wẽ b zabr nobɩnga. Tẽnga lal-gũbrã na n wẽneg n lʋɩɩme. Ned kam fãa teesda a taoore n tak zabre.»

⁶ A Nun biig a Zozuwe, boola maan-kʋʋdbã n yeel-ba: «Tʋk-y kuga walsa koglgo la neb a yopoe lʋɩ taoor ne bard sẽn maan ne pe-raad yɩɩla.»

⁷ A Zozuwe yeela zãma wã: «Sɩng-y tẽnga gilgri. Tãb-biis niyns sẽn tog n lʋɩ taoora n na n lʋɩ kuga walsa koglga taoore.»

⁸ Neba tũ-la a Zozuwe noore. Maan-kʋʋdba a yopoe wã n lʋɩ kuga walsa koglgo, zood kaseta, taoore, ne b bardo sẽn maan ne pe-raad yɩɩla; b kẽndame la b peebdẽ. Bãmb la zood kasetã, kuga walsa koglga, zɩtba ra pʋgda.

⁹ Tãb-biis la b ra ning bard pɛɛdba taoore. La tãb-biis me n da pʋgd kuga walsa koglga zɩtba, la fãa ra tara kẽna, tɩ barda tar peebgo.

¹⁰ Yaa woto la a Zozuwe ra togs zãma wã: «Sã n ya nebã, bas-y bʋʋre, ra sak-y tɩ b wʋm y rãamd ye: gom beel meng da yi y noorẽ n ta daar ninga m sẽn na n yeel yã: ‹Tãs-y y zabr tãsga.› Wakat kãnga y na maan bʋʋre.»

¹¹ A Zozuwe kɩtame tɩ b yi ne zood kasetã, kuga walsa koglgã, n gilg tẽnga vugri n le lɛɛg n kẽ sikã n gũud beoogo.

¹² Tõd-beoog pĩnda, a Zozuwe kɩtame tɩ maan-kʋʋdba tʋk kuga walsa koglgã.

¹³ Maan-kʋʋdb a yopoe wã sẽn da kẽnd ne bard a yopoe kuga walsa koglga taoorã, le sɩnga kẽn la b peebd b bardo sẽn maan ne pe-raad yɩɩla. B ra ninga tãb-biis kãens taoore, n ning tãb-biis me kaseta zɩtba poore, la fãa ra tongame n kẽnd tɩ barda peebdẽ.

¹⁴ Daar a yiib soaba b le gilga tẽnga vugri n le lɛɛg n kẽ sikã, la b maana woto dasem a yoob tõre.

¹⁵ Dasem a yopoe soaba, b yika pĩnda n sɩng gilgri wa rasem-kam la b gilga naoor a yopoe. Yaool n yɩɩ ba raar bal la b gilg naoor a yopoe.

¹⁶ Gilgr a yopoe soaba sẽn gilg n sɛ, la barda rãmb sẽn peebe t'a Zozuwe yeel b fãa: «Tãs-y y zabr tãsga tɩ Soaala-Wẽnd basa tẽngã y nugẽ.

Zeriko ne a pʋgẽ teed fãa rɩkame n kõ Wẽnde

¹⁷ Y na n dɩka tẽnga ne a pʋgẽ teed fãa n kõ Soaala-Wẽnde. Pʋg-yoodr a Raab ne a zaka rãmb bala n na n põse, t'a Raab solga d sẽn da tʋm b rãmbã.

¹⁸ Maan-y gũusg ne kisgã; da belg-y y menga n sɩɩs sẽn dɩk n kõ Soaala-Wẽnd ye, ka rẽ kãab wẽnga na n leb-y lame, yãmb ne y sikã, n tak wẽng n kõ a Israyɛl gilli.

¹⁹ Wanzurf, sãnem, zũudu la kutu, fãa lebga Soaala-Wẽnd soolem, fãa rɩkdame n paas Soaala-Wẽnd arzɛka.»

²⁰ Zãma wã kelmame, bardã peebame. Zãma wã wʋma bardã n kelem b zabr kɛlenga sẽn yɩ kɛleng menga al tɩ tẽnga lal-gũbri lʋɩ a menga toore. Ned kam fãa teesa a taoore n kẽ tẽnga la bũmb ka põs ye.

²¹ B reega Wẽnd n so-zãnga noore, la woto, sẽn da be-b tẽnga pʋgẽ fãa, b kood-b la gilli: rapa, pagba, nin-kẽemse, kom-bõonego, niisi, piisi, bõeense.

A Raab põasga

²² A Zozuwe reng n yeela lɩɩsdb a yiibã: «Kẽng-y yã a Raab yira, n tɩ yiis-a ne a nebã wala y sẽn da kãabe.»

²³ Bi-bɩɩs a yiiba kẽngame n yiis a Raab ne a a ba la a ma, a tãopa la sẽn da be zaka pʋg fãa. B yiisa a Raab buuda neba n bao zĩ-sõng sika noorẽ n bĩng-b be.

²⁴ Tẽnga ne a teed fãa dɩɩ bugum, sã n ka wanzurf, sãnem, zũudu la kutu b sẽn tall n tɩ ning Soaala-Wẽnd doogẽ.

²⁵ A Zozuwe basa a Raab, pʋ-yoodrã, ne a ba wã zaka la a sẽn so fãa. A buud kell n paa Israyɛl sʋka n ta rũnna. La rẽ yɩ-la a sẽn solg a Zozuwe sẽn tʋm b rãmb tɩ b wa kaag Zeriko wã.

²⁶ A Zozuwe wa n kɩtame tɩ neba wẽen woto Soaala-Wẽnd taoore: «Wẽnd na sãam ned ning fãa sẽn na n tʋlga n le yik tẽn-kãnga lalse. Meeba sɩngr daare a bi-kẽeng yaoog la b na n tuki, a kʋɩlensa pagb daare nugẽ biiga yaoog la b na n page.»

²⁷ Soaala-Wẽnd paa ne a Zozuwe la a yʋʋra sãda beelẽ baobga fãa.