Zeremi 50 - SEBR SÕNGO

Babilon lʋɩɩse la Israyɛl fãagre

¹ Gomd ninga Soaala-Wẽnd sẽn wilg bãngd a Zeremi t'a leok Babilon la Kalde rãmba.

² Moon-y yã tɩ tẽnsa fãa wʋme; wilg-y zĩis fãa; bao-y makre n wilg tɩ neb fãa bãnge, da solg-y bũmb ye; Moon-y woto: b tõoga Babilon; a wẽn-naandsa zĩi ne yãnde, n zĩ ne yɩɩre, yãnd na n kʋ-la a Bel. Dabeem kãseng kẽ-la a Marduk.

³ Tɩ bala, neb n na n yi Goabga n wa a tẽngẽ, n wãa-a t'a lebg weoog sẽn kẽesd rabeem t'a lebg rabo-vɩɩdo tɩ rũng bɩ ninsaala ka le pɩʋʋgd be ye.

⁴ Wakat kãng marsã, Soaalã n gomde, Israyɛl la Zɩɩda rãmba na n wẽnemda b naoore n lɛɛg n watẽ la b yãbda, n lɛɛg n wa bao maam b Wẽnde.

⁵ B na n baoo Siõ sore; b na n wẽnemda b nense n tees be. Zood la b rat n yõg ne maam zood sẽn ka na n le sãame, zood sẽn ka na n zĩnd sɛɛbo.

⁶ Mam neba da lebga piis sẽn menem Pe-kɩɩmba ra bas-b lame tɩ b menem, b ra bas-b lame tɩ b saad tãmsa zutu. Tãmsa la b ra tar rʋʋbo n wa yĩm b bãgra yelle.

⁷ Bɛ ninga fãa sẽn seg-ba, ra tara b yõgb bala la b yetẽ: «Tall-ba! Bãmb n beeg b Soaala n zãag ne b tɩlgr roogo, n bas b yaab rãmba sẽn da teeg a soaba.»

⁸ Soaala tãsd-b-la woto: Zoe-y n bas-y Babilon, yi-y Kalde rãmb tẽng n zoe! Zoe-y wala boeese sẽn lʋɩt bʋʋsa taoore.

⁹ Ade: mam na n kɩtame tɩ tẽn-bɛda sũ taaba, n tɩ zab ne Babilon. B na n yii Goabga n seg taaba n tɩ zab ne-a, n tõog-a. B pɛɛma, ka tãood n yõsg ye: ya tãb-biig nug sẽn noom pɛɛma mesgre. Gãndaoog ka kẽnd zabre n lɛɛg n wa tɩ nug ka zãad ye.

¹⁰ Babilon tẽnga rãmba, ad-y b na n zɛ-b lame zɛɛdba na n zɛɛ ne sũ-noogo. Woto la Soaala gomda.

¹¹ Aya! Modg-y ne kɩdengo, y tõe n nooga y sũuri, yãmb fãa, m soolma fãadba! Modg-y ne zoeese wa nag-sɛdg sẽn be bãoogẽ, Kelem-y yã wa wed-daado sẽn kelemde!

¹² Y zɩ tɩ y ba yiri zĩi ne yãnde, y zɩ tɩ yãnd wuka a zugu, y zɩ tɩ yẽ n pa poorẽ zãnga, y zɩ t'a lebga zĩ-peen-daaga!

¹³ Yaa a sẽn yik Soaala sũur yĩnga, la a lebg we-raoogo, tɩ nin-vɩɩg zãag ne-a, tɩ sẽn pẽnega be rigd rabeem la a wiisdẽ, t'a nee sãoong ning sẽn sãama.

¹⁴ Yãmb fãa sẽn dõos y tãbdo, wa-y n teedg-y ne Babilon, gũbg-y na-tẽngã. Tão-y y pɛɛma, da zoe-y y pɛɛm bõn ye, tɩ bala a beega Soaala-Wẽnde.

¹⁵ Kɩt-y t'a wʋm a tãb-biisa kaasgo. A ges a gasdã sẽn lʋɩte, a lal-gũbrã sẽn sirgi la a reeg t'a konga pãnga. Yaa Soaala n dokd b sũuri. Yãmb me rok y sũuri ne Babilon Lebs-y na-tẽngã a sẽn maan a taaba.

¹⁶ Bʋdb ra zĩndi, ka-kɛɛr ra zĩndi. Zabra yel-beeda yĩnga, bɩ ned kam fãa leb a buudẽ, ned kam fãa leb a tẽngẽ.

¹⁷ Israyɛl da yaa pe-yãang sẽn da menem, pe-yãang bõnyẽes sẽn da rigdi. Sẽn yɩ-a pipi soaba n yĩig-a, yaa Asʋr dĩma. Yẽ poore yɩ-la a Nabikodonozor, Babilon dĩma, la dĩm kãnga pãba a kõabã n bõgse.

¹⁸ Yaa rẽ yĩnga la dũni fãa Soaala, a Israyɛl Wẽnnaam gomd woto: «Mam na n yika ne Kalde dĩma, ne a tẽnga wala m sẽn maan ne Asʋr dĩma.

¹⁹ M yaool n na n talla a Israyɛl n lebs-a wa rũnga, a wãbneg zĩigẽ; a na paam tɩ m dɩlga, Karmɛl la Bazã tãmsa zutu, n dɩlg-a Efrayim la Galaad tãmsa zutu la bũmb kõn paoog-a ye.

²⁰ Maam n yete, maam, Naaba-Wẽnde, tɩ b na n baoo a Israyɛl sẽn beeg ne bũmb ninga la b ka na n leb n yãe bũmb ye. B na n bao a Zɩɩda beegre, la b ka na n le yãend bũmb ye. M sẽn bas b rãmb vɩɩsa na n paama sugri.

²¹ Kẽng-y ko-mensenda tẽngẽ, kẽng-y n tɩ zab-y ne-yẽ, kẽng-y n tɩ zab-y ne a Pekod! B kʋ-b fãa gilli, n da bas bũmb ye, Soaala gomde. Mam sẽn kõ foom noore, tɩ f maan bũmb ninga bɩ f maane.

²² Tãp bʋʋr wulumda ne tẽnga, yel-beed bal n pid tẽngã!

²³ Maana a wãn-wãna? Babilon da wẽnda guugu, n tood n bõgsd dũni wã gilli; la ade, yẽ n kao gɩrse n dɩga. Ad-a sẽn wẽnd bũmb ning rũnna: zĩ-peen-daaga sẽn kẽesd rabeem. La rẽ yɩ-la a wãna?

²⁴ Ad yaa maam n gãneg-f bẽdgo Babilon, la fo basame tɩ b yõk-fo; fo ka bãng meng ye. Ad-f sẽn pag bi-bees roogo, tɩ yaa maam, Naaba-Wẽnd, la f beeg yã.»

²⁵ Soaala paka b zab-teed doogo, la b yiisa b sũ-puur zab-teedo. Babilon dãmb nif na n yãendame, b nif na n yãenda dũni fãa Soaala tʋʋma.

²⁶ Aya! Yi-y zĩis fãa n wa Babilon! B fõgs bao wã fãa, b tigs laogã gilli n yõog bugum. B sõng tɩ bũmb ra kees ye.

²⁷ Kʋ-y gãndaadã, tall-y b fãa n kẽng n tɩ koode! Bãmb wakat n ta, bɩ b me looge, tɩ Soaala me yika ne bãmba.

²⁸ Kelge, Siõ, ad yaa neb n põs Babilon la bãmb dãmb n wate, n na n wilg Soaala-Wẽnd sẽn dok b sũur ne fo bɛɛbã. B roka b sũur ne wẽnd dooga wãadba.

²⁹ Bool-y tãb-biisi, bool-y neb niyns fãa sẽn dõosd tãpo, tɩ b wa zab ne Babilon. Bɩ b wẽ b sika n gilg Babilon; a ra paam zĩig n zoe n põs ye. B lebs-a wẽngã a sẽn maana, a sẽn nams a taaba to-to, b nams yẽnda me boto. Rẽ n segd, t'a zẽka a menga Soaala-Wẽnd taoore, a Israyɛl Nin-Sõnga taoore.

³⁰ Kʋ-y kom-bɩɩbã tẽnga fãa pʋgẽ, sõng-y tɩ b tãb-biisã fãa ki badaare. — Soaala gomde.

³¹ Ade, m yika ne foom, Babilon, wilg-m-meng soaba. Yaa dũni fãa Soaala n gomde. Ad fo wakat n ta tɩ m na n yik ne foo.

³² Zẽk-m-meng soaba lakame n lʋɩ; ned ka be n na n sõng-a t'a yik ye. M na n ninga tẽnga bugum la bugma kõn kees bũmb ye.

³³ Soaala koɛɛga, a Israyɛl Wẽnda koɛɛg la woto: B namsa Israyɛl kamb wʋsgo, n nams Zɩɩda kamba me wʋsgo. Neb niyns sẽn wʋk-ba n loog pa-weerã pa rat tɩ b lɛɛg n wa ye.

³⁴ La bãmb Fãagda yaa maam, la maam me la pãng Soaba menga, maam la dũni fãa Wẽnde. Maam n na n zab b zĩigẽ, la m na n waa ne laafi tẽng zugu, Babilon bal n na n pa ne zũnd-zãnde.

Soaala raab ne Babilon

³⁵ M na n yika zabr ne Babilon dãmba ne na-tẽnga rãmba, ne a na-biis la a mitba, yaa Soaala n gomde.

³⁶ M na n yika zabre ne zirẽ bagbã m na n menesa b yẽesma. M na yika ne a tãb-biisã n zãag b yama ne b zab-teeda zãabo.

³⁷ M na n yika zabre ne a wiidi n yik zabr ne a bilim-bilm, n yik zabr ne buud niyns sẽn sõngd-a, n kɩt tɩ b lebg rabɛɛmb wa pagba. M na n yika zabre ne a laogã, n kɩt tɩ b wa zɛ-ba n looge.

³⁸ M na n yika zabre ne kʋɩlsã n kʋɩɩs-b zãng-zãnga. Tɩ bala tẽnga pida ne wẽn-naandse la bãmb n menesd b neba yam, sẽn waoogd-b bãmba yam.

³⁹ Dẽ n so tɩ b tẽnga na n lebg we-yũusi, la kata zĩiga; na-neendo na n wa kẽe be. Babilon na n lebga vɩʋʋgo, ned kõn le zĩnd tẽn-kãng abada.

⁴⁰ M na n sãam-a-la zãnga wala Sodom ne Gomor la b yagse. Yaa Soaala n gomde. Ned kõn le tol n zĩnd be ye, ninsaal kõn le ti a roog be ye.

Nug goabg tãb-biisi

⁴¹ Neb n yit nug goabg n watẽ, yaa tẽn-kãseng rãmba. Nanams sẽn tar pãnga n dɩk sor n watẽ la yaa al mooga sɛtmẽ la b yita.

⁴² B tãb-biisa tara tãbdo la b yuumda b sʋʋse. Yaa neb sẽn ya nin-toose, neb sẽn ka tar sugr ye. B bʋʋra zema mogra rẽnna, mogra sẽn mi n wa yik a ko-wiisã. Yaa wiidi la b zao, la b tonga b zabr tongre, la b wat n na n zaba ne foo, Babilon.

⁴³ Babilon dĩma wʋma koɛɛgã t'a raood na n sɛ zãnga, tã na n digimd waoodo wala pag sẽn kũmd rogem.

⁴⁴ Ade, m na n yɩɩ wa bõnyẽega, sẽn yit Zʋrdẽ tʋgrẽ n wat rũms wãbneg zĩigẽ. Tao bala, bũmb fãa na menem. M na kẽes Babilon dĩm ning m sẽn tũusa soolmẽ. Ãnda n tõe n mak a meng ne maam, ãnda n na sok maam m sẽn maande? Tẽng-soaal a bõe n tõe n yals m taoore?

⁴⁵ Bɩ y kelg neere Soaala sẽn yals Babilon poorẽ, bɩ y bãng b sẽn yalse tẽnga yĩnga. Bãng-y tɩ b na n tall-b lame n looge n loog a yeyn-ye wa rũmsi. Bãng-y tɩ yaa b tẽnga menga n ka le rat n wʋm b yũugu.

⁴⁶ B sẽn wʋm tɩ b tõoga Babilon, tẽnsa miimame, la b wʋma kaasgo bu-zẽmba tẽnsa pʋsẽ.