Zakari 6 - SEBR SÕNGO

Yãeeb a 8 soaba: Bilim-bilm a naase

¹ M le zẽka m neng yĩngri la ad m sẽn yãe: bilim-bilm a naase, n da yit tãms a yiib sʋka, la tãmsã da ya kutu.

² Wed-zẽese n da vuud pipi bilim-bilma; a yiib soaba wed-zɩlse

³ a tãab soaba wed-peelse: la a naas soaba yaa wed-bolle.

⁴ Tɩ m sok malɛkã sẽn da gomda ne maamã: «M zu-soaba, bilim-bilma ne b wiidã makda bõe?»

⁵ Tɩ Malɛka leok-ma: «Yaa dũni wã sobd a naasã. B ra bee dũni wã fãa Soaala taoore la b zãagda ne b marsã.»

⁶ Bilim-bilm ninga sẽn sog wed-zɩlsa teesa nug goabga. Wed-peelsa teesa nin-taoore. Wed-bola teesa nug rɩtgo.

⁷ Wed zẽesa kolgame la b kosame n na n saag tẽngã. Soaala yeel-b lame: «Kẽng-y, saag-y tẽngã.» La b saaga tẽngã.

⁸ Soaala boola maam n yeel-ma: «Ad sẽn dabd b nug goabgã na n tɩ sika mam Vʋʋsma beelẽ.»

A Zozuwe naam

⁹ Soaala-Wẽnd goma ne maam n yeel-m woto:

¹⁰ «Reeg sẽn be-b yembda tẽngẽ wã kũuni, a Eldayi, a Tobiya la a Yedaya sẽn tall n wa wã. La f kẽng a Sefaniya biiga, a Zosiya, yiri tɩ yaa be la sẽn yi-b Babilona waa n kẽ.

¹¹ F na n dɩka ligdã ne sãnema n maan naam pugla n fõgneg maan-kʋʋd kãsenga a Zosadak biiga, a Zozuwe.

¹² Dẽ poore bɩ f wilg-a: ‹Dũni fãa Soaala gomda woto: Ad-y ned n be ka n boond tɩ Bõn-Bulli. A sẽn taẽ fãa, a na bulame, la yẽnda n na n me m do-sõngã.

¹³ N-ye! Yaa yẽ n na n le me wẽnd doogã, yaa yẽ n na n ning naam teedo. A na n zĩnda a goeela zugu n dɩ naam m buuda zugu. Maan-kʋʋd la b na n zĩndg n yegl-a. Bãmb b yiiba sʋka no-koeemd buud kõn zĩnd ye.›

¹⁴ Naama pugl na n paa wẽnd doogẽ wã n tẽegd a Eldayi yelle, a Tobiya, a Yedaya la a Zosiya yelle. A Sefaniya biig a Zosiya sɩd yɩ kõt-zãng soaba.»

¹⁵ Neba na n yii yɩɩga n wa me wẽnd doogã, tɩ rẽ la y na n bãnge tɩ yaa dũni fãa Soaala n tʋm maam yãmb nengẽ. Sẽn wilga fãa na n taasame, yãmb sã n sakd neere Wẽnnaam, y Soaala.