Zeremi 39 - SEBR SÕNGO

¹ Yɩ-la a Sedesiyas, Zɩɩda dĩma, naam yʋʋmd a wɛ soaba, kiuuga piig soaba la a Nabikodonozor, Babilon dĩma wa ne tãpo n gũbg Zerizalɛɛm.

² Yɩ-la a Sedesiyas naam yʋʋmd piig la ye soaba, kiuug a naas soaba, kiuuga daar a wɛ soaba la Babilon dãmba poog lal-gũbra zĩig a yembre.

³ A Nabikodonozor tãnsoaben-dãmba kẽe tẽngã la b wẽ-la b sika n pẽneg Sʋk dignoorã. Yɩ-la a Nergal-Sarezɛr, b na-kãsengã, n paas a Samgar-Nebo, a Sar-Sekim, dĩma yam sẽn da kẽ a soab n yɩɩdã la tãnsoaben-dãmba fãa.

⁴ Zɩɩda dĩm, a Sedesiyas, ne a tãb-biisa fãa sẽn yãend-ba, b zoeeme n tũ dĩma zẽedã n yi tẽngã ne yʋngo; noor n da be lals a yiib sẽn ya bɛd sʋka la be la b tũ n yi n dɩk Zʋrdẽ bãg-faaga.

⁵ Kalde rãmba tãb-biis pʋg-b lame, la b tɩ paama a Sedesiyas Zeriko sẽnẽ. B sẽn paam-a n yõke, b tall-a lame n kẽng Ribla, Amat tẽnga, Babilon dĩm a Nabikodonozor nengẽ. A Nabikodonozor kẽes-a-la bʋʋdo, n paalg-a.

⁶ Yaa be la a kɩt tɩ b kood a Sedesiyas kamba, a nifẽ. Babilon dĩma kɩtame yɛsa tɩ b kood a Zɩɩda nin-bɛda fãa.

⁷ Dẽ poore, a leo a Sedesiyas nini, n kɩt tɩ b balg-a bãnga n tall-a n loog Babilon.

⁸ Kalde rãmba ninga naaba zak bugum, la b yõoga neb a taab me roto; b wãa Zerizalɛɛm lal-gũbrã.

⁹ Gũudba tãnsoabã, a Nebuzaradã, talla neb niynsi sẽn da ket tẽngã n kẽng Babilon, n paas neb niynsi sẽn zoe-b n wa kẽ yẽ, la tʋʋm mitbã, a tall-b-la fãa n loog Babilon.

¹⁰ Sã n ya a Nebuzaradã, gũudba tãnsoaba, yẽ basa Zɩɩda neb niynsi sẽn da ya-b naong rãmba n ka tar bũmbu; dẽ pʋgẽ me, a pʋɩɩ-b-la bugsuntund pʋto, n paas pʋt a taaba.

¹¹ Sã n yaa a Zeremi, a Nabikodonozor, Babilon dĩma, kõo a Nebuzaradã, gũudba tãnsoab, noore. A yeel-a lame:

¹² «Peeg a Zeremi, ges a neere, da maan-a bũmb ye, a sẽn dat tɩ f maan bũmb ninga, bɩ f maane.»

¹³ Yaa rẽ yĩnga la gũudba tãnsoaba, a Nebuzaradã, yẽs ne a Nebusazbã, dĩma sẽn da lakd a sũur zãng n wilgd a soabã, n yẽs ne a Nergal-Sarezɛr, tãnsoaben-dãmba kãsma, n paas Babilon dĩma tãnsoaben-dãmb a taaba,

¹⁴ tɩ b tɩ yiis a Zeremi gũudba zakẽ n tɩ kɩs a Gedaliya, a Ayikam biiga la a Safã yagenga. A Gedaliya ra kõt-a-la sore t'a lebd a zakẽ. Dẽ la a Zeremi tõog n paad ne tẽnga rãmba.

Fãagr koɛɛg a Ebed-Melɛk yĩnga

¹⁵ A Zeremi sẽn da waa n nan ket n be gũudba zakẽ, Soaala-Wẽnd da goma ne-a n yeel-a:

¹⁶ «Kẽng n tɩ yeel a Ebed-Melɛk, Kus raoa tɩ dũni fãa Soaala, a Israyɛl Wẽnda, gomda woto: ‹Ade, mam sẽn da kãab tɩ m na maana tẽn-kãnga bũmb ninga na n taasame, ka na n yɩ b sũ-noog yĩng ye, na n yɩɩ b sũ-sãang yĩnga. M na n taasa kãab-beedã la ka na n le kaoos ye.

¹⁷ Daarẽ kãnga, mam na n fãaga foom, m kõ sak tɩ f lʋɩ f sẽn yɛɛsd b rãmba nugẽ ye. Yaa Soaala n gomde.

¹⁸ N-yẽe! Sɩd menga, mam na n kɩtame tɩ fo põse: b ka na n kʋ foom ne sʋʋg ye, vɩɩm n na n yi fo pʋɩɩre, tɩ bala fo pelga f pʋg ne maam. Soaala n yeele.› »