Zeremi 27 - SEBR SÕNGO

Soog-m-meng sɛɛbo

¹ A Zoziyas biig a Sedesiyas waa m lebga Zɩɩda dĩma la ka yãend n kaoos tɩ Soaala-Wẽnd taas gomd kãnga a Zeremi:

² «Bẽes gãndo la pees raado sẽn tar n palgd nag-koods yubla. Yãk a ye n palg f bãgdo n maneg n loe!

³ Dẽ poore; fo na n toola a taabã Edom dĩma, Moab dĩma, Amonitsa dĩma, Tir dĩma, la Sidõ dĩma. Woto wã fo na n dɩk-b lame n kɩs sẽn wa-b b dĩm bãmb zĩigẽ, Zerizalɛɛm ka, a Sedesiyas nengẽ, tɩ bãmb na taas-ba b zu-soaben-dãmba.

⁴ Fo na n yeel-b lame tɩ b tosg b zu-soaben-dãmba, mam sẽn togsã, maam, dũni fãa Soaala, a Israyɛl Wẽnnaam.

⁵ M wilga m pãnga, n wilg tɩ m mii tʋʋmde la m naana tẽnga, n naan ninsaalba la rũmsa sẽn vɩ wã. Mam sẽn naana m dɩkd-b lame n kõt m sẽn dat a soaba.

⁶ Bɩ y bãng tɩ m yeelame tɩ m na n dɩka y tẽnsa fãa n sagl m ned nugẽ, Babilon dĩm, a Nabikodonozor, nugẽ. La ba we-rũmsa menga, mam ning-b-la yẽ nugẽ t'a soog-ba.

⁷ Tẽnsa fãa na n lebga a soolem, a kamb soolem, a yagens soolem n tãag wakat ninga yẽ meng tẽnga sẽn na n lebg tẽns a taaba soolem, dĩm dãmb pãng sẽn yɩɩd yẽnd rẽnna soolem.

⁸ Tẽng ninga fãa, bɩ rĩung ninga fãa sẽn ka na n kẽ a Nabikodonozor, Babilon dĩma, la a tẽeg a yubla tɩ Babilon dĩma palg nag-koodsa raoogã, m na n kɩtame tɩ b pa zabrẽ, tɩ kom lʋɩ b tẽngẽ, tɩ bã-longdem yõk-ba. M na kɩt tɩ Babilon dĩma sõng-ma tɩ m menes tẽn-kãnga.

⁹ La yãmba, da kelg-y yãmb bãngdba ye, bɩ bagba sẽn lobd kuga, bɩ neb sẽn wilgd zãmsd võore, n wilgd sawat sẽn yɛdg võore, sẽn tar yel-bãn-tɩto. Bãmb fãa togsd-y lame tɩ ka Babilon dĩma n na n soog yãmb ye.

¹⁰ Bãng-y tɩ yaa zirẽ, la y sã n kelg-ba b na n tall-y lame n zãag ne y tẽnga. M na rig-y n yiisi la y kõn põs sʋʋg ye.

¹¹ La tẽng ninga sẽn na n saka n tẽeg a yubla tɩ Babilon dĩma palg a yubla, nag-koodsa daoogã, la a sak n lebg a soolma neda, mam na n kɩtame t'a pa a tẽngẽ la a ko a pʋʋgo. Soaala n yeele.»

¹² Koɛɛg sẽn wẽnd koe-kãnga la a Zeremi le taas Zɩɩda rĩm a Sedesiyas n gom ne-a woto: «Foo ne f nebã, yãmb tog n sak n kẽ-la a Nabikodonozor soolmẽ. Bas t'a soog-fo, foo ne f nebã tɩ woto la y na n põse.

¹³ Bõe yĩnga tɩ yãmb na n bas y menga la y neba tɩ sʋʋg kʋ yãmba, tɩ kom la bã-longdem kʋ yãmba. Yaool n yaa woto la tẽng fãa na n baase, a sã n zãgs t'a kõn sulg a meng Babilon dĩma taoore, wala Soaala-Wẽnd sẽn wilg-ma.

¹⁴ Bãngdba n bee n gomda tɩ kõn le yɩ pakr ne yãmba tɩ y pa Babilon dĩma soolmẽ ye. Ad-y b sẽn togsda ka sɩd ye, da kelg-y-b ye.

¹⁵ Soaala paasame tɩ ka bãmb n tʋm-b ye, ba b sã n yet tɩ b gomda Soaala yʋʋr yĩnga, wakat kãnga b yagda zirẽ. Yãmb sã n kelg-ba, m na n dig-y lame n zãag ka la y kõn põse, yãmb ne y bãngdbã sẽn gomd ne yãmbã.»

¹⁶ A Zeremi goma ne maan-kʋʋdba la neb niyns fãa sẽn da tigma la a yeel-b lame: «Ad Soaala koɛɛga: ‹Da kelg-y bãngdb kãensa ye. B yetame tɩ ka na n le kaoos tɩ b le tall wẽnd dooga teedã n wa ye. Yaa teed niyns b sẽn da wʋk n loog Babilon tẽngã. Dẽ fãa ya zirẽ la b togsd yãmba.

¹⁷ Da kelg-y ye. Maan-y Babilon dĩma yam, tɩ y na põse. Bõe yĩng la tẽn-kãnga na n wa lebg raboogo?› »

¹⁸ A Zeremi paasame: «Nin-bãmba sã n sɩd ya bãngdba, sã n sɩd ya Soaala yʋʋr yĩnga la b gomda bɩ b yõk dũni fãa Soaala sɛɛga, tɩ b ra wʋk n loog Babilon teed sõma niyns sẽn ket wẽnd doogẽ wã, Zɩɩda rĩma zakẽ, bɩ tẽnga pʋga.

¹⁹ Soaala-Wẽnd ket n tara koɛɛga ra-lug-bɛd a yiiba poorẽ, zũud-sĩn-kãsenga poorẽ, sĩmsa sẽn zao bilim-bilma la teed a taaba sẽn pa Zerizalɛɛm poorẽ.

²⁰ Ad-y Babilon dĩma ra pa wʋk te-bãmba, a sẽn wa n looge ne a Yekoniya, a Zoakim biiga la Zɩɩda rĩma, yẽ ne Zerizalɛɛm la Zɩɩda rakãagba ye.

²¹ Soaala-Wẽnde, dũni fãa Soaala la a Israyɛl Wẽnnaama gomda woto te-sõma wã poorẽ, teed niyns sẽn pa wẽnd dooga pʋga bɩ Zɩɩda dĩma zakẽ, bɩ Zerizalɛɛm:

²² ‹Te bãmb fãa na n wʋk n looga Babilon la b na n paa be n tãag wakat ning m meng m toore sẽn na n le tall-ba n wa ka. Mam koɛɛg la woto.› »