Zakari 8 - SEBR SÕNGO

Wẽnd kãab noodo

¹ Dũni fãa Soaala taas-m-la koe-kãnga:

² «Maam, Naaba-Wẽnde, m nonga Zerizalɛɛm ne nonglem kãsenga, m nonglma ne a rʋʋga kʋɩlse.

³ Yaa rẽ me yĩng la m yeta tɩ m lɛɛg n wa kẽ Zerizalɛɛm, m lɛɛg n wa kẽe Siõ. B na n boola Zerizalɛɛm tɩ tẽn-sõngo, n bool Siõ tɩ Wẽnd tãnga, tãn-sõngo.

⁴ Ad Wẽnd noor gomde: nin-kẽemse, pʋg-yãanse, sẽn tikd-b rasaar fãa, na n leb n wa zĩnda Zerizalɛɛm.

⁵ Tẽnga na n le pida ne kom-bõonego, kom-dibli la kom-pugli la b na n le sigla b reem Zerizalɛɛm soya zutu.

⁶ Dẽ fãa wẽnda wa bũmb sẽn ka tõe n yɩ sɩda, ne Israyɛl bu-kella ye, la m tõeeme, maam, dũni fãa Soaala, tɩ sɩd yɩ boto.

⁷ M kãabd-y lame, m na n fãaga m buuda neba sẽn be pa-weere, yaanga bɩ nin-taoore.

⁸ M na n le tall-b lame n wa, tɩ b zĩnd Zerizalɛɛm tẽnsʋka. B na yɩɩ mam neba la mam me na n yɩɩ bãmb Wẽnnaam, tɩ m zã-b ne pʋ-peelem la zemsgo.»

⁹ Ad dũni fãa Soaala sẽn yete: «Bɩ y keng y sũuri, yãmb fãa sẽn ket n wʋmd kãab mood niyns m sẽn da yeel bãngdba tɩ b taas yãmbã, b sẽn waa n le sɩng wẽnd dooga meebã.

¹⁰ Pĩnda ned da ka le yaood ninsaalba la rũmsa tʋʋmd ye. Bɛɛba ra gɩdga yi ka n kẽ ka, tɩ rẽ wakatã tɩ m da basa neba tɩ b yũud taab zɩɩm.

¹¹ La marsã m ka na le maan ne bu-kellã wa m sẽn maan pĩnda ye.

¹² M na n waa ne laafi tẽng zugu. Bugsuntunda na n le woma biisi, tẽnga kood na n le sakame. Saaga na n le nii sõmbo; m na n kõ kũun kãens fãa m bu-kellã.

¹³ Zɩɩda la Israyɛl, yãmb wẽnega buud niynsi Soaala-Wẽnd sẽn yãk b rãmb bark tẽng zugu. Ad m sẽn fãagd-y marsã la y na n lebga buud ning sẽn pid ne Wẽnd barka kaseto. Woto wã da zoe-y rabeem ye, keng-y y sũuri!»

¹⁴ Dũni fãa Soaala yeta woto: «M sẽn da waa n yeel pĩnd tɩ m na n bas-y-la ne pɛta, y yaab rãmba sẽn da puug m sũura wakato, ad-y m da ka lebs m zelemd ye.

¹⁵ Marsã m lebsda m zelemde, m tʋllame marsã n maan Zerizalɛɛm la a Zɩɩda neere. Da zoe-y rabeem ye!

¹⁶ Ad yãmb sẽn tog n maan bũmb ninga: Togs-y taab sɩda, kao-y zemsg bʋʋdo, laafi bʋʋdo.

¹⁷ Da tʋlg-y wẽng ne taab ye, da wẽen-y wẽen-faad ye, tɩ yɛl a woto buud la m kis wa fãa-fãa, maam, Naaba-Wẽnde.»

No-loeer sẽn na n lebg a soaba

¹⁸ Dũni fãa Soaala taas-m-la koe-kãnga:

¹⁹ «M yet-y lame tɩ no-loeer niyns y sẽn maand kiuug a naas soaba, a nu soaba, a yopoe soaba, la piig soaba na n lebga a Zɩɩda yĩnga, kibs bɛd daare, sũ-noog daare. La y sẽn na n bao bũmb ning n yɩɩda yaa sɩda la laafi vɩɩm ne taaba.»

²⁰ Ad dũni fãa Soaala sẽn le paasde: «Bu-zẽmba la tẽns a taab neb ka tɛka na n le wa kẽe Zerizalɛɛm.

²¹ Tẽng a ye neb na n yeela tẽng a to rãmba: ‹Wa-y yã, wa-y tɩ d tɩ pʋʋs dũni fãa Soaala, wa-y tɩ d pẽneg-ba.› B na n paamame tɩ b leoke: d na n tũ-y lame.

²² N-ye! Neb kʋʋngo, tẽns sẽn tar pãng na n wa baoo maama Naaba-Wẽnde, Zerizalɛɛm, la b na n wa pʋʋs-m lame.

²³ Wakat kãnga, yaa maam, Naaba-Wẽnd, n yete, neb piig sẽn gomde goam toɛ-toɛ yã na n gãda Zʋɩf fuug noore n yeel-a: ‹Tõnd tʋl n wa zĩnda ne yãmb Zʋɩf rãmbã tɩ d wʋmame tɩ Wẽnnaam bee ne yãmba.› »