Zeremi 41 - SEBR SÕNGO

¹ Bãng-y tɩ kiuug a yopoe soaba, a Netaniya biiga la a Elisama yagenga a Ismayɛl sẽn da ya na-koambga, la sẽn da zĩnd dĩma zakẽ, waa ne neb piiga a Ayikam biiga a Gedaliya nengẽ, Mispa. La b sẽn da waa n zĩẽ n dɩtẽ,

² a Netaniya biiga, a Ismayɛl, yika ne a neb piigã n kõs a Ayikam biig a Gedaliya ne sʋʋga. Dɩlla yɩɩ woto la b kʋ ned ninga Babilon naab sẽn da rɩk n lʋɩɩs tẽnga taoore.

³ Paas me, Zɩɩda rãmba fãa sẽn da be-b ne a Gedaliya Mispa, la Kalde tãb-biisã, a Ismayɛl kʋ-b-la fãa.

Neb a taab kʋʋbo

⁴ B kʋ a Gedaliya tɩ maan dasem a yi tɩ ned ba a ye nan ka wʋm a kũuma kibar ye.

⁵ Ade neb n yi Sikɛm, Silo la Samari, bãmb pis-nii; b da kõosa b toeemse, b fut fãa da kẽesame; b da boga b yĩnga, b da tara kũuni n paas tɩdare n na n tɩ kõ Soaala, Zerizalɛɛm wẽnd doogẽ.

⁶ A Netaniya biiga, a Ismayɛl yɩ Mispa n seg-ba, la a da kẽndame la a kũmnẽ. A sẽn seg-ba, a yeel-b lame: «Wa-y yã a Ayikam biiga, a Gedaliya, nengẽ.»

⁷ B sẽn kẽ tẽnga pʋgẽ n sɛ, a Netaniya biiga, a Ismayɛl ne a neba kʋ-b lame, la b dɩk-b lame n lob ko-baoorẽ.

⁸ Bãmb sʋka, neb piig n zĩnd be n paam n yeel a Ismayɛl: «Da kʋ-d ye; ade, tõnd tara dɩɩbo tõnd sẽn solg pʋtẽ: alkam, alkam pugsgu n paas kaam la sɩɩdo.» A sẽn wʋm woto, a Ismayɛl bas-b lame n ka kʋ-b ye.

⁹ Ko-baoor ninga a Ismayɛl sẽn da kɩt tɩ b lob a sẽn da kood b rãmba, da ya ko-bao-kãseng ning dĩm a Asa sẽn da kɩt tɩ b manege, a sẽn waa n takd zabre ne a Basa, a Israyɛl dĩma. Yaa ko-baoor kãng pʋga la a Ismayɛl, a Netaniya biiga, ning neba yẽ sẽn da kʋ wã.

¹⁰ Dẽ zugẽ, a Ismayɛl kɩtame tɩ b yõg neb niyns sẽn da ket-b Mispa n kẽes-b bi-bees roogẽ, bãmb ne dĩma kom-pugli, la neb niyns fãa a Nebuzaradã, gũudba tãnsoaba, sẽn da gũnug a Ayikam biiga, a Gedaliya, Mispa. A Netaniya biiga, a Ismayɛl tall-b lame wala bi-beese n tũ Amonitsa nengẽ.

A Ismayɛl sẽn yõg b rãmba fãagre

¹¹ A Zoana, a Karea biiga, ne tãb-biisa sẽn da be-b ne-yẽ wã waa n wʋma tʋʋm wẽns niyns fãa, a Netaniya biiga, a Ismayɛl sẽn maana.

¹² Woto b waa ne b neba n na n zab ne a Netaniya biiga, a Ismayɛl. B tɩ paam-a-la Gabaõ ko-ralma noorẽ.

¹³ Neb niyns sẽn da be ne a Ismayɛl sẽn yãend a Zoana, a Karea biiga, la tãb-biisã sẽn da tũud yẽ, b sũur yɩɩ noogo.

¹⁴ Neb niyns fãa sẽn da yi-b Mispa n tũud a Ismayɛl, a Netaniya biiga, bãmb fãa zoe n waa a Zoana nengẽ.

¹⁵ A Ismayɛl zoe ne neb a nii n tɩ kẽ Amonitse.

¹⁶ Dẽ zugẽ a Zoana, a Korea biiga n paas zab-zabdba sẽn da yãagd-b yẽ wã, tigma neb niyns a Ismayɛl, a Netaniya biiga sẽn da wʋk Mispa wala yemse, a sẽn wa n kʋ a Gedaliya, a Ayikam biiga: dapa, zab-zabdba, paga la kamba, n paas na-yir dãmba sẽn da be Gabaõ.

¹⁷ B yikame n sɩng kẽnde la b tɩ yalsa Kimam, tẽng sẽn pẽ ne Bɛtelyɛɛm.

¹⁸ B yama ra yaa b ta Ezipt, tɩ bala a Ismayɛl, a Netaniya biiga, da kʋ-la a Gedaliya a Ayikam biiga, la Babilon naaba n da kõ a naam, t'a gũ tẽngã. Dẽ yĩnga dabeem da tar-b lame.