Zozuwe 14 - SEBR SÕNGO

Sẽn dʋʋg-b Zʋrdẽ wã pʋɩɩre

¹ Ad Israyɛl kamb sẽn paam pʋɩɩr ning Kanaã tẽnga. Pʋɩtba yɩɩ maan-kʋʋd a Elazar, la a Nun biiga, a Zozuwe, la Israyɛl buuda kãsem-dãmbã.

² B poeesame n bãng rot a wɛ wã la a Manase bogrã sẽn na n soog tẽns niynsi, wala Soaala-Wẽnd meng sẽn da wilg a Moyiiz.

³ A Moyiiz ra kõ-la a Rubẽ, a Gad ne a Manase bogr a ye wã b pʋɩɩr, Zʋrdẽ yaanga, la a pa kõ a Levi kambã b pʋɩɩr bãmb sʋk ye.

⁴ A Zozɛf buuda ra yaa rot a yiibu: a Manase roog la a Efrayim roogo. La Levitsa ka paam soolem sã n ka tẽns kẽer bala b sẽn na n kẽedẽ, bãmb ne b rũmsi n paas pʋt la rũmsa wãbneg zĩisi.

⁵ Tẽnsa pʋɩɩra tũ-la a Moyiiz sẽn deeg noor ning Soaala-Wẽnd nengẽ.

A Kalɛb pʋɩɩre

⁶ A Zɩɩda neb n waa n yãend a Zozuwe Gilgal. Kenitg a Yefune biig a Kalɛb, yeel-a lame: «Fo mii Soaala sẽn wilg a Moyiiz, Soaala-Wẽnd tʋʋm-tʋmda, mam poorẽ la fo me poorẽ, Kadɛs-Barnea.

⁷ M da tara yʋʋm pis-naase, Soaala-Wẽnd sõgna, a Moyiiz, sẽn waa n tʋm-m Kadɛs-Barnea tɩ m wa bãng tẽnga nenga. M lebgre m pelga m pʋg n togs m sẽn yãende.

⁸ Mam tũud-n-taasa gomame n boog saam-biisa raood zãnga la mam tũ-la m Wẽnnaama daabo.

⁹ Yaa baraar la a Moyiiz wẽen woto: ‹Tẽng ning f sẽn tabg ne f naoorã na n yɩɩ foo ne f kamba soolem, yʋʋm sẽn ka be sɛɛbo, tɩ fo tũu Wẽnnaam, f Soaala zãnga.›

¹⁰ Dẽ tɛka Soaala-Wẽnd wogla m yõore wala b sẽn kãabe. Yaa yʋʋm pis-naas la a nu rõanna la Soaala pʋlem-m dẽ, dẽ t'a Israyɛl nan keta we-raoogẽ, la m yʋʋm yaa pis-nii la a nu marsã.

¹¹ M sẽn zĩ ne pãng ning rũnna wã yaa waa a Moyiiz sẽn tʋm maama raare. M ket n tara m pĩnd pãngã, n tõe n zabe, n tõe n tʋm m tʋʋmde.

¹² Kõ-m tãms tẽns niyns Soaala-Wẽnd sẽn kãab-m, baraare, tɩ b na n kõ-m lame wã, tɩ baraare f wʋmame tɩ Anakits n da kẽed be la b tẽnsa da yaa tẽn-bɛd n tar pãnga. Daare Naaba-Wẽnd na zĩnd ne ma la m na reeg-b n sooge tɩ Soaala-Wẽnd n pʋlme.»

¹³ A Zozuwe ninga a Yefune biig a Kalɛb barka n dɩk Ebrõ n kõ-a t'a sooge.

¹⁴ Rẽ me yĩng la ba ne rũnna, Ebrõ yaa a Kalɛb soolem tɩ Kenitga a Yefune biig a Kalɛb tũu Soaala-Wẽnd daabo, a Israyɛl Wẽnnaam daabo.

¹⁵ Ebrõ ra boonda pĩnd tɩ Kiriyat-Araba. Arba wã n da yɩ Anakitg sẽn yɩɩg a taaba. Tẽnga yaa n vʋʋsa ne zaba.