Zeremi 29 - SEBR SÕNGO

Pa-wet sebre

¹ Bãngd a Zeremi zĩnda Zerizalɛɛm n tool sebre a Nabikodonozor sẽn da peeg b rãmb n kẽng Babilon tẽnga. A gʋlsa dĩma sagendbã, maan-kʋʋdbã, bãngdbã la pa-weta fãa.

² Sebra gʋlsa dĩm a Yekoniya sẽn waa n yi Zerizalɛɛm, yẽnda ne a ma, ne kug-zĩidba, ne sagendba, ne Zerizalɛɛm la Zɩɩda taoor dãmba, ne tʋʋm mitba la sẽn manegdb kʋɩlensa pagdsã.

³ Segame tɩ Zɩɩda dĩm a Sedesiyas da tʋma a Elasa, a Safã biiga, a Gemariya, a Ilkiya biiga, tɩ b kẽng Babilon, a Nabikodonozor nengẽ. Bãmb la a Zeremi kɩs sebrã la ad bũmb ning sẽn da be a pʋgẽ:

⁴ «Woto yaa dũni fãa Wẽnd, a Israyɛl Wẽnnaama, koɛɛga ne neb niyns fãa sẽn yi Zerizalɛɛm n digd Babilon:

⁵ Mee-y roto n kẽ be; tu-y bãado, n sel tɩɩse tɩ b wome, tɩ y rɩ b biisi;

⁶ bao-y pagba n maan kãadem, n dog kamba, kom-dibli la kom-pugli; y kom-dibli wã paam pagba, y kom-pugli wã paam sɩdba, tɩ bãmb me rog b kamba. Modg-y tɩ y sõor paase, da sak-y t'a woog ye!

⁷ Modg-y tɩ b sẽn kẽes-y tẽng ninga lebg tẽng sẽn gãe ne laogo, pʋʋs-y tẽn-kãng yĩnga tɩ tẽnga manegre yaa yãmb manegre.

⁸ Dũni fãa Wẽnd, a Israyɛl Wẽnnaama, wilgd-y lame tɩ y maan gũusgu. Da bas-y tɩ bãngdb niyns sẽn be-b ne yãmba tudg-y ye. Da bas-y tɩ sẽn gomd-b tɩ b nee beoog yɛla tudg-y ye. Da kelg-y wa bũmb sẽn be yõodo, neb niyns sẽn wilgd yãmb y zãmsd võor ye.

⁹ Bala b yetame tɩ b sẽn gomdã yaa maam, Naaba-Wẽnd n tʋm-ba la yaa zirẽ. Bãng-y tɩ mam ka tʋm-b ye. Yaa Soaala n gomde.

¹⁰ Soaala le yetame tɩ yʋʋm pisopoe sã n ta, b na waa n ges yãmba, la b na n pidsa b sũ-noog kãabgo, bãmb sẽn da kãab yãmba: b na n le tall-y lame n wa y tẽngẽ.

¹¹ Mam, Naaba-Wẽnde, mam mii m sẽn dat bũmb ning y yĩnga. Yaa laafi la m data, ka sũ-sãang ye, m sẽn dat yaa y yell yɩ neer beoogo.

¹² Yãmb sã n wa bool-ma, n wa pʋʋs-ma, m na kelg-y.

¹³ Y sã n wẽnemd y neng n tees-ma, y na le yãend-ma sã n sɩd yaa ne y sũur fãa la y baood maam.

¹⁴ M na sak n wa zĩnd yãmb sʋka. Yaa Soaala n gomde. Y sã n bao maam ne y sũur fãa, m na lik m menga. M na tedg y vɩɩma; y sẽn sẽeg n be zĩis niyns fãa bu-zẽmba tẽnsẽ, m na le tɩ tall-y n wa. M na n tigim-y lame n le wa kẽes ka, tɩ ka la m da rig-y n yiisi.

¹⁵ Soaala togsd-y-la woto fãa tɩ y sẽn be y pa-weera tẽngẽ, Babilon tẽnga, y yetame tɩ Soaala kõ-y-la bãngdb be.

¹⁶ Ad Soaala sẽn leokd bũmb ning dĩma poorẽ, sẽn da rɩt-a a Daviid naama poorẽ, la neb niyns fãa sẽn kell-b Zerizalɛɛm poorẽ, y saam-biis niyns sẽn ka tũ-b yãmb n loogã,

¹⁷ Sɩd yaa dũni fãa Soaala n gomde: Bũmb a tãab n na n zab ne bãmba: zabre, kom la bã-longdem. B sẽn na n lebg bũmb ninga na kɩt tɩ b tags tɩ b lebga wa kankam sẽn põoge, tɩ ned ka le rat ye.

¹⁸ Mam na n pʋg-b-la ne sʋʋga, ne kom la ne bã-longdem. Woto neb niyns fãa sẽn na n yãend-ba, na yɛɛse, dũni wã tõre na yɛɛse. M sẽn na n sẽeg-ba n kẽes tẽng ning fãa, b na tees bãmba wala f sẽn dat n kãab f bɛ t'a lebg a soaba, bɩ wala f sã n dat n gom yel-beed yelle, bɩ bũmb sẽn kẽesd rabeem wʋsgo yelle, bɩ bũmb sẽn ya yãnd wʋsgo yelle.

¹⁹ Dẽ fãa yaa b sẽn ka kelg mam goama yĩnga, maam, Naaba-Wẽnd, sẽn togs-bã. M yaool n tʋma m bãngdba bãmb nengẽ wakat buud fãa, la ade, b pa kelg-b ye.

²⁰ La sã n ya yãmba, pa-weto, m sẽn yiis b rãmb Zerizalɛɛm n tɩ kẽes Babilon, yãmb yee n kelg maam!

²¹ Dũni fãa Soaala, a Israyɛl Wẽnnaam gomda woto, a Kolaya biiga, a Aab, poorẽ, ne a Maaseya biig, a Sidekiya, poorẽ, bãmb sẽn ka bãngdba n yaool n gomd mam yʋʋr yĩnga wa yaa maam n tʋm-ba: m na n bas-b-la Babilon dĩma, a Nabikodonozor, nugẽ, la yẽ na n kood-b-la yãmb taoore.

²² Zɩɩda rãmb sẽn lebg Babilon pa-weto na pʋta bãmb yʋʋre, dũnna tɛka, b sã n wa rat n kãab ned beedo. B na n yeela woto: Bɩ Soaala maan ne foo wa b sẽn maan ne a Sidekiya la Aab, Babilon dĩma sẽn kɩt tɩ b kɩɩm bugmẽ!

²³ La yell a woto sẽn na n pak neb a yiibã, ka bũmb a to n zʋʋg b sẽn ya ra-taase, bũmb sẽn kis wa fãa-fãa Israyɛl tẽn-peelmẽ. B yoome n ket n yet tɩ yaa mam yʋʋr yĩng la b gomda la m yaool n pa kõ-b noor ye. M mi b sẽn maana fãa, m nif yãenda fãa.» — Soaala n gomda.

A Semaya sebre

²⁴ Dũni fãa Soaala, a Israyɛl Wẽnde, tʋma a Zeremi ne b koɛɛg, Neelam dao a Semaya nengẽ.

²⁵ Bãng-y tɩ Neelam dao a Semaya da gʋlsa sebr a toore n tool maan-kʋʋd, a Sefaniya, a Maaseya biiga, la maan-kʋʋds a taaba la neb niyns sẽn pa-b Zerizalɛɛma fãa. A ra gʋlsa woto:

²⁶ «Soaala-Wẽnd sẽn kɩt tɩ fo lebg maan-kʋʋda, a Yeoyada zĩigẽ la f gũd wẽnd doogã, foo n tog n gũus ne neb niyns fãa sẽn yet tɩ b yaa bãngdba la f yõg-ba n pid b yubl ne kutu la f loe-b ne yãndo.

²⁷ Maana a wãn marsã tɩ Anatot rao, a Zeremi, gomd yãmb fãa taoore n yet t'a yaa bãngda tɩ fo ka maan-a bũmbu?

²⁸ Yella fãa bee fo zugu, tɩ foo n bas-a la a tõog n tool tõnd sebr Babilon ka, n tol n yetẽ tɩ d na n kaoosa ka la d me roto ka n kẽ, la d maan zẽedo n dɩlg d memse ne d kooda biisi.»

²⁹ Maan-kʋʋd a Sefaniya karma a Semaya sebrã bãngd a Zeremi taoore,

³⁰ la Soaala-Wẽnd kõ-la a Zeremi noor kãnga:

³¹ «Taas yemsã fãa koe-kãnga: ‹Woto la Soaala gomd a Semaya, Neelam raoa, poorẽ: A Semaya sẽn gom ne yãmb wa bãngda yĩnga, tɩ mam yaool n ka tʋm-a wã, la a kɩtame tɩ yãmb tẽ zirẽ goama,

³² woto wã, maam, Naaba-Wẽnde, mam na n sɩbga a Semaya, Neelam neda, ne a poorẽ dãmba fãa. Yẽ ned ba ye menga kõn zĩnd yãmb sʋka n yãend sũ-noog ninga mam sẽn na n kõ m nebã. Tɩ bala a sagla m neba tɩ b tõdg Soaala. Soaala-Wẽnd n gomde!› »