Zeremi 15 - SEBR SÕNGO

¹ Ad Soaala-Wẽnd sẽn yeel-ma: «Ba yaa a Moyiiz ne a Samwɛl n yõkd m sɛɛg buud kãng yĩnga, b kõn tõog tɩ m yama tedg ye. Dig buud a woto t'a menem mam taoore n zãag zĩiga.

² La b sã n sok-fo: ‹D na n kẽnga yɛ?› Bɩ f leok-b tɩ Soaala goma woto: ‹Ned kam fãa ne a sẽn tog ne: bã-longdem n kʋʋd kẽere kẽer yaa sʋʋga, kẽer yaa kom, kẽer na n looga pa-weere.› »

³ Soaala-Wẽnd gomdame tɩ bũmb a naase n na n sõng-ba n zabe: sʋʋg na n kʋ-b lame, bãas na n vu-b lame, yɩbrendo la we-yũusi n na dɩ-ba, n menes-ba.

⁴ Woto dũni wã pʋgẽ dãmba fãa na yãend la b yɛɛse. Ad-y ka ned a to yell ye, yaa Zɩɩda dĩma a Ezekiyas biiga, a Manase, yelle; a maana sẽn ka neere Zerizalɛɛm.

Zabr yel-beedo

⁵ Ad Soaala-Wẽnd sẽn sokd Zerizalɛɛm: Ned ba a ye ka le ket moogo sẽn na n zoe fo nimbãaneg laa? Ned ka ket sẽn na n kũm-fo, la a sok-f n ges f gãas yaa wãna?

⁶ Mik yaa fo meng n yeele tɩ f toog ka le be ne maam ye, fo n tud maam f zãnkudga. Yaa rẽ yĩnga la m sɩbg-fo. Mam yɛɛ ne belsgo!

⁷ Tẽnga fãa sagsẽ, m waa ne m zɛɛdga, n na n yelg tɩ sobg loog ne-ba. M monga m buuda kamba, n boog a neba sõore. Ne rẽ fãa a pa tek a manesem ye.

⁸ M kɩtame tɩ b pʋg-kõapa sõore yɩɩd bĩisra sẽn be mogra noore. Mam kɩtame tɩ fãada wa wĩnto-sʋka n sɩng zabre ne tãb-biig ma, vugr bala a yɛɛsa yɛɛsg kãsenga.

⁹ Pag ninga sẽn doga kamb a yopoe wã pʋg kang vʋʋsma tulga a yãoogẽ, A wĩndga lʋɩɩme tɩ daara nan ka ta a pʋɩ-sʋk ye. A konga waoor n zĩ ne yãnde. Neb a taaba sẽn kell-ba ra tẽ põasg ye; m na n bas-b-la bɛɛba nusẽ: Soaala n togs rẽnna.

Wẽnd sẽn yals a Zeremi poorẽ *(A Zeremi)

¹⁰ M ma, fo ra ka rogẽ-ma, m kõn tɩlgẽ ne yel-beedo! Tẽnga pʋgẽ, maam la b kisa, maam la b tugd beem. M ka peng ned ye ned me ka peng-m ligd ye, la neba fãa naaga taab n kis-ma.

¹¹ Dẽ la Soaala yeel yã: M wẽendame tɩ neer maaneg yĩnga m bas-f lame tɩ f so f menga. M na tus bɛ wã menga t'a wa yõk f sɛɛga a pɛt la a yɩɩr wakato.

¹² Kut na kaooge, Goabg zamaanẽ dãmb kutu, bɩ b zũudu, fo maanda a wãna n kaoog-ba?

*(Soaala)

¹³ Gese, Zɩɩda, fo arzɛka la f paoong fãa, m dɩk-b lame n basd ne fãadba. Woto la f na n yao f yel-wẽna, yel-wẽna fo sẽn maan tẽnga fãa pʋgẽ wã.

¹⁴ F na n lebga yamba f bɛɛba tẽngẽ, tẽng f sẽn ka mi la sẽn zãre. Sɩda m sũura wuka ne foo, m sũura widga bugum.

*(A Zeremi)

¹⁵ Soaala, yãmb mii yell ning sẽn pak maama. Dẽnd yĩnga tẽeg-y m yelle, sɩbg-y m bɛɛba n dok m sũuri. Da kaoos-y waoong ye. Y meng miime tɩ yaa yãmb yĩnga la m basd tɩ b tʋʋsd-m.

¹⁶ Mam sã n da wʋm yãmb gomd fãa, mam da kelgd-a-la neere, y goama ra pidsda maam ne sũ-noogo, m sũura ra tosda kaam, tɩ m dɩka m meng zãng n kõ yãmba, dũni fãa Wẽnde.

¹⁷ Abada, m ka bao reem, m ka na n tɩ naag sẽn nong-b reema tɩ sũ-noog la m baood ye Yãmb modg-m lame tɩ m pa kɛɛnga, y kɩtame tɩ m sũura yik ne ba.

¹⁸ Yaa bõe tɩ mam namsg ka sɛtẽ, tɩ mam sãmpogr kẽ pãafo, tɩ tɩɩm buudu ka be n tõe n sãoog-a? Sɩd-sɩda, yãmb belga maam y belg-m-la wala kʋɩls kẽere, n pid dũnna n daannẽ n yik beoog n ya koɛɛnga.

*(Soaala)

¹⁹ Ad Soaala-Wẽnd sẽn leok-m bũmb ninga: Fo sã n leb n wa, ne m sõngre m na n le reeg foo f tʋʋmnẽ. F sã n mi tɩ ka goam vɩɩd la f na n gome, f sã n mi tɩ f na n goma sẽn be yõodo, fo na yɩ m no-rɛɛsa. Yaa Zɩɩda rãmba n na n lɛɛg n kẽ foo, ka foo n na n pʋg bãmb ye.

²⁰ Bãmb taoore, m na n kɩtame tɩ fo lebg wala zũud-lalga, bũmb sẽn ka tusd n lub naana. B na n zaba ne foom, la b kõn tõog foom abada, tɩ bala, mam bee ne foom, n na n fãag fo, n na n yiis f roogo. Soaala-Wẽnd n leok rẽnna.

²¹ Mam na n fãaga foom nin-wẽnsã nugẽ, la m zãag-f ne pãn-tõog rãmba pãnga.