Zeremi 3 - SEBR SÕNGO

A Israyɛl ka rat n tedg zʋg ye

¹ Soaala-Wẽnd goma ne maam n yeel: «Ned sã n dig a paga, tɩ paga yi n tɩ rɩk sɩd a to, sɩda tõe n le reeg-a-la a nengẽ bɩ? Ka tõe ye, ka rẽ, yaa tẽngã n dẽgemde. La foo, Israyɛl, yaa Soaala-Wẽnd n gomde, fo saka yoob ne neb wʋsgo, n ket n dat tɩ m le reeg-fo. M sok n ges na tõoge?

² Zẽk f neng n tees tãmsã la ges yaa tãn-bʋg zugu la f ka yaale. Wala we-raoogẽ fãada, sẽn soos n gũud so-loaada woto me fo ra zĩi soya noore n gũud f ra-sãmba. Fo rẽgma tẽnga ne f yoodem la f tʋʋm wẽna.

³ Yaa rẽ yĩng la m mong-f saaga n mong-f sa-yaoose, la f zãgsame n kell n tar yoobo, n zãgs tɩ f kõn deeg f kongr ye.

⁴ Ne rẽ fãa fo saagd n gomda m yelle, n yetẽ: ‹M ba wã, m yãadmẽ zoa wã,

⁵ na n dɩɩ beem ne-m daar fãa laa?› N-ye! Yaa woto la f gomda n yaool n ka basd f wẽnema ye, la sã n ya wẽnem, f sɩd tõe ne wẽnem.»

A long rõaag long sɩɩga

⁶ Soaala-Wẽnd yeela maam, naab a Zoziyas zamaanẽ: «Fo yãenda a Israyɛl, a long rõaag long sɩɩga, sẽn maana bɩ? A saa n yoo tãn-bɛda fãa zutu la tɩɩg fãa sẽn tob tẽngre.

⁷ Tɩ mam da tagsdẽ t'a sã n maan woto fãa n sɛ, a na lebg n wa mam nengẽ. La a ka lɛɛg n wa ye. A Zɩɩda, a Yi-saada, a yao wẽnga yãee rẽ.

⁸ A yãeeme tɩ m da kɩsa a Israyɛl, a long rõaag long sɩɩga, kãadma kaoob sebre, tɩ m da yiis-a lame, a yeebga yĩnga. Mik a yao, a Zɩɩda, mik a Yi-saad, ka zoe rabeem ye; yẽ me saame n yo.

⁹ Yẽ me saame n yo ne wẽn-naandse, sẽn pees ne raoog bɩ kugri. A rẽgma tẽngã.

¹⁰ A Zɩɩda, a Yi-saada, ne a long rõaag long sɩɩga, a Israyɛl tão wã, ka le lɛɛg n wa kẽ maam ye, a ka lɛɛg n wa ne a sũur fãa ye, a noor bal n yaag n togse. Yaa maam a Wẽnde n yeele.»

¹¹ La Soaala-Wẽnd yeela maam: «A Israyɛl, a long rõaag long sɩɩga, maanda wala a be-la a sɩd zugu, sã n mak-a ne a Yi-saada, a Zɩɩda.

¹² Bɩ f tees goabga sẽnẽ n tãs woto: ‹Israyɛl, long rõaag long sɩɩga lɛɛg n wa tɩ m ka rat-f ne wẽnga la m kõn gãnem m neng ye. M ka mi beem tugb ye, Soaalã n yeele.

¹³ Fo we n sak n deeg f kongre, n deeg tɩ f zaba ne Soaala-Wẽnde, n deeg tɩ f saa zĩis fãa n pʋg wẽn-sãamse, tãmsa zutu la tɩɩg sẽn tob tẽngre; fo ka kelg mam koɛɛg ye. Maam n yeele, maam a Wẽnde.›

Zɩɩda kamb lebgre

¹⁴ Lebg-y n wa-y yã, tõatba. Maam n yeele, maam, Naaba-Wẽnde, maam la Soaala. M na n yãka nin-yend tẽng a ye pʋgẽ, n yãk neba a yiib buuda a ye pʋgẽ, n tall-ba n wa Siõ.

¹⁵ M na n kõ-y-la pe-kɩɩmba sẽn tat m daabo, tɩ b kɩɩm yã, ne yam la gũusgu.

¹⁶ Wakat ning sẽn watã, Soaala n gomde, y na n doga kamba n lebg bu-yalengo. Wẽnd zooda kaset sẽn pag koglgo ninga pʋgã, y kõn le sok a yell ye. Ned ba a ye kõn le tẽeg a yelle ye. B na n yĩma a yelle, b kõn le bao a zĩig ye, b kõn le maan a taar ye.

¹⁷ Wakat kãng b na n boola Zerizalɛɛm tɩ Soaala-Wẽnd naam zaoore. Ninsaalb buud fãa na n tigma taab be, m waoogr yĩnga. B sẽn da keng b sũuri n tũud sor ningã, wẽnem la yalemd sorã, b kõn le rɩk so-kãng ye.

¹⁸ Wakat kãnga, a Zɩɩda tẽn-peelma neba la a Israyɛl tẽn-peelma neba na n tɩ fãooga taaba. B fãa na n yii nug goabg sẽnẽ n lɛɛg n wa tẽng ning m sẽn dɩk n kõ b yaab rãmba wala b toorẽ pʋɩɩre.»

Buuda na lɛɛg n wa kẽe Wẽnde *(Soaala Wẽnde)

¹⁹ M da yeta m memga: M da nongẽ lame tɩ f lebgẽ m bi-kẽenga, tɩ m kõ-f tẽng sẽn ya f raab tẽnga, tẽng noom sẽn ka taar dũni wã pʋgẽ! M da tagsdame: Fo na n boola maam tɩ f Ba, la f kõn le bas mam pʋgb ye.

²⁰ La ayo, yãmb ka pʋg-m ye, Israyɛl kamba, y zãmba maam wa pag sẽn zãmbd a sɩda. Yaa Soaalã, yaa mam menga n togsd boto.

²¹ Kɛleng n kelem tãmsa zutu. Yaa Israyɛl kamb n yãbd la b kũmdẽ, yaa b sẽn tudg sora yĩnga, ya b sẽn yĩm mam yelle, b sẽn yĩm maam b Soaala yelle.

²² Lebg-y n wa-y yã, wa-y n pʋg maam, bi-beese, m na sãoog y tʋb-pa-wʋmdma. Ade, tõnd wata y nengẽ, tɩ yaa yãmb bala, Soaala, la tõnd Wẽnde.

*(Buudã)

²³ Sɩda, tõnd basame tɩ b belg-do ne d sẽn da waoogd b rãmb kunkuba zutã, ne kaasg ning sẽn da kaasd tãmsa zutã. Yaa d Soaala-Wẽnd nengẽ bala la a Israyɛl tõe n paam fãagre.

²⁴ D bãnga al d yãadmẽ tɩ d saka yãnde n waoog wẽn-naand a Baal la rẽ n sɛɛsd d yaab rãmba paoongo, rẽ n sɛɛs b rũmsi, bɛd la bõonese, b kom-dibli la b kom-pugli.

²⁵ Bɩ d sak n dɩ yãnde la paoore, tɩ tõnd n beeg d Soaala la d Wẽnde, tõndo, wala d ba rãmba, al d yãadmẽ n tãag rũnna. Wẽnnaam d Soaala sẽn da togs-d bũmb ningã, d pa reeg ye.