Zeremi 4 - SEBR SÕNGO

*(Soaala)

¹ Israyɛl, ad-f sã n leb poorẽ, yaa Soaala n gomde, f tõe n le wa-la m nengẽ. Fo sã n zãag ne maam f wẽn-naan-yoodã, f kõn le baood n na n zoe ye.

² Zirẽ-beed sã n ka f noorẽ, tɩ f wẽen wa sẽn tog la sẽn zemse, n wẽen ne Soaala, vɩɩm naaba, ad bu-zẽmba mens na kos-ma tɩ m ning-b barka, la b na kils m yʋʋre.

³ Ad Soaala-Wẽnd sẽn yet Zɩɩda neba la Zerizalɛɛm tẽng rãmba: Pesem-y y meng pʋ-paalle, da le bʋd-y gõos sʋk ye.

⁴ Ade, sã n yaa mam yĩnga la y zãag y sũura ne a rẽgdã, Zɩɩda rãmba, Zerizalɛɛm kẽedba, bɩ y kell n dɩk y mens n kõ maam. Y ka maan boto, y tʋʋm yooda yĩnga, m sũura na n widga wa bugum, bugum sẽn pa tõe n kiisi, bugum sẽn na n dɩ-y zãnga.

Yel-beed n na n lʋɩ Zɩɩda

⁵ Wẽ-y kũnga, a Zɩɩda yĩnga, tãs-y koɛɛg, Zerizalɛɛm yĩnga Peeb-y baorg tẽnga fãa pʋgẽ, tãs-y ne y koɛɛg pãng tɛka. Wilg-y tɩ b wa tigim tãnsoben-dotẽ,

⁶ Wilg-y tɩ b yagl tãb-kaoore n tees Siõ, Wilg-y tɩ b bao zĩig n soonde, la ned ba a ye ra paa a zĩigẽ ye. Yaa nug goabg sẽnẽ la Soaala-Wẽnd tusd yel-beed t'a watẽ; yaa wɩɩbd sẽn pid wɩɩbdo.

⁷ We-naaba yi-la a tʋgrẽ, dũni wã tẽn-wãada yikame n dɩk sore; a yi-la a sẽn da sorẽ la a wat n na n zɛ-la y tẽnsã. Y tẽnsa na n lebga raboodo, ned ba a ye kõn le pa b pʋgẽ ye.

⁸ Yeelg-y sũ-pa-noang futu, wilg-y y sũ-sãanga, kelem-y kʋʋre; Soaala-Wẽnd pa rat n bas-d taal ye: b sũura sɩd puuga wʋsgo.

⁹ La rẽ sã n wa beẽ - Maam n yeele, maam a Wẽnde, - dĩma meng na n basa raoodo, yẽ ne a kug-zĩidba; maan-kʋʋdba sũur na n yaalame, bãngdba na n yɛɛsame.

¹⁰ B na n yeelame: «Soaala-Wẽnde, sɩda yãmb belga buud kãnga, yãmb belga Zerizalɛɛm, n yeel-a tɩ fãa na n zemsame, tɩ sʋʋg yaool n pẽneg d kokore!»

Bɛɛba yita zĩig zãnga

¹¹ Badaare, koe-kãnga la Soaala-Wẽnd na n togs Zerizalɛɛm dãmba: «Tãmsa zut sob-tʋʋlga n wẽed m buudu la sobga yita zĩ-pɛɛlẽ. Ka sob-bil sẽn zems kood yelgr ye,

¹² Yaa sobg sẽn tar pãnga, la maam n yiis-a a sẽn yitẽ wã. Yaa marsã la m na n kao bʋʋd ne bãmba.»

*(Buudã)

¹³ Ad bɛ wã sẽn wate, a fõta wa sa-raoogo, a bilim-bilma tʋʋla wa saag sobgo, a wiidi wã tĩig yɩɩda sɩlg rẽnda. D yell sãamame, d wãa zãnga!

*(Soaala)

¹⁴ Zerizalɛɛm, f sã n dat fãagre pek f sũuri, yiis a wẽnema. F sũura na n kell n paa ne a tags wẽnsã n ta da-bʋre?

¹⁵ Kelg bʋ-raasa sẽn yit al Dã, kelg yel-beeda kibar sẽn yit Efrayim tãmsẽ.

¹⁶ Wilg-y tẽnga rãmba, wilg-y Zerizalɛɛm dãmba, wilg-y-b tɩ bɛɛba kolgdame la b yii tẽn-zãorgẽ n watẽ, la b teesa Zɩɩda n kelemd b zabr kɛlenga.

¹⁷ Wala gũudb sẽn gũbg pʋʋgo, woto me la b gũbg Zerizalɛɛm. La Soaala-Wẽnd yetame t'a tõdgra rolb la rẽnna.

¹⁸ Ad yaa Zerizalɛɛm tʋʋm kɛgã n tak yel-beedã a zugu, yaa so-wẽngã a sẽn dɩka yĩnga. Yel-beeda sẽn lʋɩ a zugã la a lemb yã; ad-a yaa tɩɩsenga la a wẽnemdeda sũuri.

A Zeremi yikda bãaga

¹⁹ Soaala-Wẽnd koɛɛga sẽn lʋɩ a tʋbrẽ a Zeremi yeelame: «Aba, m pʋga zabdame! Tooga wẽnd-a-la wa fuugu, m sũura rat n tõsgame, m yĩnga saooda kalwaare! M ka tõe n sĩnd ye: m wʋma tõntõoga bʋʋre m wʋma zabr sɩngr kaasgo.

²⁰ Yaa yel-beed woo yel-beed bal la b gomda. Tẽnga fãa paama zɛɛbo, vugr bala d pɛɛla-rota fãa rʋʋgame, sẽgda fãa siiga nif kamsg pʋgẽ.

²¹ M na n gesa tãb-kaoorã n ta da-bʋre? Da-bʋr la zabra bard na n sĩndi?

²² M buuda yaa yalma, m buuda ka mi maam ye.» Yaa Soaalã n gomde. Yaa yãas sẽn ka tar yam ye, b ka wʋmd bũmb ye. B sẽn mi la b sẽn tõe yaa wẽng maaneg bala. Sã n ya maan neerã, b ka mi la b ka tõe fɩ.

²³ Mam sulg n gesa tẽngã la a yaa vɩʋʋgo, vɩ-raoogo, la yĩngr vẽenema me kii tam.

²⁴ M le gesame, la ade, tãmsa ka le yɛs b nao zut ye, la tãn-bi wã miimdame.

²⁵ Mam gesame, la ned ba a ye ka le ket ye; yĩngr luiili fãa menemame.

²⁶ Mam gesame: tẽnga sẽn da bĩm wa zẽedã lebga zĩ-peen-daaga, tẽn bɛda fãa lebga raboodo. La rẽ yaa Soaala-Wẽnd tʋʋmde, yaa b sũ-fõora tʋʋmde.

²⁷ N-ye! Woto la Soaala-Wẽnd gomda: «Tẽnga gilli na lebga zĩ-pɛɛla, sã n ges bala f sũur sãamdame; m yaool n ka na n menes-a gill ye.

²⁸ Woto wã tẽnga na kelem kʋʋre la yĩngri, saaga na n sobame. M sẽn da yeela la m na n pidsi m daaba kõn tek ye, m kõn bars bũmb ye.»

A Siõ ne kʋʋdbã

²⁹ Kɛleng n kelme tɩ b baad bilim-bilm, tɩ b baad tãbda rãmba. Tẽnga neba fãa sɩnga zoees bala. Kẽer soonda tʋgẽ, tɩ kẽer dʋʋd pĩisi. Tẽnsa fãa lebga vɩɩdo, ned ba a ye ka le ket b pʋsẽ ye.

³⁰ La foom Zerizalɛɛm, maana a wãna tɩ f ket n yeelgd fu-neeba tɩ neba fãa nina yiig n get-fo, maana a wãn tɩ f famd f meng ne sãnem teedo, la f maneg f nini n dõos kɩrʋ? F manegda f meng zaalem: ra-sãmba ka le baood-f ye, f kũum la b baood marsã.

³¹ N-yẽe! M sẽn wʋmd marsã wã wẽnda pag sẽn kũsd rogem kũsga, wẽnda pag sẽn nan dogd a pipi biig waasgo. Koɛɛga yaa a Siõ koɛɛga, yẽ n waasd la a zẽkd a nus n yetẽ: «M yell sãamame, m lʋɩ m kʋʋdba nusẽ yeee!»