Zeremi 20 - SEBR SÕNGO

¹ Bala Maan-kʋʋda a Pasewur, a Imɛr biiga, n da ya wẽnd dooga gũudb naaba. A wʋma Soaala koeesa fãa a Zeremi sẽn togsã.

² A wẽ-la a Zeremi pɛka, n kɩt tɩ b loe-a ra-luka a Bẽnzame digno-kãsengẽ, dignoor ninga sẽn tota ne wẽnd dooga rẽnna.

³ Vẽkembeoogo, a Pasewur kɩtame tɩ b lok a Zeremi. Dẽ la a Zeremi yeel-a: «Soaala-Wẽnd ka leb n boond foo tɩ Pasewur ye, fo yʋʋr lebga a Yɛɛsgo-naaba.»

⁴ Ad Soaala-Wẽnd sẽn gomda: «Mam na n kɩtame tɩ f yɛɛs yɛɛsgo kãsenga, foom ne f zo-rãmba fãa. Bɛɛba na n kʋ-b-la ne sʋʋga; fo nif na n yãenda b kũum. N paas me, m na n kɩtame tɩ Babilon naaba wa wʋk Zɩɩda tẽnga fãa n tall n kẽng Babilon, ka rẽ bɩ a kʋ-b ne sʋʋga.

⁵ Tẽnga arzɛka fãa, tẽnga laog fãa, bũmb niyns fãa sẽn tar yõodo, Zɩɩda nanams arzɛgs fãa, m na kɩtame tɩ b bɛɛba wa wʋk-b fãa gilli n tall n kẽng Babilon.

⁶ La sã n ya foom, Pasewur, foo ne f zak rãmba fãa, b na n talla yãmb fãa n kẽng yembdo Babilon. Fo na n kẽnga be, la fo na n kii be, la b na n muma foom be, foom ne f zo-rãmba, fo sẽn da yagd zirẽ tɩ neb niyns kelgdẽ wã.»

A Zeremi nimbãanega

⁷ Soaala-Wẽnde, yãmb gomame n belg-ma, la m basame tɩ yãmb yõk-ma. Yãmb wõra maam, yãmb tõog-m lame. Woto me la neba paam yã, beoog sẽn vẽeg fãa, n laad-m la b tar-m n yaanẽ.

⁸ M sã n gom fãa n sɛ dẽnd m lɛɛg n yõk sɛɛga dẽnd m kelme n wilg tɩ b maand-m-la pãnga. Taas neba yãmb gomd fãa wata ne m laado la m tʋʋre.

⁹ M sã n wa yik n yeel m menga tɩ m ka na le gom Soaala yʋʋr yĩnga, bũmb n widgd m pʋgẽ wa bugum, n yõogd maam, tɩ m baood n na n kiis-a la m pa tõe ye.

¹⁰ M wʋmda neb wʋsg sẽn wɩt-ma, b yãee yʋʋr n pʋd-ma: a Yɛɛsgo-naaba, poorẽ la taoore, goabg la rɩtg Yɛɛsgo. Tɩ zĩig sɩd wulumd ne: «Yõk-a, yõk-a n wa!» M zo-rãmba meng gũusda m goama, b ratame tɩ m tudg tɩ b yõk-ma. B pʋs n yetame: «D na yõk-fo, d na paam n dok d sũuri.»

¹¹ La yãmba Soaala, yãmb pida ne pãnga la yãmb n zabd n sõngd-m. Woto wã yaa m bɛɛba n na n kong pãnga bãmb neng n na n turg tẽnga. B lʋɩɩsa yãnd na n yõk-b lame, b zug na n sulgame n ka le roog bada, la neba na tar n gomda.

¹² Yãmba, dũni fãa Soaala, yãmb mii sẽn ka pʋgd-b yãmb ne belgrã. Yãmb mii sẽn solg sũurẽ. Mam yẽ basa m yɛla fãa ne yãmba, m saagda m na yãend ne m nini, y sẽn na n dok y sũura to-to ne m bɛɛbã.

¹³ M buudu, sõng-y-ma n kils Soaala, yɩɩl-y n pẽg-ba tɩ b fãag-m-la nin-wẽnsa nugẽ.

¹⁴ Wẽnd na sãam m dogma daare, Wẽnd na yãk m ma sẽn dog-m daar ninga barka!

¹⁵ Ned ninga sẽn pidsa m ba ne sũ-noogo n wilg-a t'a paama bi-ribla,

¹⁶ bɩ b maan ne nin-kãnga wa b sẽn maan ne tẽns niyns sẽn tiig n lebg raboodã, tɩ sugr ka zĩndã. Bɩ nin-kãng sãd beoog n wʋm kɛlenga, la zabr kaasgo, wĩnto-sʋka!

¹⁷ M yee n da paamẽ bala tɩ Soaala bas-m tɩ m ki tɩ m nan ka rogẽ ye! M ma wã n yɩtẽ m yaoogo, tɛk la tɛka.

¹⁸ Bõe tɩ m yi m ma pʋgẽ, vɩɩma sã n ya bãng toog la namsgo, n wa ki ne yãnd bala?