Zeremi 38 - SEBR SÕNGO

B suiida a Zeremi ko-baoorẽ

¹ Ad-y a Sefatiya, a Matã biiga, a Gedaliya, a Pasewur biiga, a Yukal, a Selemiya biiga, la a Pasewur, a Malkiya biiga, ad-y b wʋma goama a Zeremi sẽn da togsd neb niyns fãa sẽn da pɩʋʋgd-b gũudba zakẽ:

² «Ad-y Soaala-Wẽnd gomda woto: ‹Ned ninga fãa sẽn na n paa tẽn-kãnga pʋgẽ, sʋʋg n na n kʋ-a, ka rẽ bɩ kom, bɩ bã-longdem; la ned ninga sẽn na n yi-a tẽn-kãnga n tɩ kẽ Kalde rãmba, yẽ soab na n vɩɩndame, vɩɩm n na n yɩɩ yẽ pʋɩɩre.› »

³ A Zeremi ra yetame yɛsa: «Soaala-Wẽnd wilgdame tɩ b na n sak n dɩka tẽn-kãnga n bas Babilon tãb-biisa nugẽ tɩ b soog-a.»

⁴ B sẽn wʋm woto a Zeremi noorẽ, tãnsoaben-dãmba yeela a Sedesiyas: «Tõnd datame tɩ b kʋ a Zeremi, t'a sẽn gomd woto wã a woogda tãb-biisa raoodo, sẽn pa-b tẽnga pʋgẽ wã raoodo. A ka baood n na n yols neb pɛt ye, b nimbãanega la a baood n na n paase.»

⁵ Dẽ la dĩm a Sedesiyas leok woto: «Maan-y y sẽn dat ne-a, m yaa dĩm, yaa sɩda, la m ka tõe n gɩdg-y ye.»

⁶ Tãnsoaben-dãmb a naasa kɩtame tɩ b yõk a Zeremi n tɩ bas-a a Malkiya ko-baoora pʋga; a Malkiya yaa gũudba naab a ye. Ko-baoora ra bee gũudba zakẽ. B bao wĩiri n loe a Zeremi n sik-a be. Koom da ka leb n be ko-baoorẽ wã ye, a da pida ne begd bala; a Zeremi da suta begdã.

⁷ A Ebed-Melɛk, Kus neda, ra paamame tɩ dĩma lakd a sũuri n wilgd-a. Yẽ n wʋme tɩ b ninga a Zeremi ko-baoorẽ. Woto a sẽn yãend dĩma a Bẽnzame dignoorẽ,

⁸ a yi na-zakẽ wã n wa yeel dĩma:

⁹ «M naaba, nin-bãmba sẽn maan bãngda a Zeremi bũmb ningã ka neer ye, b ning-a-la ko-baoorẽ, a na n kii kom beene, tɩ bala bur ka leb n yãet tẽnga pʋgẽ ye»

¹⁰ La dĩma kõo Kus rao a Ebed-Melɛk noore: «Bao neb pis-tã tɩ b tũ foom n tɩ yiis bãngda a Zeremi ko-baoorẽ wã t'a nan ka ki ye.»

¹¹ A Ebed-Melɛk sɩd baoo neba wala dĩma sẽn kõ noorã; a kẽnga na-yiri n kẽ teeda bĩngr roogẽ n wʋk kʋds rãmba, n dɩk wĩ n loe kʋds rãmba, n sik ko-baoorẽ wã a Zeremi yĩnga.

¹² Kus rao a Ebed-Melɛk yeela a Zeremi: «Dɩk kʋds rãmba n yaag f bãgdo n ning n yaool n dɩk wĩya n bʋʋge.» A Zeremi sɩd maana boto.

¹³ B naaga taaba n tak a Zeremi n yiis ko-baoorẽ wã. Dẽ poore, a Zeremi paa gũudba zakẽ.

A Sedesiyas le sokda a Zeremi

¹⁴ Dĩm a Sedesiyas tʋmame tɩ b tɩ bool bãngd a Zeremi t'a wa sake. Dĩma da bee Soaala rooga dignoor a tãab soaba. Dĩma yeela a Zeremi: «M na n soka bũmb a yembre, la togs m sɩda, da solg-m bũmb ye!»

¹⁵ T'a Zeremi leok a Sedesiyas: «Mam sã n togs m sẽn tog n togs-y bũmb ningã, y na kɩt tɩ b kʋ maam. M sã n sagl yãmba, yãmb ka na kelg maam ye.»

¹⁶ Tɩ dĩma na n soos n kãab a Zeremi woto: «M wẽend ne Wẽnd ninga sẽn vɩ la sẽn kõt vɩɩma, m wẽend tɩ m ka na n kɩt tɩ b kʋ-f ye, la m ka na n ning foo neb niyns sẽn dat-b n kʋ fooma nugẽ ye.»

¹⁷ Dẽ la a Zeremi yeel a Sedesiyas: Ad dũni fãa Soaala, a Israyɛl Wẽnnaama koɛɛga: «Fo sã n yi n tɩ kẽ Babilon dĩma, fo na n põsa kũum, foo ne f zaka, la b ka na n yõog tẽn kãnga bugum ye.

¹⁸ La fo sã n zãgse, tẽn-kãnga na n lʋɩɩ Kalde dãmb nugẽ tɩ b yõog-a bugum; la fo menga ka na n põs ye.»

¹⁹ Dẽ la dĩm a Sedesiyas yeela a Zeremi: «Mam zoeta Zɩɩda rãmb sẽn kẽ-b Kalde rãmba dabeem. M zoeta b na n wa yõk maam n kɩs-ba tɩ b yaal maam.»

²⁰ T'a Zeremi leoke: «B ka na n kɩs-f ye, kelg Soaala-Wẽnd koɛɛga mam sẽn wilg foomã, boto bũmb kõn maan-f ye, la fo na n vɩɩndame.

²¹ La fo sã n tõdg tɩ f kõn kẽnge, ad Soaala-Wẽnd sẽn wilg maam bũmb ninga:

²² Pagb niyns fãa sẽn na n pa-b na-zakẽ wã, b na n tall-b lame n tɩ kɩs Babilon dĩma tãnsoaben-dãmba. Fo pagba mens n na n pʋd yɩɩl kãnga n la-foo: Ges belgr ninga f zo-rãmba sẽn belg foo. Yella sẽn pak fooma b ka bas-f tɩ f lʋɩ sɩda?

²³ N-yẽe! Yaa sɩda, f pagba fãa ne f kamba, b na n tall-b lame n tɩ kɩs Kalde rãmba. La fo ka na n põs-b ye, b na n suii foom bi-bees roogẽ. Sã n ya tẽn-kãnga, b na n yõog-a-la bugum!»

²⁴ Woto wã a Sedesiyas yeela a Zeremi: «Mam pa rata tɩ ned wʋm goam kãensã ye; ka boto fo na ki.

²⁵ Tãnsoaben-dãmba kãsem-dãmba na n bãngame tɩ tõnd sõsa ne taaba. Ad-b na n wa sok-f lame n bãng d sẽn gom bũmb ningã. B na n tol n kãab-f lame tɩ bũmb kõn maan-fo, fo sã n ka solg-b bũmb ye.

²⁶ Fo na n leok-b lame bala: M kosa dĩma tɩ b ra lebs-ma a Zonatã zakẽ ye, tɩ m sã n leb be m na n kiime.»

²⁷ Tãnsoaben-dãmba kãsem-dãmba sɩd waa a Zeremi nengẽ n sok-a. La a Zeremi leoka wala dĩma sẽn da yeel yẽ t'a leok bũmb ningã. B sẽn wʋm woto, b bas-a-la ne laafi, la b ka bãng dĩma ne a Zeremi sõasgã sẽn yɩ a soab ye.

²⁸ A Zeremi kell n paa gũudba zakẽ n ta wakat ninga b sẽn wa n tõog Zerizalɛɛm. Ad yɛl niyns sẽn maane, Zerizalɛɛm lʋɩɩsa wakato.