Zeremi 43 - SEBR SÕNGO

A Zeremi loogda Ezipt ne pãnga

¹ A Zeremi sẽn wa n togs neba, goam niyns fãa Soaala-Wẽnd, bãmb Wẽnnaam sẽn da kõ-yẽ noore t'a togse,

² a Azariyas, a Osaya biiga, a Zoana, a Karea biiga, n paas nin-yaalsa fãa, leoka a Zeremi woto: «Fo sẽn togsda fãa yaa zirẽ bala. Soaala, tõnd Wẽnnaam ka yeel foom tɩ f togs tõndo tɩ d da kẽng Ezipt tẽnga n tɩ zĩnd be ye.

³ Yaa a Barʋk, a Neriya biiga, n pirsd foom, a sẽn kis tõnda yĩnga, n dat tɩ fo ning tõnd Kalde rãmba nugẽ, tɩ b kʋ tõndo, bɩ b tall tõnd n kẽng yembdo al Babilon.»

⁴ Woto wã a Zoana, a Karea biiga, n paas tãb-biis kãsem-dãmba la tẽnga rãmb ka kelg Soaala gomde n pa Zɩɩda tẽng ye.

⁵ A Zoana, a Karea biiga, la tãb-biis kãsem-dãmb peega Zɩɩda neb sẽn da keta fãa, sẽn da yi-b tẽns a taabã n leb n wa b tẽngẽ, b peega sẽn da sẽeg-bã fãa:

⁶ dapa, pagba, kamba n paas naab kom-pugli la neb niyns fãa a Nebuzaradã, gũudba tãnsoaba, sẽn da bas ne a Gedaliya, a Ayikam biiga, a Safã yagenga, la sẽn yɩɩd fãa, b peega bãngd a Zeremi la a Barʋk, a Neriya biiga.

⁷ B sɩd looga ne-b Ezipt tẽnga n tõdg Soaala noore, la b taa Tapanɛs. A Zeremi yaool n da pĩnd n wilgame t'a Nabikodonozor na n wa pãba Ezipt tẽnga.

⁸ Soaala taasa b koe-kãnga a Zeremi, Tapanɛs tẽnga:

⁹ «Bao kug-bɛda n wʋke, fo na n bus-b-la tẽnga kombera rooga noore. F na n bus-b-la a Zɩɩda neba nifẽ.

¹⁰ La f yeel neba: Dũni fãa Soaala, a Israyɛl Wẽnnaam, gomda woto: ‹Ade mam tʋmame tɩ b tɩ bool a Nabikodonozor, Babilon dĩma, mam tʋʋm-tʋmdã, a na n wa vigla a naam goeele kug kãensã zutu, la a tilg a naam zãongo.

¹¹ A na n waame, la a na n sɩbga Ezipt tẽnga: a na n kʋʋ kẽere, n tall kẽer n loog yembdo, a na n kooda kẽere.

¹² A na n yõoga Ezipt tẽng wẽn-naandsã dot bugum, a na n yõoga b mensa bugum, bɩ a na wʋk-b lame n loog a tẽngẽ. A na n zɛɛ Ezipt zãnga wa rũn-kɩɩm sẽn saagd a fuugu n menes a karens zãnga. Dẽ poor marsã la a na n yaool n loog a tẽngẽ ne yẽesem.

¹³ A sã n ta Eliopolis, a na n tusa kuga lal-gilsã n lubi la a yõog Ezipt wẽn-naandsa rota bugum.› »