Zeremi 36 - SEBR SÕNGO

A Zeremi namsgo

¹ A Zoakim yaa Zɩɩda rĩm, a Zoziyas biiga. A naama yʋʋmd a naas soaba, Soaala goma ne a Zeremi woto:

² «Dɩk sebre, la f gʋls sebrã zugu goam niyns fãa mam sẽn togs foo, a Israyɛl, a Zɩɩda, la bu-zẽmba tẽnsa fãa poorẽ, sẽn sɩng wakat ning mam sẽn gom ne foom, a Zoziyas zamaanẽ, n tãag rũnna.

³ Daar ninga Zɩɩda rãmb na wʋm sɩbgr ninga mam sẽn dat n sɩbg bãmbã, n bas so-wẽng ninga bãmb sẽn dɩkã. Tɩ sã n ya boto, mam na tõog n kõ b yel-wẽna sugri, la m bas b tʋʋm wẽnsã taale.»

⁴ A Zeremi boola a Barʋk, a Neriya, biiga, n kɩt t'a gʋls sebr zugu goam niyns fãa Soaala sẽn da togs yẽ wã. A Zeremi n da gomda t'a Barʋk gʋlsdẽ.

⁵ A Zeremi kõ-la a Barʋk no-kãnga: «B ka le sakd tɩ mam kẽ Soaala roogẽ ye. Dɩlla m pa tõe n ta be m toor ye.

⁶ Sã n ya foo, ad-f na n kẽnga be, no-loeera raare la f na tɩ zẽk f koɛɛga n karem Soaala koees niyns m sẽn kɩt tɩ f gʋlsã. Fo na n karma sebrã Zɩɩda rãmb fãa taoore.

⁷ Daar ninga, b na sɩng n kos Soaala tɩ b bas-ba. Daare bãmb me na yaa n bas b vɩɩm yoogã. Soaala pa solg-ba tɩ b sũura puuga wʋsg ne b buuda ye.»

⁸ A Barʋk, a Neriya biiga, tũu neer-neere, bãngd a Zeremi sẽn da kõ yẽ noor ningã: la a karma Soaala goama fãa sẽn gʋls sebra zugã, Soaala roogẽ. A zẽka a koɛɛg tɩ neb tõog n wʋme.

⁹ Yɛl kãensa maana Zɩɩda dĩm a Zoakim, a Zoziyas biiga, wakatẽ, a naam yʋʋmd a nu soaba, kiuug a wɛ soaba. B ra boola Zerizalɛɛm dãmb fãa, la Zɩɩda tẽns neba fãa tɩ b na n maan no-loeer Soaala taoore.

¹⁰ Wẽnd dooga pʋga, sẽn da tigim-ba fãa taoore, a Barʋk zẽka a koɛɛg n karem a Zeremi sẽn da kɩt tɩ b gʋls sebra zugã. A ra be-la a Gemariya zãongẽ. Yẽ yaa a Safã biiga, sẽn yɩ dĩma sɛba gɛta. Zãonga ra bee wẽnd dooga sɩmandẽ, No-paala sɛɛga.

¹¹ A Mika, a Gemariya biiga, a Safã yagenga, sẽn kelg Soaala-Wẽnd goama sẽn gʋls sebra pʋgã,

¹² a Mika siga dĩma zakẽ, n tɩ kẽ sɛb-gʋlsda roogẽ. Beene la kug-zĩidba fãa ra tigim n yẽsd b yẽsgo. Bãmb la woto: Sɛba gɛta kãsma, a Elisama, a Delaya, a Semaya biiga, a Elnatã, a Akbor biiga, a Gemariya, a Safã biiga, a Sidekiya, a Ananiya biiga, n paas kug-zĩidba a taaba.

¹³ A Mika wilg-b-la goam niyns fãa yẽ sẽn wʋm a Barʋk sẽn togs nebã, sẽn gʋls sebra zugã.

¹⁴ Dẽ poore kug-zĩidba seda ne taaba, n tʋm a Barʋk nengẽ, a Yewudi, a Netaniya biiga, a Selemiya yagenga, la a Kusi yagen-tʋbra-kẽega. A tɩ yeel-a lame t'a wa ne sebr ninga a sẽn karem neba taoorã.

¹⁵ A Barʋk sẽn wa, b yeel-a lame: «Zĩnd n karem tõnd sebrã.»

¹⁶ B sẽn kelg sebra karengo n sɛ, dabeem kẽ-b-la wʋsg-wʋsgo tɩ b wẽneg n get taaba, la b yeela a Barʋk: «D na n togsa dĩma tõnd sẽn wʋma fãa.»

¹⁷ B yeela a Barʋk: «Wilg fo sẽn yɩ to-to n gʋls goam kãensa fãa.»

¹⁸ T'a Barʋk leok-ba: «Yaa a Zeremi n da gomda tɩ mam gʋlsd sebra zugu ne rʋba.»

¹⁹ La kug-zĩidba yeel a Barʋk: «Yik n zoe n tɩ solge, foom ne a Zeremi fãa; tɩ ned da bãng yãmb sẽn beẽ ye.»

²⁰ B bĩnga sebrã sɛb-gʋlsda, a Elisama, doogẽ, n yik n kẽng dĩma nengẽ, na-zakẽ. B sẽn ta, b togsa dĩma bãmb sẽn wʋma fãa.

²¹ Tɩ dĩma tʋma a Yewudi t'a tɩ rɩk sebrã n wa; a Yewudi kẽngame n tɩ wa ne sebrã la a zẽka a koɛɛg n karem-a dĩma la kug-zĩidba sẽn da zĩ n yeg-a wã taoore.

²² Da yaa yʋʋmda kiuug a wɛ soaba tɩ dĩma ra be roog ning a sẽn kẽed waood wakato, n da tugl bugum a pʋgẽ n zĩi n wootẽ.

²³ A Yewudi sã n paam n karem sebra rũnus a wãna, dĩma wãagda a sẽn karma, ne sʋ-bila, n dɩk n lob bugmẽ. A maana woto tɩ sebra wa sɛ zãnga.

²⁴ La dĩma ne a kug-zĩidba sẽn wʋm gom-kãensã, b ka yɛɛs ye la b ka kẽes b fut ye, ba a ye.

²⁵ A Elnatã, a Delaya la a Gemariya da yaool n yõka dĩma sɛɛga t'a da yõog sebra bugum ye, la dĩma ka kelg b goama ye.

²⁶ N yɩɩd rẽ, a kõo gũudba naab a Yerameyɛl noore, n paas a Seraya, a Azriyɛl biiga, la a Selemiya, a Abdeyɛl biiga, tɩ b yõk sɛb-gʋlsda, a Barʋk, la bãngda a Zeremi. La Soaala-Wẽnd solg-b lame.

²⁷ Dĩma sẽn waa n yõog sebr ninga a Barʋk sẽn da gʋls a Zeremi koeesã, Soaala goma ne a Zeremi n yeel-a:

²⁸ «Bao sebr a to, n leb n gʋls a zugu goam niyns fãa sẽn da gʋls pipi sebra pʋgã, sebr ninga dĩm a Zoakim sẽn yõogã.

²⁹ Dẽ poore fo na yeel woto a Zoakim, Zɩɩda dĩma poorẽ: ‹Soaala-Wẽnd kõ-la a Zeremi koɛɛg la yẽ gʋlsame n wilg tɩ Babilon dĩma na n sɩd wa wãa tẽngã n kʋ rũmsa la ninsaalbã la Zoakim zaba ne-a n deeg sebrã n yõog bugum.

³⁰ Yaa rẽ yĩnga la Soaala-Wẽnd gomd woto Zɩɩda dĩm a Zoakim poore: A Zoakim kõn paam ned a to yɛs sẽn na n zaond a Daviid naama goeel zug ye, la a sã n ki b na n dɩka a yĩnga n bas wĩntoog tʋʋlmẽ la yʋng waoodẽ.

³¹ Mam na n yika ne yẽ menga, ne a buudu, a tãnsoaben-dãmba la m na sɩbg-ba, b tʋʋm yooda yĩnga. M na n kɩtame tɩ lʋɩ bãmb zugu, Zerizalɛɛm dãmba zugu, Zɩɩda soolma fãa zugu, yel-beed ning sẽn da gʋls sebra pʋgã. M yeel-b lame tɩ b maan gũusgu la b pa ges rẽ wa bũmb sẽn sek kelgr ye.› »

³² A Zeremi bao sebr a to n kɩs sɛb-gʋlsda a Barʋk, a Neriya biiga. A Barʋk gʋlsa seb-kãng zugu a Zeremi sẽn da yet t'a gʋlse. A gʋlsa goam niyns fãa sẽn da gʋls pipi sebra zugã, sebr ning Zɩɩda dĩma a Zoakim sẽn deeg n yõogã. Goama wʋsg ra wẽnda pipi rãmbã.