Zeremi 49 - SEBR SÕNGO

A Amon poorẽ

¹ A Amon kamba poorẽ, Soaala gomda woto: «Sɩngame tɩ bõe tɩ wẽnd a Milkom wa so Gad tẽn-peelem? Sɩngame tɩ bõe tɩ Amonitsa wa so Israyɛl tẽnse? A Israyɛl konga kamb bɩ, kamb sẽn na n welg b ba raboog bɩ?»

² Sẽn ya woto wã, ad daar n wate, Soaala koɛɛga, tɩ mam na n kɩt tɩ b wʋm tãp bʋrga Amonitsa Raba pʋgẽ. A na n lebga sũ-sãang tãn-bila, n lebg raboog sẽn kẽesd rabeem. Yagsa tẽns mens na n dɩɩ bugum. Dẽ marsã, la Israyɛl na n deeg a soolma. Soaalã n yeele.

³ Esbõ rãmba, kelem-y kʋʋre tɩ bala Ayi wãame! Raba kom-pugli, kũm-y yã! Yeelg-y sũ-pa-noang futu yõk-y kũmkũma, vɛɛs-y goabg la rɩtgo. Wẽn-naand a Milkom tʋk n dabda pa-weere, yẽ ne a maan-kʋʋdba la a na-komse.

⁴ Raba, bi-pugl sẽn ya tõata fo da maanda wilg-m-menga ne f bãado, f ra teega f sẽn tigs n bĩngi. Woto la f ra gomd f sũurẽ: «Ãnda n na n saag n tak zabr ne maam?»

⁵ Ade, mam na n kɩtame, yaa Soaala n gomde, yaa dũni fãa Wẽnd n gomde, mam na n kɩtame tɩ f yɛɛse; f yɛɛsga na n yii zĩig zãnga; b na dig-y-la fãa n tees taoore. Ned kõn zĩnd yãmb sʋka, sẽn na n tõog n tigim zoetba zĩ yɛng ye.

⁶ La rẽ poore marsã m na gese n tek Amonitsa yelle. Soaala-Wẽnd n gomd boto.

A Edom poorẽ

⁷ Soaala koɛɛg a Edom poorẽ. Dũni fãa Soaala gomda woto: Yam-vẽen-ned ka le ket Teman laa? Yam zulumsa rãmb yam kẽe yɛ? B basame tɩ b yama sɩlem kẽk laa?

⁸ Dedã rãmba, leb-y poorẽ, zoe-y yã! Bao-y bogdo n soond neere, tɩ bala m wat n na n sãama a Ezayu yagense. Y wakata yaa n taame.

⁹ Bugsuntunda tõsdba sã n wa y nengẽ, b ka na n bas sib gĩnd meng ye. La yʋng ninga wagda wã sẽn na n wa, dɩll b raab pids zãnga, bũmb kõn kell be ye.

¹⁰ Tɩ bala yaa maam n na n deeg a Ezayu sẽn tara fãa, m na n bãnga a sẽn solgd a laoga zĩiga, a ka na n leb n tõog n solg bũmb ye, na n yɩɩ yell a Ezayu yĩnga. F yak kõn tõog n yeele:

¹¹ «Y sã n wa looge m na ges y kɩɩb-bi wã yelle, y pʋg-kõapa na tõog n teeg maam.»

¹² Ad Soaala gomd a to: «Kelg-y neere. Rã-toaaga sẽn da ka segl b rãmb yĩngã, bãmb n baas n yũ-a. La foo, Edom, fo ratame tɩ b ges foo wa ned sẽn ka maan yelle. Kõn yɩ boto bada. Fo me na n yũu rãama.

¹³ Bala, mam meng kãabame, la sɩda wa m sẽn ya Wẽndã, Bosra na-tẽnga na n lebga yel-beed tẽnga, bũmb sẽn kẽesd rabeem; a na n lebga raboogo la a yella n na n wa f yamẽ, f sã n wa rat n kãab beedo. A yagsa tẽns me na n naagame n lebg rabood sẽn ka na n tõog n le yik bada.» Yaa woto la Soaala gom yã.

¹⁴ Ad-y Soaala wilg-m-la woto: tɩ b tʋma ned t'a togs bu-zẽmbã: «Tigim-y taaba! Kẽng-y n tɩ zab-y ne Edom! Yik-y yã tɩ yaa tãpo!

¹⁵ Ade, Edom, mam na n kɩtame tɩ fo lebg tẽn-bila tẽns fãa sʋka, neb fãa na n sãbsa foom.

¹⁶ Fo n da yɛɛsd Adem biisi, n da tẽed tɩ fo n yɩɩd fãa, la rẽ wã, f ra belgda f meng bala. Ne f sẽn kẽed pĩis bogdẽ, ne f sẽn tɩ zao tãn-lug-lugã, ne f sẽn tɩ zaoolg f tʋka yĩngr wa sɩlg sẽn zaoolgd a rẽnna, m na tɩ sik-fo.» Soaala n gome.

¹⁷ Edom na n lebga raboogo. Neb niyns fãa sẽn na n loog a tẽn-peelmẽ, a pɛleng na n yɩkame, yel-beed la b na n yãend n wiisi.

¹⁸ Wala Sodom la Gomor sẽn yɩ a soaba, Edom ne a yagsa me na n yɩɩ boto. Tẽn-kãens me pʋgẽ ned kõn leb n zĩnd yɛs ye.

¹⁹ Ade, m na n yɩɩ wa bõnyẽega, sẽn yit Zʋrdẽ kãgrẽ n tees rũms wãbneg-zĩiga, Yaa Soaala-Wẽnd n gomde, la vugr bala m na n sẽega fãa. Dẽ poore m na n ninga m yam sẽn dat a soab be. Ãnna n zem maam? Ãnna n tõe n bool maam bʋʋdo? Nin-naab a bõe n tõe n yaas mam taoore?

²⁰ Bãng-y Soaala-Wẽnd sẽn sede, a Edom sɩbgr yĩnga. Wẽnd sẽn segle Teman rãmb yĩnga. Bãng-y tɩ b na n looga ne-ba a yembr-yembre wala rũmsi. Bãng-y tɩ b tẽn-peelma meng n na n zãgs-ba, wala bũmb sẽn yaand sũuri.

²¹ Bãmb lʋɩɩsa bʋrg yĩnga, tẽng rĩmame al n sãag n ta Rudum mogre.

²² Ade, yaa wala sɩlga sẽn lug yĩngri n laannẽ, n tẽeg a pɩgsa Bosra zugu. Badaare, Edom tãb-biis sũuri na n pida ne yɩɩre wala pag sẽn kũmd dogem dẽnna.

Damas poorẽ

²³ Koɛɛg a Damas poorẽ. Amat la Arpad tẽnse gãee ne sũ-sãanga tɩ b wʋma sẽn pa tõe n kelge. Yɩɩre n tar-ba tɩ b ka mi b sẽn na n maaneg ye;

²⁴ Damas rãmb basda raoodo b lɛɛgame n na n zoe, rabeem kãseng la b rigda; toog tara b yĩnga n wẽnnẽ wala paga sẽn kũmd dogem.

²⁵ Yaa wãna, tɩ b zoet n basd tẽnga tẽng yʋʋr sẽn yi a taab sʋka, tẽng sũur sẽn noom ne a menga?

²⁶ Tẽnga kom-bɩɩba na n lʋɩɩ b sõasg zĩigẽ, la a tãb-biisa na n kii baraare. Dũni fãa Wẽndã n gomd boto.

²⁷ Mam na n ninga Damas lalsa fãa bugum, la a na n dɩɩ Damas dĩm a Ben-Adad doogã.

Arabsa poorẽ

²⁸ Koɛɛg Arabsa poorẽ. Yaa sẽn be-b Kedar la Asor, bãmb la Babilon dĩm a Nabikodonozor sẽn tõogã. Ad Soaala koɛɛg b poorẽ: Aya! Yik-y yã, yaang rãmba, kẽng-y n tɩ zab-y ne Kedar dãmba. Da kees-y bũmb zĩ-peen-daagẽ wã ye.

²⁹ B wʋk b pɛɛl roto la b rũmsã; b wʋk b pɛɛla la b lagda fãa! B deeg b yʋgma wã la b moone: «Yɛɛsgo, goabg la rɩtgo!»

³⁰ Asor rãmba, Zoe-y yã! Da yals-y ye! Solg-y yã, Asor dãmba, Soaala-Wẽnd n gomde, tɩ bala a Nabikodonozor, Babilon dĩma, bilgda a yamẽ n dat n tʋm yãmb tʋʋm beedo.

³¹ Yik-y yã! Kẽng-y n tɩ zab-y ne tẽng sẽn vɩ ne laafi tɩ dabeem kaẽ ye, Soaala-Wẽnd n gomde, kẽng-y n tɩ tak zabre ne tẽng sẽn ka tar kʋɩlense, n vɩ kɛɛnga.

³² B yʋgma, b na n yõg-b lame, la b rũmsa a taaba na n lebga b soolem. M na n sẽega yaang la taoore goabg la rɩtgo, nin-bãmba sẽn kõogd b yɛɛma. Sẽn lebẽ fãa, m na n sãam-b lame, Soaala-Wẽnd n gomde.

³³ Asor na n lebga we-yũus tẽnga, n lebg we-raoog sẽn kẽesd rabeem, ned kõn le zĩnd be ye; a na n lebga wala raboogo.

Koɛɛg a Elam poorẽ

³⁴ Ad koɛɛga Soaala sẽn togs a Zeremi, Elamit rãmb poorẽ. Yɩɩ Zɩɩda naaba, a Sedesiyas, naama sɩngrẽ.

³⁵ Dũni fãa Wẽnda goma woto: «Ade mam na n kaooga Elam tãpo, t'a tãpa la a pãnga.

³⁶ M na n kɩtame tɩ sobgo yi kɩrems a naasã: yaanga, nin-taoore, goabga la rɩtgo, n wa sẽeg Elamitsa zĩis fãa; tẽng ka be n ka na n yãende b sẽn dig b rãmba n yiis Elam ye.

³⁷ Mam na n kɩtame tɩ Elamitsa digimdi b bɛɛb taoore, neb niyns sẽn dat n kʋ bãmba taoore. Yell kãsenga la m na n tak b zugu mam sũura na yikame, Soaalã n gomde, m na n kɩtame tɩ b pʋg-b ne sʋʋse n kʋ-b gilli.

³⁸ M na n yiisa Elam dĩma ne a kug-zĩidba n maneg n zaoolg m naam goeele.» Soaala-Wẽnd n gomd boto.

³⁹ La daar a ye, bãmb n togsde: m na n gesa Elam t'a yella teke.