Zeremi 6 - SEBR SÕNGO

Yel-beed n segend Zerizalɛɛm yĩnga

¹ Bẽnzame kamba, zoe-y n yi Zerizalɛɛm n bao zĩig n soonde, peeb-y baorg Tekoa; ning-y tãb-kaoore Bɛt-Kerem tãnga zugu, tɩ yel-beed n yit Goabg n watẽ, yaa tẽn-kũum menga.

² Siõ bi-pugla ne a neerma fãa, sãamame n dɩga.

³ Neb n wat a nengẽ neb ka tɛka wa rũn-kɩɩmb ne b rũmsi. B waa n tii n gũbg-a lame, tãb-biig fãa ne a zĩiga.

⁴ B moondame: Yik-y! D sɩng zabre! D sɩng zabra wĩnto-sʋka. Kato, wĩntooga na n paoog-d lame, wĩntooga zoe n kɩllame n dabd lʋɩɩse, zaabr maasem zoe n dõnega wʋsgo.

⁵ Bɩ y yik tɩ d sɩng zabrã ne yʋngo, n wã tẽnga ro-neeba gilli.

⁶ B kelg dũni fãa Wẽnd sẽn yet-ba: Lub-y tɩɩsã la y sam tãndo, sam-y tãndo n pag Zerizalɛɛm. D tara kaset vẽenega, tɩ b maanda pãn-tõog a pʋgẽ.

⁷ A wẽnema tãoosdame, wa ko-bunem sẽn tãoosd a koom. Tẽn-kãnga pʋgẽ, yaa zabr la pãng bʋrg bala la b wʋmda. M nin nee daar fãa, sãmpoaga la namsg sẽn pid namsgo.

⁸ Zerizalɛɛm, maan gũusgu ka rẽ m na n lak n basa foo tɩ f lebg zĩ-peen-daaga la raboogo.

Buud sẽn zãgsd kelgre

⁹ Ad dũni fãa Wẽnd sẽn kõt noor ninga: Wʋk-y, wʋk-y Israyɛl bu-kellã, yiis-y yã, wala b sẽn yiisd bugsuntung biisi; y nusa saag wilã a yeyn-ye.

*(Zeremi)

¹⁰ M na n goma ne ãnna? M na n togsa ãnna t'a kelg-ma? Ade, b tʋba ka yoog ye, b ka tõe n maag b meng n kelg ye. Soaala-Wẽnnaam gomdã lebga b laad bũmbu. B ka rat-a n kelg ye.

¹¹ Ad-y sã n ya maam, Soaala, m zĩime tɩ m sũur fõta, m pa le tõe t'a ka fudg n daal ye. Ypug f sũura, Zeremi, puug n waag f sẽn paam a soaba, n waag kamba sẽn be soya zutu, puug f sũur ne kom-bɩɩbã. Ad-b pagba la rapa, nin-bɛd ne nin-kẽem kulkuugu, fãa na n kãag n loogame.

*(Soaala)

¹² B na n kõo neb a taaba b zagse, b pʋtã, b pagba menga. N-ye! M na n tẽega m nug tẽn-kãnga rãmb zutu. Maam n yeele, maam, Naaba-Wẽnde.

¹³ B fãa, b kom-bõoneg ne b nin-bɛda, b fãa baooda b yõod bala. Bãngdba wa maan-kʋʋdba, zirẽ bal la b tʋʋmde.

¹⁴ B geta m buuda neba sãmpogre wa yel-yaalga la b yetẽ: «Laafi bal la d gãe ne!» Tɩ laafi yaool n kaẽ ye.

¹⁵ Y tẽedame tɩ b tʋʋm wẽnsã yãnd tar-b lame bɩ? Baa bilfu! Deeg tɩ b kongame wã ka wat b yamẽ ye. Yaa rẽ yĩnga, maam Naaba-Wẽnd n yete, m waoonga raare, fãa na sõd sẽn lʋɩ-ba sʋka.

¹⁶ Ad Soaala-Wẽnd sẽn le paase: Yals-y y sora zug n gese, sok-y n bãng pĩnd ra yaa wãna. Sok-y n bãng so-sõngo n tũ, tɩ y na paam laafi. La ayo, b yeelame: «Tõnd kõn maan fɩ!»

¹⁷ Mam ninga neb sẽn na n wilg-ba tɩ b maam gũusgu, baorga sã n wa peebdẽ la b leokame tɩ rẽ ka pak-b ye.

¹⁸ Woto wã, bu-zẽmba, kelg-y la y bãng yell ning sẽn na n pak-ba.

¹⁹ Kelg-y yã, dũni ninsaalba m na n tool-b-la yel-beed ninga sẽn na n dol b raab wẽnsã. B pa maan gũusgu wa m sẽn da kos-ba ye, b ka tʋlg n kelg m goama ye.

²⁰ Y sẽn tʋgd Saba n wat ne bũmb ningã tɩdarã la yẽgen sẽn tar yũ-noodã, y sẽn kẽnd al yɩɩg n wat ne bã dẽ maanda maam bõe? Rũmsã b sẽn kʋʋd m yĩnga, n basdẽ tɩ bugma rɩt-b zãnga ka wat ne m sũ-noog ba bilfu, b maand a taaba me yaa boto.

²¹ Yaa rẽ yĩng la Soaala-Wẽnd gomda: Mam na n bẽda tẽn-kãnga rãmba, bũmb la m na n ning b taoore tɩ b lake; b na n lak n lʋɩɩme n ka le yik ye: ba rãmba, kamba, yagse, zo-rãmba, b fãa na n kiime.

Bɛ wã na n yii nug goabga

²² Ad Soaal Wẽnd sẽn yeele: Bɛɛb n yit Goabg n watẽ, Tẽn-kẽeng rãmb n yit al tẽnga sɛtmẽ.

²³ B tãb-biisa zãada tãbdo la sʋʋse yaa nin-toose sẽn ka mi sugr ye. B bʋrga sãta wa mogr dẽnna. B zaoo wiidi la b tonga b zabr tongre, tongr sẽn sakd gesgo, la yaa fo yĩng la b wata, Siõ!

*(Buudã)

²⁴ Tõnd sẽn wʋm kibarã, d raood menemame, rabeem kẽe tõndo, tɩ d digd waoodo wa pag sẽn kũmd rogem.

²⁵ Woto wã bɩ y da kẽn y pʋtẽ ye, da kẽn-y sor zug ye, tɩ bɛ-wã yɛsa be n kʋʋda. Sẽn lebẽ fãa yaa tẽn-kũum.

*(Soaala)

²⁶ M buuda kamba, bao-y sũ-pa-noang fuugu n sẽgen y sɛɛga, bilim-y tompɛglmẽ. Kelem-y kʋʋre, bi-yend sẽn ki kʋʋre, pʋd-y kʋ-toog yɩɩlle, tɩ bɛ wã yika vugr bala n wat n na n wã-fo.

Kut sẽn ka tõe n yẽnege *(Soaala)

²⁷ M yãka foo, Zeremi, tɩ f yɩ wa ned sẽn losd kut buud boaagẽ n tõe n bãng a sã n ka kalem ne bũmb a to. M datame tɩ f mak m buudã, woto m na bãng a vɩɩma sẽn yaa a soaba.

*(A Zeremi)

²⁸ B fãa yaa tõatba, tẽn-kãnem dãmba, b fãa sũurã kʋɩ wa zũud bɩ kutu, b fãa yaa wãadba.

²⁹ Zugba soab zugame n kong pãnga, bugma ra tog n yẽnegame n welg namdã, la ayo! Wanzurfa zãgsa yɩlgre, rẽgda ka yit ye.

³⁰ B boonda nin-bãmba buudu tɩ wanzurf sẽn ka yõodo, Soaala-Wẽnd pa rat b buud ye.