Zozuwe 4 - SEBR SÕNGO

Tẽegr kuga

¹ Neba fãa sẽn dʋʋg Zʋrdẽ kʋɩlgã, n sɛ, Naaba-Wẽnd yeela a Zozuwe:

² «Yãk neb piig la a yiibu, sak fãa yaa nin-yemde,

³ n yeel-ba: ‹Yiis-y Zʋrdẽ kʋɩlga pʋga, maan-kʋʋdba nao sẽn yals zĩig ningã, yiis-y kug piig la a yiibu n tall-ba n ta y sẽn na n sig zĩig ning yʋngã.› »

⁴ A Zozuwe yeela neb piig la a yiibã b sẽn da yãke, sak fãa nin-yendã:

⁵ «Loog-y kuga walsa koglga taoore n ta kʋɩlga sʋka la ned kam fãa tʋk kugr a bãokẽ, kug piig la a yi n zems a Israyɛl sagsa sõore.

⁶ Kuga na n yɩɩ tẽegre y yĩnga. Daar a ye y kamba wat n sok-y lame: ‹Kug bãmba makda bõe yãmb yĩnga?›

⁷ Y na yeel-ba: ‹Zʋrdẽ kʋɩlga koom pasga a yi, kuga walsa koglg sẽn ta Zʋrdẽ. Kug bãmba n kõt a Israyɛl kaseto sẽn ka tõe n menem abada.› »

⁸ Neba tũu a Zozuwe noore. B sẽn teeb kug piig la a yiibã, Zʋrdẽ kʋɩlga pʋga, sak fãa ne a kugri, wala Soaala-Wẽnd sẽn da wilg a Zozuwe, b tall-b lame n ta b gãaga zĩigẽ n dɩgl-b be.

⁹ A Zozuwe meng kɩtame tɩ b bao kug piig la a yiibu n ges kʋɩlga tẽnsʋka, koglga zɩtba sẽn yals zĩig ningã, n sel-ba la b keta ne rũnna.

Kʋɩlga rʋʋgr poore

¹⁰ Maan-kʋʋdba yalsa kʋɩlga tẽnsʋka ne kuga walsa koglgo. B yalsa boto tɩ bũmba fãa wa pids, wala Soaala-Wẽnd sẽn da yeel a Zozuwe t'a togs neba, wala a Moyiiz meng sẽn da zoe n wilg a Zozuwe. Yɩɩ ne yãgbo marsã la neba rʋʋg kʋɩlgã.

¹¹ Nebã n dʋʋg zãnga tɩ koglga zɩtba yaool n dʋʋge. Maan-kʋʋdba n da le kẽnd neba taoore.

¹² Yɩ-la a Rubẽ kamba, a Gad la a Manase bogre sẽn da bob zabre wala a Moyiiz sẽn da kõ-b noorã, n deng kʋɩlga rʋʋgre tɩ sẽn ket-ba yaool n pʋge.

¹³ Tãb-biisa sõor da taa tus pis-naase. B boba zabr Soaala-Wẽnd yĩnga n dʋʋg Zʋrdẽ n tees Zeriko pʋ-weese.

¹⁴ Baraare Soaala-Wẽnd kɩtame t'a Zozuwe yʋʋr yi Israyɛl kamb sʋka la b zoe-la a rabeem wala sẽn yɩ ne a Moyiiz a vɩɩma pʋgẽ.

¹⁵ Dẽ marsã la Naaba-Wẽnd yeel a Zozuwe:

¹⁶ «Kõ maan-kʋʋdba sẽn zɩt-b kuga walsa koglgã tɩ b me rʋʋg Zʋrdẽ kʋɩlgã.»

¹⁷ T'a Zozuwe sɩd yeel maan-kʋʋdbã: «Rʋʋg-y kʋɩlgã.»

¹⁸ Sẽn zɩt-b kuga walsa koglg sẽn sɩng rʋʋgre, b naoor sẽn gãndg kʋɩlga kogrã la kooma sẽn wẽneg n pid kʋɩl-waokã n daannẽ wala pĩnda.

Gilgal sika

¹⁹ Yɩɩ pipi kiuugã piig raare la Israyɛl dʋʋg kʋɩlgã. A ti-la a sik Gilgal, Zeriko yaanga.

²⁰ Yaa Gilgal la a Zozuwe kɩt tɩ b sel kug piig la a yiibã b sẽn da yiis kʋɩlga pʋga.

²¹ A yaool n yeela Israyɛl kamba: «Y kamba sã n wa yik beoog raar n sok b ba rãmba: ‹Kug bãmba yaa bõe kuga?›

²² Y na wilg-b woto: ‹A Israyɛl dʋʋga kʋɩlgã t'a nao ka mad ye,

²³ tɩ Soaala-Wẽnnaam, kʋɩɩsa kʋɩlga koom yãmb taoore, tɩ y fãa tõog n looge wala b sẽn da maan ne Rudum Mogre, b ra Kʋɩɩsa yẽnda me tɩ tõnd paam n loog zãnga.

²⁴ Yaa sẽn na yɩlẽ tɩ dũni ninsaalba reege tɩ Soaala-Wẽnd nug zɩsa la yãmb me zoe-y Soaala, yãmb Wẽnnaama, nifu, beoog sẽn vẽege.› »