Zozuwe 22 - SEBR SÕNGO

A Rubẽ, a Gad la a Manase bogre

¹ A Zozuwe boola a Rubẽ nebã n paas a Gad la a Manase bogrã

² n yeel-ba: «Wẽnd sõgne, a Moyiiz, sẽn kõ yãmb noor ningã y reeg-a lame; y le kelga mam meng sẽn yet tɩ y maan bũmb ning fãa.

³ Al n ta rũnna, yãmb pa leb poorẽ n bas y saam-biisã, zabra ne a kaoosda, tɩ y tʋlgame n deeg zãnga, Wẽnnaam, y Soaala, sẽn wilg-y bũmb ninga fãa.

⁴ Marsã, Soaala, yãmb Wẽnnaam, kõ-la y saam-biisã laafi ninga b sẽn da kãab-bã. Dẽ yĩngã yãmb me leb y rotẽ, Wẽnd sõgen a Moyiiz sẽn kõ yãmb tẽng ninga pʋgẽ, Zʋrdẽ yaanga.

⁵ Gũus-y neere n tũ saglsã la noya Wẽnd sõgen, a Moyiiz, sẽn wilg-y, n nong Soaala, yãmb Wẽnnaam, ne y sũur fãa, n tũud b soy, n deeg b noya, n bas tɩ y yam kẽ-b zãnga, n waoog-b ne y sũur fãa la y yalẽ fãa.»

⁶ A Zozuwe ning-b-la barka, n pʋʋs b Wẽnd na taase. Ned kam fãa leba a tẽngẽ.

⁷ Yaa Bazã tẽn-peelmẽ la a Moyiiz ra kẽes a Manase bogr a ye. Bogra a to wã deega a pʋɩɩr b saam-biisa sʋk Zʋrdẽ nin-taoore. A sẽn waa n kulsd-b, a Zozuwe ning-b-la barka. A yeela woto:

⁸ «Leb-y y tẽnsẽ ne arzɛk sẽn ka paoode, ne rũms wʋsgo, ne wanzurfu, sãnem, zũudu, kutu la fut sẽn ka tar sõor ye. Bɩ y pʋɩ ne y saam-biisã y bɛɛba laogo.»

Maan-kugr meebo

⁹ A Rubẽ kamba, a Gad kamba, la a Manase bogrã leba b tẽnsẽ. Yaa Silo, Kanaã tẽng la b bas Israyɛl kamba a taabã n leb Galaad, b pʋɩɩr tẽnga, wala Wẽnd sẽn da wilg a Moyiiz t'a kõ-ba.

¹⁰ B sẽn ta Gelilot, Zʋrdẽ noor, Kanaã tẽn-peelmẽ, a Rubẽ ne a Gad la a Manase bogrã mee maan-kugr kãsenga.

¹¹ Israyɛl kamb a taaba wʋma yellã. B wʋmame t'a Rubẽ, a Gad la a Manase kamba mee maan-kugr kãsenga, Kanaã tẽn-peelem, Gelilot, Zʋrdẽ noorẽ, b sẽn gãndg Israyɛl kamba toaaga.

¹² La bãmb sẽn wʋme, b sũu taab n na n wa tak zabr ne-ba.

¹³ Yaa maan-kʋʋd a Elazar biig, a Pinas, la b reng n tʋm a Rubẽ, a Gad la a Manase bogrã nengẽ.

¹⁴ N paas buud kãsem-dãmb piiga, nin-yend sẽn tũus tus-wɛɛl sʋka;

¹⁵ B ta-la b nengẽ, Galaad tẽn-peelmẽ n yeel-b woto:

¹⁶ «Ad Israyɛl Soaala kamb sẽn yet-y: Yaa bõe tɩ y maan sẽn ya wẽng a Israyɛl Wẽnnaam nifẽ? Bõe tɩ yãmb bas Soaala, y Wẽnnaam, dũnna, n me maan-kugri? Tɩ d mi tɩ maan-kugra meeb yaa y sẽn dat n yi Wẽnd soolmẽ wã tʋʋmde.

¹⁷ Peor wɩɩbdã n ka sek bɩ? Al n ta rũnna menga, al ne sɩbgr ning Wẽnd sẽn sɩbg b buudã, d ket n nan ka pek ne Peor rẽgda ye!

¹⁸ Yãmb sẽn yik rũnna n bas b pʋgbã, yãmb sẽn zẽkd y zug ne bãmbã, ad-y beoogo, b me na n yika b sũura ne b buud a Israyɛl.

¹⁹ Y sã n mikame tɩ tẽng ning b sẽn kõ yãmba ka tẽn-sõngo, bɩ y wa Wẽnd soolmẽ, b rooga sẽn ti zĩig ningã, wa n kẽ-y tõnd sʋka la y ra zẽk y zug ne Naaba-Wẽnd ye, ra zẽk-y y zug ne tõnd me n yik n met maan-kugr a to, Wẽnnaam, tõnd Soaala, maan-kugr sɛɛgẽ ye.

²⁰ M sok n gese, a Zera biig, a Akã, sẽn waa n wɩɩbã, a sẽn waa n dɩk sẽn kisã, ka buuda zãng la Wẽnd sũ-puura rɩr wɛɛ? A ka yɩ a ye n maan kaalem a yel-wẽnda yĩng ye.»

Yaang rãmba leokre

²¹ A Rubẽ, a Gad la a Manase bogra kamb leoka kãsem-dãmbã.

²² «Bɩ Soaala sẽn ya Wẽndã yɩ d kaseto, a Israyɛl Soaala sẽn ya Wẽnnaama yɩ d kaseto, la a Israyɛl meng yɩ kaseto! Sã n yaa zẽk-m-menga, sã n yaa Wẽnd la d zãgsda bɩ d fãa ki rũnna!

²³ D sã n mee maan-kugr n na n yi d Soaala maasmẽ, n na kʋʋd d yũ-nood maand, la d kõt d kũuni, n na n kʋʋd laafi kosg maand, bɩ Wẽnd sok-do!

²⁴ Ayo! Ad-y d sẽn me maan-kugrã yaa wala d sẽn sãmbd d yamẽ tɩ yãmb kamba na n wa yik beoog n sok tõnd kambã: ‹Bõe n be yãmb ne Israyɛl Wẽnnaama sʋka?

²⁵ Tõnd ne yãmb sʋka, Rubẽ la a Gad kamba, Wẽnd yãka toaaga, yaa Zʋrdẽ kʋɩlga. Dɩlla yãmb pʋɩɩr ka le be ne Wẽnd ye!› D zoee yãmb kamba goama na n wa kɩt tɩ tõnd kamba ka le zoe Wẽnnaam, d Soaala, nif ye.

²⁶ Yaa rẽ yĩng la d yeel d mense: ‹D me maan-kugr kãnga.› A pa na n yɩ yũ-nood bɩ maand a taab kʋʋb zĩig ye.

²⁷ A na n yɩɩ kaset bala, tõnd ne yamb sʋka, d kamb ne yãmb kamb sʋka, tõnd loogr poore, tɩ yaa Naaba-Wẽnd la d waoogd ne d yũ-nood maando, d sugr kosg maando, d maan-dɩtse. Woto yãmb kamba kõn tõog n yeel d kambã: ‹Yãmb ka tar pʋɩɩr bilfr meng Wẽnnaam, d Soaala, nengẽ ye.›

²⁸ D yeela d mense: ‹B sã n yik beoogo n gomd woto ne tõnd bɩ ne d kamba, d na yeele: Ges-y Soaala-Wẽnd maan-kugra sẽn da yaa a soab akɩka. D ba rãmba ka mee-a yũ-nood maand bɩ maand a taab kʋʋb yĩng ye, b mee-a-la tõnd ne yãmb kaset yĩnga.›

²⁹ Bũmb sẽn zãr ne tõndo yaa d zẽk d zug ne Wẽnnaam, d Soaala, yaa d wẽnemd d kãare n tees bãmba, n yik n met maan-kugr sẽn ya toore ne sẽn be-a Wẽnnaam, d Soaala, sɛka roogẽ, d yũ-nood maand bɩ d kũuni, bɩ d maand a taab yĩnga.»

Zems-taab le waame

³⁰ Maan-kʋʋd a Pinas, nin-kẽembã la buuda kãsem-dãmb sẽn wʋm a Rubẽ, a Gad la a Manase kamba sẽn leoke, b yeelame tɩ zemsame.

³¹ Dẽ la maan-kʋʋd a Elazar biig, a Pinas, leok-ba: «D mii marsã tɩ Soaala bee ne do y sẽn pa saag n wɩɩb yĩngã la woto y zãaga a Israyɛl ne Wẽnd sɩbgre.»

³² Maan-kʋʋd a Elazar biig, a Pinas, n paas nin-kẽembã basa a Rubẽ, a Gad la a Manase kambã. B yii Galaad tẽng n leb Kanaã, b saam-biisa nengẽ, la b taas-b-la leokrã.

³³ Israyɛl kamb sũur yɩɩ noogo. B pʋʋsa Wẽnd barka la b pa le gom b na tak zabre la b sãam a Rubẽ, a Gad la a Manase rãmb tẽng ye.

³⁴ A Rubẽ ne a Gad kamba bao yʋʋr n pʋd maan-kugra. B ra yetame: «Yɩ kaset tõnd ne taab sʋka tɩ Soaala yaa Wẽnnaam.»