Zeremi 28 - SEBR SÕNGO

A Zeremi ne a Ananiya

¹ Yʋʋmd n zĩndi, yɩ-la a Sedesiyas, Zɩɩda dĩma, naam deegr yʋʋmd a naas soaba, yʋʋmda kiuug a nu soaba. Dẽ wakato la a Ananiya sẽn ya bãngda la sẽn ya Gabaõ rao, a Azur biiga, ra be wẽnd dooga pʋga n gomda. A goma a Zeremi taoore, maan-kʋʋdba taoore, la sẽn da tigim-b be wã fãa taoore la a yeel-a-la woto:

² «Soaala-Wẽnde, dũni fãa Soaala la Israyɛl Wẽnnaama tɩ m wilg-fu: M na n deega Babilon dĩma naam wa b sẽn kaoogd raoog ning sẽn palgd na-koaadg yubla.

³ Keta yʋʋm a yiib muka tɩ m kɩt tɩ b le wa ne zĩ-kãnga, wẽnd dooga teedo la teed a taabã Babilon dĩm, a Nabikodonozor, sẽn wʋk n loog a tẽngẽ wã.

⁴ N paas me, m na n kɩtame t'a Yekoniya, a Zoakim biiga, Zɩɩda dĩma lɛɛg n wa, yẽnda ne a neba sẽn da be Babilon. Wẽnd n gome. N-ye! M na n deega Babilon naama, m na n paag-a-la y zugẽ wa b sẽn paagd raoog nag-koaadg yublẽ.»

⁵ Bãngd a Zeremi leoka bãngd a Ananiya, ne maan-kʋʋdba la neba sẽn da be wẽnd dooga pʋga:

⁶ «Amina! Wẽnd na kɩt tɩ yɩ boto! D data ne d sũur fãa tɩ Soaala-Wẽnd goama pidsi. Wẽnd na kɩt tɩ goam niyns fo sẽn togsã, taase! Tɩ b kɩt tɩ wẽnd dooga teed fãa, ne yemsa sẽn be Babilon, le lɛɛg n wa zĩ-kãnga!

⁷ La koɛɛg n be tɩ m na n togs fo: Kelg neere goam niynsi mam sẽn na n togs foo ne neba fãa sẽn be ka wã.

⁸ Bãngdba sẽn deng tõnd taoore, maam ne foom taoore, al daar zãra, b wɩng n goma zabre, la yel-beedo, la bã-longdem yelle, sẽn na n zĩnd tẽns wʋsg pʋgẽ, la rĩund wʋsg pʋgẽ.

⁹ Bãngd ninga sẽn gomda laafi yelle marsã, ad-y yaa a sẽn togsã sã n sɩd taase, la b bãngda tɩ sɩd-sɩda, a ya bãngd akɩka, Soaala-Wẽnd sẽn tʋme.»

¹⁰ Dẽ marsã la bãngd a Ananiya yãk daoogã sẽn da palg bãngd a Zeremi yublã la a kaoog-a lame.

¹¹ La a Ananiya yaool n yeela neba: «Ad Soaala koɛɛga: ‹Ka ne yʋʋm a yi muka, maam, Naaba-Wẽnd, na n kao gɩrse Babilon dĩma a Nabikodonozor naama wa nag-koodsa raoog sẽn kao y nifẽ wã. A da rɩka a naama n zɩsg ãndũni rãmba wa raoog sẽn palg nag-koaadg yubla.› » Dẽ poore, bãngd a Zeremi loogame.

¹² Bãngd a Ananiya sẽn wa n kaoog raoogã sẽn da palg bãngd a Zeremi bãgdã, Soaala-Wẽnd kõ a Zeremi no-kãnga:

¹³ «Kẽng n tɩ yeel a Ananiya, tɩ Soaala-Wẽnd koɛɛg la woto: ‹Fo sẽn kaoog raoogã a Zeremi sẽn da palg a bãgdã, ad yaa kut dẽnda la f na n ledge.› »

¹⁴ A Zeremi paasame: «Kelg-y dũni fãa Wẽnde, a Israyɛl Wẽnnaam, sẽn togsde: ‹Dĩm niyns fãa sẽn gũbg Zɩɩda tẽn-peelma, wilg-b tɩ yaa kut zɩsgo la m na n palg b bãgdo; b na n lebga Babilon dĩm, a Nabikodonozor, soolem. Ba we-rũmsa meng na yɩ-la a soolem.› »

¹⁵ La bãngd a Zeremi le yeela bãngd a Ananiya: «Ananiya, kelg neere: Gese, ad Soaala-Wẽnd ka tʋm foom ye, la fo yaool n kɩtame tɩ neba tẽ f zirẽ-be-goama.

¹⁶ Dẽ n so tɩ Soaala wilgd-fo tɩ b na n menes-f-la tẽn-kãngã. Fo na n kiime, yʋʋm paalga ka na n vẽk-f ye, tɩ fo tusa neb tɩ b tõdg Soaalã.»

¹⁷ Yʋʋmda kiuug a yopoe soaba pʋgẽ bala bãngda a Ananiya sɩd kiime.