Zakari 7 - SEBR SÕNGO

No-loeere

¹ Dĩm a Dariyus naam yʋʋmd a naas soaba, Kislewu kiuugu, kiuug a wɛ soaba, kiuuga daar a naas soaba, Soaala-Wẽnd gomd kãnga n taa a Zakari.

² Betɛl tẽng neba tʋma a Sarezɛr la a Regem-Melɛk la tẽnga rãmb neb kẽere tɩ b kẽng dũni fãa Soaala roogẽ wã n tɩ yõk sɛɛga,

³ la b sok maan-kʋʋdba la bãngdba n ges sã n ket n yaa modgr ne bãmba tɩ b yãbe la b loe noor yʋʋmda kiuug a nu soaba wala b sẽn da sɩng n maandẽ?

⁴ Dẽ la dũni fãa Soaala kõ-m noore

⁵ tɩ m leok maan-kʋʋdba la tẽnga neba fãa: «Ade, yaa yʋʋm pisopoe rõanna la y loet noor la y yãbda, kiuug a nu soaba la kiuug a yopoe soaba, m sok n gese da yaa mam nonglem yĩnga la yãmb da maan boto bɩ?

⁶ Y sã n dɩtẽ la y yũuda ka y meng sũur la y noogd laa?»

⁷ Al pĩnd-pĩnda, bãngdba da zoe n taas-y-la m koeese. B kos-y lame tɩ y maan gũusgu ne yell a woto. Dẽ wakatã tɩ Zerizalɛɛm ne a tẽn-toosa da ket n vɩ ne laafi, tɩ tẽnga nug rɩtgo ne mogra noor ket n pid ne neba.

⁸ Soaala-Wẽnd goma ne a Zakari n yeel-a:

⁹ «Ad m sẽn da gomd n yet tɩ y maan gũusg ne bũmb ninga la woto: Kao-y bʋʋd ne sɩda la y vɩɩnd vɩɩm sẽn pid ne bʋgsem la nimbãan-zoeere, ãnkam fãa ne a saam-biiga.

¹⁰ Da yɩɩ nin-toose ne pʋg-kõore, ne kɩɩba, ne sãana, la naong soab ye, la y da tags tags wẽnse y sũurẽ ne taab ye.»

¹¹ Neba ka tʋlg n kelg-m ye; b yĩgsa maam; b yẽda b tʋba sẽn na n yɩlẽ n da tõog n wʋm ye.

¹² B kʋɩɩsa b sũuri wa kugr ninga sẽn ka tar mak-n-taag ne keglma ye. B pa tʋlg n kelg dũni fãa Soaala sẽn zãms-ba ne tẽn-kʋdem wẽnnẽ bãngdba ye. Yaa rẽ me yĩng la Soaala puug b sũur wʋsgo.

¹³ Soaala leok-b lame: «M sẽn waa n sagend-b tɩ b tũ m sẽn wilgã, b ka tʋlg n kelg-m ye, woto la mam me yeel tɩ m kõn leok-ba, b sẽn waa n yõkd m sɛɛga ye.

¹⁴ M sẽeg-b lame, n kẽes tẽnsẽ b sẽn da ka mi; woto b basa b poorẽ, tẽng sẽn lebg vɩʋʋgo, tɩ ned ka le yit bɩ a kẽeda a pʋgẽ ye. Woto b basame tɩ tẽng sẽn da ya tẽn-nooga lebg zĩ-peen-daaga.»