Zeremi 9 - SEBR SÕNGO

A Zɩɩda zirẽ-beedo

¹ M sã n da tõe n taẽ we-raoogẽ n paam n tiẽ so-toagd sẽko, m basdẽ la m buudã, m zãagdẽ-la ne-a. B fãa gill zãmbda b Soaala, wa pʋg-yoodre sẽn maan ne a sɩdã.

² Ad-y b zelemda yaa zab-teoog menga Soaalã n gomd boto. Zirẽ n so naam n yɩɩd sɩda, a Zɩɩda tẽn-peelmẽ. B sẽn tar beegre la b sẽn tare. B ka mi maam wa sẽn paood ye.

³ Bɩ ned kam fãa gũus a menga ne a to, a ra pelg a pʋga ne a saam-biig ye, fo saam-biiga, bãng Zakoob a to zãmb ka tõe n ka zãmb ye, t'a tara pipi Zakooba zʋgo. Ad-y f zoa meng yaa tẽn-kãn-neda.

⁴ Ned kam fãa zãmbda a to, sẽn togsda sɩd ka be ye b minima zirẽ yagbo, B ka tõe n le wa kẽ maam, b beegra sẽn ya wʋsg yĩnga.

⁵ B goabg yaa pãn-tõogo b rɩtg yaa pãn-tõogo; zirẽ yagda rũnna n le yag beoogo; b pa rat tɩ tõnd seg taab ye, Soaala-Wẽnd n gomde.

⁶ Yaa rẽ yĩnga la dũni fãa Soaala gomda: M na n los-y-la bugmẽ tɩ y yɩlge m na n ning-y-la boaagẽ. M ka ne m sẽn na n maan bũmb ninga, tɩ m buuda wẽnem sɩd pida wẽnem.

⁷ B zelemd yaa wala pĩim b sẽn zẽne, sẽn zẽne neb kʋʋb yĩnga, b sẽn togsda yaa zirẽ-beedo. Goama yaa gom noodo, yɩnga, la pʋgẽ wã, b sũurẽ wã, yaa bẽdg la b bẽta.

⁸ Y pa tẽed tɩ m tog n yika ne-ba, yaa Soaala n gomde, la m dok m sũuri ne neb a woto buud bɩ?

Yãbr la sũ-sãang wakato

⁹ Tãmsã zutu mam zẽkda m koɛɛga m yãbra la m waasga sãtame; m pʋta m sũ-sãang yɩɩlle n yãbd rũmsa wãbneg zĩis sẽn lebg a soabã. Fãa rɩɩ bugum, ned ka le pɩkd be ye, b ka le wʋmd piisa rãamd ye. Luiil wala rũnga, ka le yãet ye, fãa loogame.

¹⁰ M na n kɩtame, yaa Soaala n gomde, tɩ Zerizalɛɛm lebg raboogo, n lebg we-yũus gãaga, n kɩt tɩ Zɩɩda tẽnsa lebg we-raoog sẽn kẽesd rabeem tɩ ned ka leb n zĩ a pʋgẽ ye.

¹¹ Yam soaba a bõe n tõe n wilg yɛl kãensa võore? Sã n yaa Soaala n gom ne-a bɩ a wilg tẽnga wãab võore, n wilg bõe n kɩt t'a lebg we-raoogo tɩ ned ka le rat n tag a pʋgẽ.

¹² Ad Soaala-Wẽnd sẽn leokde: «Yaa b sẽn pa tũ m sẽn wilgã, b sẽn tõdg Noor ninga mam sẽn da kõ-bã, b sẽn ka kelg m gomdã; yaa rẽ fãa yĩng la m bas-ba.

¹³ B kʋɩɩsa b sũur n tũ wẽn-naandsa, a Baal dãmb sore, sor ning b ba rãmb sẽn zãms-b al b yãadmẽ.

¹⁴ Dẽ n so tɩ dũni fãa Wẽnde, a Israyɛl Wẽnnaama gomd woto: Ade, mam na n kõo nin-bãmba ko-tɩɩsga, la ko-zẽnem tɩ b yũ.

¹⁵ Mam na n sẽeg-b-la bu-zẽmba tẽnsẽ, m na n kẽes-b la tẽnsẽ bãmb sẽn ka mi, la b ba rãmb me sẽn ka bãng ye, m na kɩtame tɩ b pʋg-ba ne sʋʋse n kʋ-b pẽs.»

¹⁶ Woto la dũni fãa Wẽnd leok yã. Tẽeg-y n bool-y kʋ-yãbdba tɩ b wa! Tʋm-y tɩ b tɩ bool sẽn mi-b yãbr neer-neere tɩ rẽ yaa b tʋʋmna tɩ b wa!

*(Buudã)

¹⁷ B wa ne yãgbo, la b yãb b yãbra n kũm-do al tɩ d mensa nin wa reeg n wuk ne nintãm al tɩ nintãm wa sord d nenga!

*(A Zeremi)

¹⁸ N-yẽe! Kũmkũma yita Siõ, a yita be tɩ d wʋmnẽ: «Aya! Ges-y d sẽn be zĩig ninga, d yãnda ka tõe n bilg ye, tɩ d tog n yii tẽngã, tɩ d rota fãa zoe n lʋɩɩme.»

¹⁹ Pagba, bɩ y kelg Soaala-Wẽnd gomd kãnga, yoog-y y tʋba n kelg b koɛɛga, zãms-y y kom-pugli wã sũ-sãang yɩɩl kãnga; b zãms b yags kũmkũm kãnga:

²⁰ Kũum tũu tõnd dota vẽya n kẽ kũum kẽ-la d ro-neebẽ, a kʋʋda kamb sor zugu, n kʋʋd kom-bɩɩba sõasg zĩigẽ.

*(Soaala)

²¹ Foo, Zeremi, togs-b Soaala gomd kãnga n paase: Neba kii n dʋra zĩis fãa, wala põosg sẽn gãneg pʋʋgẽ, wala kood sẽn kẽebe, wala kood sẽn lʋɩ tɩ wʋrdba gãndgd n loogdẽ.

Soaala bãngr la yam yẽesem

²² Ad Soaala-Wẽnd sẽn yete: «Bɩ yam yẽesem soaba da maan wilg-m-menga ne a yẽesem ye! Bɩ pãng soaba, da maan wilg-m-menga ne a pãng ye! Bɩ arzɛk soaba da maan wilg-m-menga ne a arzɛk ye.

²³ Ned sã n dat n pẽg a menga bɩ yɩ a sẽn tõe n bãng maama, yɩ a sẽn mi maam a Soaala, n mi tɩ m pida ne nonglem n pid ne zemsgo m tʋʋma fãa, tẽng zugu, yaa pʋ-peelem tʋʋma. N-yẽe! Ya bãngr a woto n tat mam yam.» Soaala n gome.

Zirẽ-bãongo

²⁴ Ad daar n wate, Soaala koɛɛga, tɩ m na n yik ne sẽn kẽ-a bãongo sẽn ya yĩng bãong bala.

²⁵ Ad Ezipt rãmba Zɩɩda, Edom, Amon kamba, Moabitse la neb niyns fãa sẽn kõogd b yɛɛma, n vɩ zĩ-pɛɛlẽ. Tɩ bala tẽn-kãens rãmba la a Israyɛl buuda menga, ka kẽ b bãongã Soaala yĩng ye.