Zozuwe 11 - SEBR SÕNGO

Nug goabg tẽns lʋɩɩse

¹ Asor dĩm, a Yabin, sẽn wʋm a Zozuwe kibare, a tʋlga sõngre n tʋm neb Madõ dĩm a Zobab nengẽ, n tʋm neb Simrõ ne Akesaf dĩm dãmba nengẽ.

² A le tʋma dĩm dãmb a taab nengẽ: dĩm niyns sẽn be nug goabga, tãnga zug, Zenezarɛt rɩtgo, dĩm niyns sẽn be bãg-faagẽ la Dor tãn-sɩlemsa zut, nin-taoore.

³ Kanaã rãmbã da bee yaang la nin-taoore, tɩ Amoritsã, Ivitsã, Perizitsã la Zebuzitsã be tãnga zugu; tɩ Ivitsã be Ermo tãnga tẽngre, Mispa tẽn-peelmẽ.

⁴ Bãmb fãa yiime ne b tãb-biisi, zãma kõn bãng-n-sõde, wala mogr noorẽ bĩisrẽ. B yii ne wiidi la bilim-bilm ka tɛka.

⁵ Dĩm bãmba fãa sũu taab n wa Merõ kʋɩlsẽ n na n tak zabr ne a Israyɛl.

⁶ Soaala-Wẽnd yeela a Zozuwe: «Da zoe nin-bãmba ye, tɩ beoog wakat kãnga, tɩ m dɩk-b-la kɩɩms zãnga n sagl a Israyɛl nugẽ. Fo na n pasa b wiidi wã nao gĩin la f yõog b bilim-bilm.»

⁷ A Zozuwe ne a tãb-biisa ling-b-la Merõ kʋɩlse n pãb-ba.

⁸ Soaala-Wẽnd sagl-b-la a Israyɛl nugẽ t'a tõog-ba n dig kẽer n ta Sidõ Na-tẽnga la Misrefot-Mayim, la Mispa bãg-fool sẽn be yaanga. Pãbra yɩɩ pãbr menga al tɩ nin-yend meng ka paam n zoe n põs ye.

⁹ A Zozuwe maana ne bãmb wala Soaala-Wẽnd meng sẽn da wilgi, n pas b wiida nao gĩin la a yõog b bilim-bilm.

Asor lʋɩɩse

¹⁰ A Zozuwe lɛɛg n wa wẽe Asor, n kʋ a dĩma ne sʋʋga. Tẽnsa sẽn gũbg n gilgã, a Asor n da ya na-tẽnga.

¹¹ Israyɛl kamba sẽn da wẽen tɩ b kõn kees bũmb b mens yĩngã, b kʋʋ bõn-vɩɩg fãa sẽn da be tẽn-kãng pʋgẽ. Bõn-vɩɩg ka põs ye, la b waa n baas n ninga tẽnga bugum.

¹² A Zozuwe tõoga dĩm dãmba fãa ne b tẽnsã. A kood-b-la gilli, tɩ b ra wẽename tɩ b kõn kees bũmb b mens yĩng ye, wala Soaala-Wẽnd sẽn da wilg b tʋʋm-tʋmd a Moyiiz.

¹³ Tẽnsa fãa sẽn da zao tãmsa zutã, a Zozuwe ka yõog tẽng a to n paas Asor ye. Tẽn-kãng bal la a yõog yã.

¹⁴ A Israyɛl sẽn kees a meng yĩng tẽn-kãens pʋgẽ yɩɩ b laogã la b rũmsã. Sã n ya ninsaalba, b kood-b la fãa gill ne sʋʋse, b pa kell ned ba a ye ye.

¹⁵ Soaala-Wẽnd sẽn da wilg b tʋʋm-tʋmd a Moyiiz bũmb ningã, a Moyiiz me ra taas-a-la a Zozuwe; la rẽ me la a Zozuwe tũ yã. A ka tol n bas noor a yembr meng a sẽn deeg a Moyiiz nengẽ n ka tũ-a zãng ye.

Tẽnsa fãa lʋɩɩse

¹⁶ Woto wã, yɩɩ tẽnga zãng la a Zozuwe wẽe n deege: Tãnga zug rãmba, Negɛb, Gosen, Bãoogã, Yamsem Mogre, Israyɛl tãn-bɛd la a bãg-faase.

¹⁷ Sẽn sɩng Alak tãnga sẽn tõnd Seyir sẽnẽ n ta Baal-Gad, Libã bãg-faagẽ, Ermo tãng sɛɛgẽ, tẽn-bãmb fãa lʋɩ-la a Zozuwe nugẽ. A yõga dĩm dãmbã n pãb n kʋ.

¹⁸ B zabra ne taab kaoosa wʋsgo.

¹⁹ Sã n ka Ivitsã sẽn kẽed Gabaõ, tẽng ba a ye ka tʋlg laafi ne a Israyɛl ye. A zaba ne tẽns a taabã n tõog-ba n sooge.

²⁰ Soaala-Wẽnd sɩd da tʋlgame tɩ b kɩʋʋlem b sũuri n tak zabr ne a Israyɛl, t'a Israyɛl me wẽen t'a kõn zoe b nimbãanega n sɩd sɛɛs-b zãnga, wala Soaala-Wẽnd sẽn da kõ a Moyiiz noore.

Anakitsa sɛɛsgo

²¹ A Zozuwe sẽn ta bala la a sẽn kʋ Anakitsã. A kʋʋ tãnga zug rãmba, Ebrõ rãmba, Debir la Anab rãmba, sẽn zao-b Zɩɩda bɩ Israyɛl tãmsã. Bãmb ne b tẽnsa lebga kisgu.

²² Anakitsa ka le zĩnd a Israyɛl tẽn-peelmẽ ye, sã ka Gaza, Gat la Asdod.

²³ Tẽnga fãa lʋɩ-la a Zozuwe nugẽ, wala Soaala-Wẽnd sẽn da wilg a Moyiiz. A weel-a lame n pʋɩ Israyɛl, roog fãa ne a rẽnna. Wakat kãng la tẽnga yaa n paam laafi.