Zeremi 8 - SEBR SÕNGO

¹ Soaala le paasame: Wẽnd kãnga b na n vaaga Zɩɩda dĩm dãmb kõaba b yaadẽ, b kug-zĩidba kõaba, b maan-kʋʋdba, b bãngdba, la Zerizalɛɛm dãmb kõaba.

² B na n yɛdg-b-la wĩndga la kiuuga vẽenemẽ, yĩngr ãdsã vẽenemẽ, tɩ bãmb la b ra nonga, bãmb la b ra kʋʋd maando, bãmb la b ra pʋgd ne b sũur fãa, bãmb la b ra bʋgda n na n bãng beoog yɛla. Bãmb la b waoog yã. Kõaba pa na n n wʋk ye, b ka na n le bus yaoogẽ ye, b na n yɛdg-b-la wa birga.

³ Buud yoog kãnga neba sẽn keesa yĩnga, b sẽn sẽeg n be zĩig ning fãa, ad-y ka vɩɩm n le tar yamleoog ye, lebga kũum. Woto la dũni fãa Wẽnda leok yã.

Wʋm yɛla võor yaa toogo

⁴ Fo na n togs-b lame tɩ Soaala-Wẽnd n sokde: Ned lʋɩtame n zãgs yikr laa? Ned tudgda sore n zãgs a poorẽ lebr laa?

⁵ Yaa bõe marsã tɩ Zerizalɛɛm dãmba wẽnemd b kãare la b ket n wẽenẽ tɩ b kõn tek zʋgo? B yam kẽ-la b wẽn-naandsã tɩ b zãgs a le wa kẽ maam.

⁶ Mam kelga b sẽn gomda neere, la b goama ka be võor ye. Ned ba a ye sẽn yet t'a tudgame ka ye; sẽn sokd-a a meng tɩ bõe la a maan, ka ye. Ned kam fãa vẽegda beoogo n kẽnd a kẽn-faadã wa weef sẽn ka le mi-a sẽn lebdẽ, zabr zĩigẽ.

⁷ Ba sigr-walle mi-la a sẽn na n teem tẽng wakato; walle, sɩlaalle, kʋʋl-n-ki, b fãa mi-la b tẽnga lebr wakato. Mam neba bala n ka mi Soaala sẽn kõ d noy niynsã.

Sɩlem goalenga

⁸ Yãmb tõog n yeelame: «Tõnd yaa neb sẽn tar yam vẽenem, tɩ Soaala wilga tõnd b raab la b noore.» Awa! Yãmb yɩta a wãn n gom woto tɩ sẽn gʋlsd-b Noora reegd-a n gʋlsd lɛbl-lɛbla n tudgd b taaba?

⁹ Yãnde na n yõka mitbã, tɩ b ka le yaa n mi b sẽn beẽ ye; b lɛɛg n lʋɩ-la b meng bẽdgẽ. B sẽn pa rat Soaala-Wẽnd Gomdã, b yam yẽesma na n naf-b-la wãn wãna?

Sẽn belgdb mense

¹⁰ Sẽn ya woto wã, Soaala n gomde, m na n dɩka b pagbã n kõ neb a taaba, n dees b pʋto n kõ sẽn dat-ba. Bãng-y tɩ b fãa gill, sẽn sɩng kom-bõonego, n digd bɛda yaa b meng yõod bal la b baooda; sẽn sɩng bãngda n wat maan-kʋʋda fãa yaa ninsaan-kazukma.

¹¹ B tɩbsda yood-yoodo mam bi-pugla sãmpogre, n yetẽ: «Laafi beeme, tɩ laafi yaool n kaẽ ye.»

¹² Y tẽedame tɩ b sẽn tʋmd beedã, b tʋʋm-wẽna yãnd tar-b lame bɩ? Yãnd ka baa bilfu! Reeg tɩ b kongame, yaa bũmb b sẽn ka mi lɛ-lɛ. Yaa rẽ me yĩnga la Soaala yet-ba, tɩ b na n zĩnda sẽn lʋɩ-ba sʋka, b sã n wa yik ne bãmba.

Wẽnd ka paam b sẽn baood ye *(Soaala)

¹³ Soaala-Wẽnd yeelame: mam datẽ lame n paam bũmb bãmb nengẽ, la m pa ne bugsuntung biig bugsuntunga zug ye, m pa ne kankamd kankanga zug ye; tɩɩsa vãad wãkame; dɩlla m bas taale, bɩ b lebg so-loaadba soolem.

*(Buudã)

¹⁴ Bõe tɩ ned kam fãa yɛs a zĩigẽ? D tigim taaba tɩ rẽ n são, d tɩ kẽ tãnsoben-tẽnse n gũ d kũuma beelẽ. Wẽnnaam d Soaala data d kũum, b rat n yũnug-d-la ko-zẽnem, la rẽ yaa d sẽn beeg-ba yĩnga.

¹⁵ Tõnd da tẽeda laafi, la fɩ! Tõnd da saagda sãoogre, d tol n da gũuda a wakato, la yɛɛsg bala la d seg yã.

¹⁶ Bɛ wã zoe n kẽe Dã, be rãmb wʋmda b wiidi wã sɛsga. B wed-daadã kɛleng miima tẽngã. B waame la bũmb kõn kell ye, tẽn-peelma ne a pʋgẽ teedo, na-tẽnga ne a kẽedba fãa.

*(Soaala)

¹⁷ Ade, mam na n tʋma wag toose, la ka wiis sẽn tõe n saolg tɩ sao ye, b na n wa kɛ-y lame. Soaala-Wẽnd n gomda!

Bãngda Zeremi sũ-sãanga *(A Zeremi)

¹⁸ Sũ-sãang kãsenga n paam maam la m sũ-sãanga ka tar tɩɩm ye.

¹⁹ Kelg-y tɩ yaa buudã n gomd woto, a boondame n kot sõngre, la a boolgã zĩig zãra, la a sokdame: «Soaala-Wẽnd ka leb n be Siõ yɛs laa? Siõ dĩma ka leb n be be laa?» Yaa bõe yĩng la b bao m noore n sak n waoogd wẽn-naandse, tẽn-zẽngẽ dãmba yel-yoodo?

*(Soaala) *(A Zeremi)

²⁰ Tigsgu wakat loogame, tʋʋlg wakat loogame la bala, la tõnd ket n gũuda fãagre.

²¹ Yel-beed ninga sẽn lʋɩ buuda zugã n lɛɛg n dɩt maam M tara sẽn dɩt-a kʋʋr sũ-sãanga m yama yi-la m menga.

²² Tɩɩm ka leb n be Galaad yɛs laa? Tɩpd ba a ye menga ka le be be laa? Bõe yĩnga tɩ m buuda bãag ka sãoogdẽ?

²³ M datẽ lame tɩ m zuga pidẽ ne koom tɩ m nina wukẽ ne nintãm, tɩ m tõog n kũmi, wĩndga la yʋngo, mam buuda neba sẽn ki wã!