Zeremi 21 - SEBR SÕNGO

A Sedesiyas paamda leokre

¹ Ad koɛɛg ninga Soaala-Wẽnd sẽn taas a Zeremi dĩm a Sedesiyas yĩnga. Dĩma da tʋma a Zeremi nengẽ a Pasewur, a Malkiya biiga, n paas maan-kʋʋda a Sefaniya, a Maseya biiga. A ra tʋm-b lame tɩ b tɩ yeel-a

² tɩ sã n ta a raabo, bɩ a tɩ gom ne Soaalã Babilon dĩm a Nabikodonozor poorẽ, tɩ dĩm kãng waa n maanda zabr ne tõndo. Daare Soaala na maan makre d yĩnga, n zãag-d ne Babilon tãb-biisã.

³ A Zeremi yeela b sẽn tʋm b rãmbã: «Tɩ yãend-y dĩm, a Sedesiyas, la y wilg-a leokr ninga,

⁴ Soaala-Wẽnde, a Israyɛl Wẽndã sẽn leokde: ‹Yãmb na n taka zabre ne Babilon dĩma tãb-biisa sẽn gũbg yãmbã. M na n modga tãb-biis niynsi sẽn zabd-b lal-gũbra taoorã tɩ b leb poorẽ, n tɩ tigim tẽnga pʋga.

⁵ Mam menga n na n yik ne m sũura sẽn puug wʋsgã, n zab ne yãmba n wilg-y m nugu la m kang pãnga, n wilg m zab-minim.

⁶ M na n zaba ne tẽn-kãnga bõn-vɩɩl fãa: ninsaalba, rũmsi; bãag sẽn ka sugri n na n loog ne b fãa.

⁷ Dẽ poore, ket n yaa Soaala koɛɛga, mam na n ninga Babilon dĩma nugẽ, Zɩɩda dĩm a Sedesiyas, n paas a kug-zĩidba la a soolma rãmb sẽn põs-b bãagã, zabra sʋʋga la koma. N-ye, m na n bas-b-la b bɛɛba nugẽ, sẽn dat-b n kʋ-ba nusẽ! A Nabikodonozor na kɩt tɩ b kʋ-ba; a kõn zoe ned ba a ye nimbãanega, a kõn bas ned ba a ye, a kõn sak belgr ye.› »

⁸ Soaala le kɩtame t'a Zeremi taas buuda koe-kãnga: «M yalsda yãmb so-badgẽ. Soy a yiibu n dɩg y taoore: vɩɩm la kũum sore.

⁹ Sẽn na n paa tẽn-kãnga pʋgẽ, sʋʋg n na n kʋ-a, ka rẽ bɩ kom, bɩ bã-longdem. Ned ninga marsã sẽn na n yɩ tẽngã n tɩ rɩk a meng n bas ne Kalde rãmba sẽn gũbg tẽngã, yẽ soab na n vɩɩndame.

¹⁰ Tɩ bala m ka rat tẽnga fãagr ye, a wãab la m data; a na n lʋɩɩ Babilon dĩma nugẽ la a na n ning-a-la bugum.»

Koɛɛg b sẽn kõ na-yiri

¹¹ Koɛɛg a Zɩɩda na-yira rãmb yĩnga: Ad Soaala sẽn yete:

¹² Zɩɩda Na-yiri, Daviid buudu, kelg-y. Sɩng-y y raarã ne bʋ-kaoor sẽn ya tɩrga. Reeg-y pãng rãmba sẽn yõkd n deesdẽ wã. Ka rẽ m sũura na widga wa bugum Bugma na n dɩɩ zãnga, la yaa bugum sẽn ka tõe n kiis ye. Dẽ me n na n yɩ y tʋʋm wẽnsa yaoodo.

¹³ Maam, Naaba-Wẽnd, na n zaba ne yãmba, ne sẽn be-b tãnga pennẽ, pĩ-labra zugu; m na n zaba ne yãmb fãa sẽn gomd-ba tɩ y ka ne bɛ ninga sẽn na n sig n ta yãmbã, bɩ sẽn na n saag-a n kẽ y rotẽ wã.

¹⁴ Ade, maam Naaba-Wẽnd n gomde, woto n na n yɩ y tʋʋm wẽnsa yaoodo: m na n ninga y tɩ-wogda googa bugum la bugma kõn kees bũmb ye, bũmb kõn kees poorẽ la taoor ye.