Zeremi 14 - SEBR SÕNGO

War-kãsenga wakato

¹ Soaala-Wẽnd sẽn taas koɛɛg ning a Zeremi war kãsenga wakato.

² A Zɩɩda rɩta a kamb kʋʋre sũ-noog fãa sɛ-la a tẽn-kogsẽ, fãa pida ne lik la sũ-sãanga, Zerizalɛɛm waasg bal la b wʋmda.

³ Taoor dãmba yiisa b nebã tɩ b tɩ bao koom n wa la b sẽn ta kʋɩlgẽ b mikame tɩ koom ka ye, tɩ b na n leb n wa ne yʋ-vɩɩdo. Yãnd tar-b lame, tɩ b lud b zutu.

⁴ Pʋt ka le kõt bũmb ye, saag kaalem yĩnga; yãnd tara koaadba tɩ b lut b zutu. B nee tẽnga sẽn tãs mugnum.

⁵ Ba yãk sẽn be weoogẽ, a sã n dog a biiga, a basd-a lame n zoe, yamd kaalem yĩnga.

⁶ Kunkuba zutu, yamd ka le ket ye, Burguma yɛsa wa waase n kokd yũugu. Ad-y b nina yiigame la yaa mo-maas la b saad n baoodẽ, la mo-maas ka le ket ye.

⁷ Tõnd tʋʋm wẽnsã sã n kɩt tɩ tõnd yãend woto, Soaala, bɩ y maan y sẽn na n maanega, yãmb yʋʋr pẽgr yĩnga. Yaa sɩda, tõnd wilg-m-menga ka tɛk ye, tõnd maana yel-wẽna n ka sak n sulg d mens yãmb taoore ye, tõnd beega yãmba.

⁸ Soaala, a Israyɛl teegda, a Israyɛl Fãagda, yel-pakdem wakato, bõe yĩnga tɩ yãmb maandẽ wala y yaa sãan tẽn-kãnga pʋgẽ, wala so-toagd sẽn ta tẽngẽ n na n gãand be la a yik n loog bala?

⁹ Yaa bõe yĩnga la y maand wa nin-bãada, wala gãndaoogo sẽn ka tõe n fãag a taaba? Yãmb be-la d sʋka, Soaala, Yãmb n so tõnd gõeem la d gũsma da bas-y-d tɩ d lʋɩ ye!

¹⁰ Ad Soaala-Wẽnd sẽn gomd nin-kãensã poorẽ: «B nong n saada zĩis fãa, b ka zoet kẽna ye! La Soaala-Wẽnd toog ka be ne b ye; marsã b na n tẽega b yel-wẽna n sɩbg-ba.»

¹¹ Ad Soaala-Wẽnd sẽn yeel maam: «Da bao nin-bãmba sõngr ye, da bao b sũ-noog ye.

¹² Ba b sã n loet noore, mam kõn deeg b pʋʋsg ye; ba b sã n kʋʋd maoongo, la b tar kũuna n watẽ, mam toog ka ne nin-bãmba ye; mam na kʋ b fãa gill pẽs ne sʋʋga, ne kom la ne bã-longdem.»

¹³ La mam leokame: «Soaala-Wẽnde, bãngdba yet-b lame: ‹Y kõn seg sʋʋga, y kõn seg kom ye, kaalẽ y yɛla na n manegame n paas bala.› »

¹⁴ Dẽ la Soaala me yeel-m: «Bãngdba sẽn yet tɩ b gomda mam yʋʋr yĩnga, ad yaa zirẽ-beedo. M ka tʋm-b ye, m ka kõ-b noor ye, m ka yeel-b tɩ bũmb ye. B pa ne fɩ; b togsda sẽn ka na n yɩ ye; b yʋng zãmsd la b togsda, yaa rẽ bala.»

¹⁵ Dẽ n so tɩ m meng yet woto bãngdba poorẽ: «Ka maam n tʋm-b ye, yaa bãmb n yik b toore n gomd tɩ maam n yeele tɩ zabre la kom kõn zĩnd tẽn-kãnga ye. Bɩ b bãng tɩ yaa zabre la kom n na n menes-b fãa gill.

¹⁶ Sã n ya ne buuda neba sẽn kelg-b zirẽ-beedã, bãmb fãa la zabre la kom na n gãneg Zerizalɛɛm soya zutu la ned kõn zĩnd sẽn na n mum-b ye, bãmb ne b pagba, b kom-dibli la b kom-pugli. Maam, Naaba-Wẽnd, na n lebs-b-la b wẽnema.»

¹⁷ Fo na n taas-b-la koe-kãnga: M datẽ lame tɩ m nina pidẽ ne nintãm, n pid yʋngo la wĩndga, al tɩ laafi kaẽ ye, tɩ m buuda paama sãmpogr kãsenga, a nodra yaa solenkẽega.

¹⁸ Mam sã n yi we-kɛɛnga mam yãetame tɩ neb n gãe, zabra sʋʋg n kʋ bãmba; mam sã n kẽ tẽnga pʋgẽ yaa koma sẽn kʋ b rãmba la m yãeta. Bãngdba ne maan-kʋʋdba saaga tẽngã, b ka tar yella moor ye.

*(Buudã)

¹⁹ Woto la buuda sokd Soaala: Y basa a Zɩɩda kɛɛng laa? A Siõ yaanda y sũur laa? Bõe tɩ d sãmpogra ka tõe n maage? D da tẽedame tɩ yɛla na n wa zemsame, la fɩ ka teem ye. D da gũuda d noada maagre, la d zĩi ne yɩɩre.

²⁰ Soaala d miime tɩ d ka maan neer ye, tõnd deegame tɩ d ba rãmb tʋʋm yɩɩ wẽnse; tõnd beega yãmba.

²¹ Maan-y sugri tɩ y yʋʋra ra wa tũ rẽ n sãam ye. Da maan-y wa y ka le rat y ziira goeel ye, da tus-y y goeelã n serg ye. Tẽeg-y y sẽn kãab tõndã, da sãam-y y zooda ne tõnd ye.

²² Bu-zẽmba wẽn-naandsa sʋka yɛɛlẽ soaba n tõe n bool saaga? Yaa saagã n wat ne saas bɩ? M yet yaa yãmba, Soaala-Wẽnde. Soaala-Wẽnde, yãmb la d teegre, yãmb la bũmb fãa Naanda.