Zeremi 13 - SEBR SÕNGO

Sɛ-gãnd makre

¹ Ad noor ning Soaala-Wẽnd sẽn kõ-ma: «Kẽng n tɩ ra sẽbdga sẽn wʋg ne beren-dɩgr gĩsi, n sẽbg f sɛɛga. Da los-a koomẽ n pek ye.»

² Mam daa sẽbdga, wala Soaala-Wẽnd sẽn wilg-ma, n sẽgne.

³ Naoor a yiib soaba, Soaala-Wẽnd waame n gom ne-ma, n yeele:

⁴ «Dɩk sẽbdga f sẽn da sẽgna. Aya, yiki! Kẽng Efrat kʋɩlga n tɩ solg-a pĩig bokẽ.»

⁵ Mam sɩd kẽngame n tɩ maan wala Soaala-Wẽnda sẽn kõ maam noorã.

⁶ Sẽn kaoos wʋsg dẽ poore, Soaala-Wẽnd yeela maam: «Aya, yiki! Mam sẽn da kõ foom noor tɩ f tɩ solg sẽbgd ningã, kẽng Efrat kʋɩlga n tɩ rɩk-a n wa!»

⁷ Mam kẽnga Efrat n tɩ rɩk sẽbdgã mam sẽn da solgã. La mam mikame t'a sãamame n ka le tar yõod yɛs ye.

⁸ Dẽ zugẽ, Soaala-Wẽnd goma ne maam n yeele:

⁹ Ad-m koɛɛg: «Yaa woto la m na n sik a Zɩɩda zẽk-m-menga, n sãam Zerizalɛɛm neerma.

¹⁰ Nin-bãmba sẽn tõdge tɩ b ka na n kelg mam goama, nin-bãmba sẽn tũud b sũ-wẽnga sẽn kʋɩ wa kugri, la b zoet n pʋdg wẽn-naandse n wõgemd b taoore n waoogd-ba, mam me na n kɩtame, tɩ b lebg wala sẽbdg kãnga sẽn põog n ka leb n tar võor yɛsã.

¹¹ Wala sẽbdga sẽn sẽbdg ned sɛɛga, boto me mam da ratame t'a Israyɛl buuda fãa, a Zɩɩda buuda fãa tũ maam koɛɛga, n lebg mam neba, mam zu-zẽkre, mam waoogre, la mam faongo, la ade, b pa kelg ye.»

Soaala rã-toaaga

¹² Fo na n yeela nin-bãmba: «Maam a Israyɛl Wẽndã n gomde. Yʋʋr yagda a na sui rãam.» La b sã n leok foom: «Tɩ ãnda n ka mi tɩ yʋʋr fãa tõe n pidsa ne rãam,»

¹³ fo na yeel-ba: «Soaala-Wẽnd n gomd woto: Ade, mam na n tɩgsa tẽn-kãnga rãmb fãa ne rãam; m na n tɩgsa b dĩm dãmb sẽn zĩ a Daviid naam goeel zugu, maan-kʋʋdba, bãngdba, la Zerizalɛɛm dãmb fãa.

¹⁴ Dẽ poore mam na n sãama b fãa yell ne taaba. M na n kalma ba rãmb ne b kamba, maam, Naaba-Wẽnd n gome, la sugr ka ye, nimbãan-zoeer ka ye, m na kʋ-b fãa.»

Kelgre wakato

¹⁵ Kelg-y yã, yoog-y y tʋba, da maan-y tɩtaam ye, yaa Soaala-Wẽnd n gomde.

¹⁶ Yeel-b tɩ b waoog bãmb Soaala la b Wẽnnaam, tɩ b nin ket n neẽ n da wa kẽnd n lagsd tãms ne lik ye. Yãmb da gũuda beoog vẽegre, la m na n kɩtame tɩ vẽenem lebg lik bãm, wala saag n kʋɩ.

¹⁷ Yãmb sã n ka kelge, m yama na n bondgame, tɩtaam a woto yĩnga, mam nintãm na n dʋʋgame, n dʋʋg zembal waare, tɩ yaa pa-weere la b tar Soaala wubrã n dabda.

A Zoyakim gũus a menga

¹⁸ Togs dĩma ne a ma wã: Zĩnd-y tẽnga, tɩ ad yãmb naama pugla, fõka yãmb zugẽ n lʋɩ.

¹⁹ B paga Negɛb tẽnsa kʋɩlense. Ned ka le tõe n kẽ be ye. B talla Zɩɩda tẽnga fãa tõre n na n loog pa-weere. Pa-weera yaa b fãa gill n na n looge.

Zerizalɛɛm zʋg ka tek ye

²⁰ Zerizalɛɛm zẽk f nin n gese, ges f bɛɛb sẽn yit Goabg n watẽ. Piis niynsi b sẽn dɩk n gũnug fooma, b yell na n yɩ-la a wãna? Piis niynsi sẽn da ya fo zu-zẽkrã b yell na n yɩ-la a wãna?

²¹ Fo na n yeelame tɩ bõe, fo sẽn minim b rãmba, sẽn lebg-b fo sõsd-n-taasa sã n wa yik ne foo n na n soog foo, ad-f na n wʋma toog bala wa paga sẽn kũmd dogem.

²² La fo sã n yeel f sũurẽ: «Bõe n maane tɩ yell kãensã fãa wa lʋɩ mam zug woto?» Bãng tɩ yaa fo wẽnema sẽn ka tɛka yĩnga la b kolemd fo futu n ningd f yãnde.

²³ Etiopi ned tõeeme n tek a gãong bi? Ãbg tõeeme n tek a kõbg bi? La yãmba, yãmb sẽn tar yel-wẽna minungã, yãmb tõeeme n maan neer bi?

²⁴ Mam na n sẽeg-f lame, Zerizalɛɛm wala sobgo sẽn sẽegd mo-faado, zĩ-pɛɛlẽ.

²⁵ Fo pʋɩɩr la woto, fo zẽk-m-meng dolbo la woto. Woto yita mam nengẽ, yaa f Soaala-Wẽnda koɛɛga, tɩ ya maam f Wẽnda la fo yĩm yã, n dɩk f menga n kɩs zirẽ.

²⁶ Mam menga, maam f Wẽnnaam n na n kolemd f futã n ta f nenga, tɩ neb yãend f yãnde.

²⁷ Kato! Fo yooba tʋʋma, la fo sũ-nood wẽnsa kaasgã, f tʋʋm dẽgdã fãa sẽn wat ne f yãndã, m yãend-b-la fãa gilli. M yãenda tãmsa zutu, la wetẽ wã fãa, f wẽn-naandsa gilli! Kato! Zerizalɛɛm, bõe tɩ f pa rat n yɩlg ne f rẽgdã? Na n yɩɩ woto n ta da-bʋre?