Zeremi 33 - SEBR SÕNGO

Kãab nood a taaba

¹ A Zeremi da ket n zĩi ne bãeense gũudba zakẽ; Soaala le goma ne-a n yetẽ:

² «Woto la sẽn naana tẽnga, n kõ-a nenga la keglma, woto la sẽn boond a soab tɩ Soaala gomda:

³ ‹Bool maam tɩ m na leok-fo; mam na n togs-f-la yell kãsens sẽn solge tɩ f ka mi baa fɩ.

⁴ Ade, maam a Israyɛl Wẽnda tara koɛɛg n na n wilg-fu tẽng kãnga roto la Zɩɩda dĩm dãmba rot poorẽ. Fãa lebga raboogo.

⁵ Yaa zaalem la b na n mak n gɩdg wãaba sẽn segendã, n gɩdg Babilon dãmbã. Dẽ na n wa pidsa tẽnga bal ne kũum. M sũura yika ne Zerizalɛɛm dãmba. B wẽnema sẽn ya wʋsg yĩnga mam me maana wa m toog ka le be ne-b ye.

⁶ Ad-m sẽn le yik n wat n na n tɩp-ba wala b sẽn tɩpd ned sẽn paam sãmpogre. B na n sãoogame, b na n le paama laafi, m na n kɩtame tɩ tẽnga le zĩnd laafi la a tɩlg rabeem buud fãa.

⁷ Mam na n teka a Zɩɩda la a Israyɛl vɩɩma, m na n le yals-b-la b pĩnd zĩigẽ.

⁸ M basa b beegra taale, m kõ-b-la b sẽn welg ne maama sugri.

⁹ Dẽ marsã la m sũur na n yɩ noogo m sã n pʋt Zerizalɛɛm yʋʋre, a na n lebga m zu-zẽkre la m faongo ãndũni rãmba fãa taoore. B sã n wa bãng m sẽn segend n na n kõ-b kũun niynsã, b na n diga rabeem, b na n yɛɛsa b sẽn na n gale ne sũ-noog la arzɛk ningã.› »

¹⁰ Woto la Soaala gomda: Zɩɩda rãmba, yãmb saad n pordame tɩ b wʋka y tẽnga laog fãa n looge, ned ka kete, rũng ka kete. Yaa sɩda, Zɩɩda tẽnse la Zerizalɛɛm soya lebga vɩɩdo, nin-vɩɩg ka kete, ninsaal bɩ rũnga. Bãng-y tɩ tẽn-kãens pʋgẽ b na n le wʋma

¹¹ sũ-noog kaasgo, kibs rãmb bʋʋre. B na n le wʋma kãad-paals yɩɩla, b na le wʋm tɩ b yɩɩnd yɩɩll kãnga: Dũni fãa Wẽnd paam pẽgre! B pida ne bʋgsem la b nonglma ka be sɛɛb ye. B na n le wʋma yɩɩla, neb niyns sẽn wat wẽnd doogẽ ne b maanda yɩɩla. Yaa Soaala-Wẽnd n gomd tɩ b na n le tall-b lame n wa b pĩnd zĩigẽ.

¹² Woto la dũni fãa Wẽnd gomda: Tẽn-kãnga sẽn sãama pʋgẽ tɩ ned bɩ rũng ka le ketẽ, tẽns a taaba pʋgẽ, vɩʋʋg na n le yãenda rũn-kɩɩmba yĩnga, rũn-kɩɩm niyns sẽn gũud-b bʋʋsa la piisa yʋngã.

¹³ Tãnga zugu, bãoogẽ, Negɛb, Bẽnzame tẽnsẽ, Zerizalɛɛm, la Zɩɩda tẽnsẽ, rũn-kɩɩmba na n le leglame la b sõd b bʋʋs la b piisi. Soaala n gomde.

Soaala ka na n lebs b noor ye

¹⁴ Soaala n gomde: «Ade daar n wate, la a zoe n pẽnegame tɩ sũ-noog kãabgo mam sẽn kãab Israyɛl roog ne Zɩɩda roogo na n taase.

¹⁵ Wakat kãnga mam na n yiisa a Daviid yagenga. A na n dɩɩ naam ne zemsgo tẽn-kãnga pʋgẽ.

¹⁶ Dasem kãense, Zɩɩda na n paama fãagre, Zerizalɛɛm na n zĩnda ne laafi. Ad yʋʋr ninga b sẽn na n bool tẽngã: Soaala-Wẽnd la d bʋ-kaooda.»

¹⁷ Ad Soaala koɛɛg a to: A Daviid kõn kong yagenga sẽn na n dɩ naam Israyɛl zug abada.

¹⁸ Boto me a Levi buudẽ wã maan-kʋʋd kõn konge abada sẽn na n yaas m taoore n kʋ, beoog-beoog fãa, yũ-noog maoongo, laafi maoongo la a yõog wisdu ye.

¹⁹ La Soaala le goma ne a Zeremi:

²⁰ «Maam, Naaba-Wẽnde n sokde: Yãmb tõe n teema noor ning m sẽn kõ daare la yʋnga bɩ, y tõeeme tɩ bũmb viig bɩ? M pa tẽed ye!

²¹ Bɩ y bãng tɩ zood ning m sẽn yõg ne m sõgna a Daviid kõn kao ye. Ned kõn tõog t'a Daviid yageng ka rɩ naam Zerizalɛɛm ye. Ned me kõn tõog t'a Levi yageng ka yals m taoore n tʋm maan-kʋʋr tʋʋmd ye.

²² M na n kɩtame tɩ m sõgna a Daviid yagensa yɩ wʋsgo, n kɩt t'a Levi yagens yɩ wʋsgo. B sõora ka na n tõog n sõde, wa ãds sẽn be yĩngri, wa bĩisri sẽn sam mogr noore.»

²³ Soaala-Wẽnd goma woto yɛs ne a Zeremi:

²⁴ «F ka kelgd neba sẽn yete? B gomdame tɩ m basa a Israyɛl ne a Zɩɩda: buud a yiibã, m sẽn da tũusã. Ad-y sẽn gomd-b woto wã ka le get m neba wa buud sẽn zem bũmb ye. B sãbsd-a lame.

²⁵ Ad-m sẽn yete: M wilga wĩndg la yʋngo m daab sẽn yaa a soaba, m yalsa m noya yĩngr la tẽng yĩnga.

²⁶ Dɩlla ned tõe n deegame tɩ m basa m sõgna a Daviid yagense, n zãgs tɩ m kõn tũus bãmb sʋka ned ninga sẽn na n dɩ naam a Abraam, a Izaak la a Zakoob buuda zug bɩ? M sũura pida ne nonglem bãmb yĩnga la m na sɛɛsa b yembdo.»