Zeremi 12 - SEBR SÕNGO

¹ Soaala-Wẽnde, yãmb pida ne zemsgo, woto m zãr ne m maan zabr ne yãmba. M yaool n nongẽ lame n bãnge yaa bõe yĩnga la nin-wẽnsa yɛl baasd neere? Bõe tɩ sẽn ka tũud-b yãmba, vɩ b laafi vɩɩm?

² Bãmb sela wa tɩɩse b kɩɩda yẽgna, n bɩtẽ, n womd biisi. Yãmb yʋʋr pʋta b noorẽ tɩ b sũura yaool n zãr ne yãmba.

³ Yãmba, Soaala, yãmb mii maam, yãmb nee maam, yãmb dat n bãngame tɩ m kẽeda yãmba. Sã n ya nin-wẽnsa, m na n kos-y lame tɩ y wʋk-ba wala piisi n tees b kʋʋb zĩigẽ. Bĩng-y-b toore, kodg la f kõ-m sʋʋg raara yĩnga!

⁴ Ges-y wɛ, tẽnga na n paa ne sũ-sãanga n ta wakat bʋgo? Ges-y weooga mood fãa sẽn kʋɩ, na n talla woto n ta wakat bʋgo? Tẽnga rãmb wẽnem yĩnga, dũmsã tara kũum, tɩ b yaool n be tẽngre n gomda: «Soaala-Wẽnd ka ne d sẽn maand ye.»

⁵ Fo sã n pa tõe n tũ sẽn zoet-b ne nao, fo yɩta a wãn n wags ne wiidi? Soaalã n gomde. Fo sã n zoe n yɛɛsdẽ n nan ket tẽng sẽn ka tar tʋga, fo na n maan wãna Zʋrdẽ tʋga sʋka?

⁶ Ad-f saam-biisa menga, f buudu meng zãmba foo, yaa bɛɛb ka tɛka la b tigsd fo yĩnga. Da pelg f pʋg ne b ye, tɩ b na n goma ne foom gom noodo, goam sẽn zãr ne sɩda.

Wẽnd basda wẽnd doogã la b buudã

⁷ Mam basa roog ning sẽn da ya m roogã, m basda m sẽn da so wã fãa M basda bɛɛba nusẽ m sẽn da nong wa m fãa-fãa.

⁸ Mam neba yikame n na n yɩ toos ne maam. B yik n kelma maam wala weoog bõnyẽega; yaa rẽ la m pa nong-ba.

⁹ Sẽn da ya-b mam soolma bãmb n lebg luin neera sɩlsa sẽn laand n pʋgda bɩ? Bɩ b tigim we-rũmsa fãa gilli! B tall-b fãa n wa kibsa rɩɩb zĩigẽ!

¹⁰ Dũn-kɩɩmb wʋsgo waame n sãam mam bugsuntungu, b taba mam pʋʋgo, pʋʋga da yaa pʋ-sõngo; b kɩtame t'a lebg zĩ-peen-daaga.

¹¹ Tẽnga lebga sũ-sãang zĩiga, kʋʋr yãbre n yãbd a pʋgẽ. Tẽnga sãamame n dɩg m taoore la ned ka kũmd-a ye.

¹² Fãadba, tẽn-wãadba waa tãmsa zutu. Ad-y yaa wa Soaala zãada sʋʋg sẽn dɩte n vargd tẽnga fãa, la ned ba a ye ka na n põs ye.

¹³ Y ra bʋda alkam, la gõos la y na n wʋre; y namsa y meng zaalem bala, y ka rok yõod ye. Y kooda yãnd tar-y lame. Yaa Soaala-Wẽnd me sũura sẽn puug wʋsgã la y paam yãnd a woto fãa.

A Israyɛl yags bʋʋdo

¹⁴ Soaala-Wẽnd n yet woto, b buuda yags wẽnsa poorẽ: b saag n sɩɩsa vẽenem ning m sẽn da bẽeg n kõ a Israyɛl, m buudu. Woto ma me na rig-ba n yiis-b b tẽngẽ, wala m sẽn na n kẽ bãmb tẽngẽ n yiis a Zɩɩda kamba.

¹⁵ M sã n yiis m nebã n sɛ, m na yaool marsã n zoe b yagsa nimbãanega, n kɩt tɩ ned kam fãa kẽng a soolmẽ, tɩ ned kam fãa leb a tẽngẽ.

¹⁶ B ra zãmsa m buuda t'a wẽend ne a Baal yʋʋre. La b sã n tõog n zãms n vɩɩnd wa m neba sẽn tog n vɩɩndã, b sã n wẽend ne Soaala, ne Vɩɩm Naaba yʋʋre, bãmb me na paam zĩiga m buuda sʋka.

¹⁷ La b sã n ka rat n tũ dẽnna, m na n dig-b lame n yiisi, la b na menem moogo. Soaala-Wẽnd n gome.