Zeremi 23 - SEBR SÕNGO

Beoog Dĩma

¹ Yell na n paka pe-kɩɩmb niynsi sẽn get m buuda yellã, yaa Soaala-Wẽnd n gomde. Ad-y b yaa pe-kɩɩmb wẽnse. B basdame tɩ piisa kiid kom la b menemdẽ.

² Dẽ n so tɩ Soaala, a Israyɛl Wẽnnaam, gomd woto ne pe-kɩɩmbã: Yãmb basa m piisa tɩ b menemdẽ la b sẽegdẽ, y pa ges b yell ye. Mam yẽ na ges y yelle n sɩbg y manes yoodã.

³ Ade, mam meng n na n tigim piis niynsi sẽn ket-bã, m na n tigim-b-la m sẽn sẽeg-b tẽns niynsa fãa. Maam n na n tall-ba n kẽng b wãbneg zĩigẽ. B na n noba sõma, la b na n doga wʋsgo tɩ b sõora paase.

⁴ Mam na n baoo pe-kɩɩmb sõma n gũnug-ba. Ne pe-kɩɩmb kãense, b kõn yɛɛse, b kõn dig bũmb rabeem ye, ba a ye menga kõn le menem ye, Soaala gomde.

⁵ Ade, daar n wate, Soaala n gomde, mam na n kɩtame tɩ nin-sõngo, nin-tɩrga, yi a Daviid meng buudẽ. Na n yɩɩ dĩm sẽn mi naam dɩɩbo, sẽn zãad a soolma rãmb sɩd la zemsg pʋgẽ.

⁶ A sã n wa rɩt a naama a Zɩɩda na paam fãagre, t'a Israyɛl vɩɩma ya laafi vɩɩm. Ad yʋʋr ninga b sẽn na n pʋd-a: «Bʋ-kaood tɩrg soaba Wẽnde.»

⁷ Daar n wate, Soaala-Wẽnd koɛɛga, tɩ Israyɛl dãmb ka na n leb n wẽen woto: «M wẽen ne Wẽnd sẽn vɩ la sẽn yiis-a tõnd Ezipt tẽnga.»

⁸ Woto la b na n wẽen marsã: «M wẽen ne Vɩɩm Naaba-Wẽnd sẽn yiis Israyɛl buudu, nug goabg rãmba soolmẽ, la zĩis niyns fãa b sẽn da sẽegẽ, tɩ b na n le vɩɩnd b tẽngẽ.»

Zirẽ-be-bãngdba poorẽ

⁹ Bãngdba poorẽ, goam n gome la m sũ-keelma menema zãnga, mam yĩnsã fãa digimdame. Soaala yiisa goam sẽn ya sõma la tagdo tɩ m digimdi, n tãag n yɛsẽ wa rã-tɩgda, rãam sẽn lubi. Goama goma woto:

¹⁰ Tẽnga pida ne yoaadba. B fãa zoet n pʋgda wẽnga. B pa yɛɛd ne tʋʋm wẽns ye. Yaa rẽ la tẽnga yãbd a neba kʋʋre, yaa rẽ la yamd kʋɩ rũmsa wãbneg zĩisẽ.

¹¹ Bãngdba wa maan-kʋʋdba, b fãa lebga bi-beese. B tol n talla b manes wẽnsã n wa Soaala-Wẽnd roogẽ. Yaa Soaala n wilg-m rẽ.

¹² Dẽ n so tɩ b soya na n pid ne salse. B na n kẽnd n fãooda taab likẽ la b pãsd n lʋɩtẽ, m sã n wa tool yel-beedã, m sã n wa yik ne bãmba. Soaala n gome.

Zɩɩda bãngdba ka são Samari rãmb ye

¹³ Bũmb la m yãend Samari bãngdba nengẽ, Soaala-Wẽnd n gomde, la yaa bũmb sẽn ka sakd toagsg ye. Ad-y b ra gomda a Baal yĩnga, n kẽesd m buud a Israyɛl moogo.

¹⁴ La m sẽn yãet bũmb ning bãngdba nengẽ Zerizalɛɛma pʋgẽ, n yɩɩd ne wẽnem: yoobo, zirẽ yagbo, fãadba pirsgu. B pa basd tɩ ned ba a ye tõog n vʋʋs ne wẽng maaneg ye. M sẽn get-ba, b wẽnda Sodom dãmba, la Zerizalɛɛm dãmba pa são Gomor dãmb ye.

¹⁵ Yaa woto la dũni fãa Soaala gomd Zerizalɛɛm bãngdba poorẽ: M na n yũnug-b-la ko-tɩɩsenga, n yũnug-b ne ko-zẽnem. Zerizalɛɛm bãngdba lebga zẽnem sẽn sãamd tẽnga zãnga.

Zirẽ-be-bãngdba

¹⁶ Ad dũni fãa Wẽnd sẽn leokde: Da kelg-y bãngdb kãensã sẽn togsd yãmb ye, b tudgda yãmba, b togsda yãmba, bũmb ninga sẽn be b yamẽ; b goama ka yit maam Naaba-Wẽnd nengẽ ye.

¹⁷ Neb n be tɩ b toog ka be ne mam goama ye. Yaa bãmb dãmb la b yeta: «Na n zemsame!» Neb niyns sẽn kʋɩɩs b sũuri n giri, bãmb dãmb la b yeta: «Bũmb kõn maan-y ye.»

¹⁸ Bãmb sʋka, ãnd n zĩnd d yẽsga wakato? Ãnda n yãende, ãnda n wʋme m sẽn togs bũmb ning wakat kãnga? Ãnda n wʋm maam, Naaba-Wẽnd, goama, ãnda n wegs-ba?

*(A Zeremi)

¹⁹ Ges-y sobg kãseng sẽn wate, Yaa Soaala sũur n puugdi. Sɩlman-daoogo n wat nin-wẽnsa yĩnga.

²⁰ Soaala sũ-puura ka na n yõke tɩ b pa pids b sẽn yalsa ye. Y na waa n wʋm dẽ, raar a ye.

*(Soaala)

²¹ Mam ka tʋm bãngdb kãensã ye, tɩ b yaool n tar zoeese. Mam ka yeel-b tɩ fɩ, la koees buud fãa yita b noorẽ.

²² B sã n da zĩndẽ d yẽsga wakato ad-y b na tõogẽ n taasẽ buudã m goama n kɩtẽ tɩ neba bas b so-wẽnga tũubu, la b tʋʋm-yooda fãa.

Soaala bee zĩig zãnga

²³ Soaal Wẽnd n sokde: «Mam yaa ned sẽn ka ne yɩɩg laa? Ayo! M yaa Wẽnd sẽn ne yɩɩga.

²⁴ Ned sã n solg a menga a tõeeme tɩ m ka le ne-a bɩ? M bee zĩis fãa, yĩngr la tẽnga; y ka mi rẽnda sɩda?»

Kãnkãr toore, kood biis toore

²⁵ Mam Naaba-Wẽnde, mam wʋma bãngdba sẽn gomd to-to, b gõod n yagda zirẽ mam yʋʋr yĩnga n yetẽ: «Mam zãmsa woto m gõeemẽ, mam paama likri.»

²⁶ Na n yɩɩ woto n ta da-bʋre? Nin-bãmba tagsdame tɩ bõe b zirẽ-beeda moonega wakato, b sẽn wat n yelgd b meng sẽn naana wakato?

²⁷ B sẽn togsd taaba b sẽn paam likri niynsã, ka bũmb a to la b rata n zʋʋg maam, Naaba-Wẽnd, leb kɛɛnga. B raab la b yĩm m yelle wala b ba rãmba sẽn da yĩm m yelle n pʋgd Baal dãmbã.

²⁸ Bãngd ninga sẽn paam-a zãmsgo, bɩ a togs a zãmsgo! La a sã n wʋma mam gomde, bɩ a togs mam gomde n da rogl bũmb ye! B ka tõe n dɩk kãnkãre n mak ne kaaf ye, Soaalã n gomde.

²⁹ Mam gomda yaa wa bugum. Mam gomda yaa wala zãar sẽn wãad pĩiga.

³⁰ Yaa rẽ yĩnga la m na n yik ne bãngdba sẽn be tẽngre n zuud taab m goama.

³¹ Mam na n zaba ne bãngdb niyns sẽn ka bãngdba n kalemd m goama ne bãmb mens rẽnna.

³² Mam na n zaba ne bãngdb niynsi sẽn yagd-b zirẽ tɩ b paama beoog yɛla pukri. Zirẽ-be-wagla rãmb tar m buudã n kẽesd moogo. Mam pa tʋm-ba, m pa kõ-b noore. B pa sõngd m buuda ba sẽn paood ye. Soaala n gome!

Wẽnd gomd ka zɩɩb ye

³³ Soaala-Wẽnd yeela a Zeremi: «Bãngd bɩ maan-kʋʋd, bɩ ned a to sã wa sok-fo: ‹Bõe tɩ Soaala gomda ya woto, bõe t'a ya zɩɩbo?› F na leok a soaba: ‹Yaa yãmb meng la m zɩɩbo. La m na n sik-y lame n vʋʋse.›

³⁴ Bãngd bɩ maan-kʋʋd, bɩ ned a to sã n gomd tɩ yaa zɩɩb la Soaala zɩlgd-a, m na yik ne yẽ soaba, la m yik ne a zak rãmba.

³⁵ Yãmb sẽn tog n sogs taaba, yaa Soaala leokame tɩ bõe, Soaala yeelame tɩ bõe?

³⁶ Sã n ya sẽn gomd-b zɩɩb yellã, m da le wʋm dẽ ye. Soaala gomd maanda wãn n lebg zɩɩbo, ninsaal yĩnga. F sã n gomd woto f ka togsd sɩd ye la f tekda Vɩɩm Naaba gomde, dũni fãa Soaala la a Israyɛl Wẽnda gomde.

³⁷ Fo sẽn tog n sok bãngda, yaa a wilg-fu Soaala sẽn leok yẽnda, Soaala sẽn togs yẽnda.

³⁸ La yãmb sã n ket n gomd zɩɩbo, Soaala sẽn zɩlg yãmba yelle, ne m sẽn yet tɩ m pa rat n le wʋm-a, m yet-y-la woto:

³⁹ ‹Ade mam na n zẽk yãmba n palg m bãgdo wala zɩɩbo n tɩ bao zĩig n lob yãmb n zãag ne tẽn-kãnga, m sẽn da rɩk n kõ y yaab rãmbã.›

⁴⁰ Man na n ning-y-la yãnde, yãnd sẽn kõn sɛ, la yãnd sẽn ka tõe n yĩm tɩ ka yʋʋm wɛɛla.»