Zakari 5 - SEBR SÕNGO

Yãeeb a 6 soaba: Kãab wẽng sebre

¹ M le zẽka m neng yĩngri la m yãee woto: sebre sẽn tõe n pil wa rebre n da laand yĩngri.

² Malɛkã sẽn da gomd ne maama yeelame: «Fo nee bõe?» Tɩ m leoke: «M nee sebr sẽn laande; a woglem yaa kãntɩɩs pisi, a yalem kãntɩɩs piiga.»

³ Tɩ malɛka yeel maam: «Woto yaa kãab wẽnga sebre, kãabg sẽn na n lʋɩ tẽnga fãa zugu. Sebra neng a ye gʋlsame tɩ b na n diga wagdba fãa n yiis tẽngã. Neng a to wã zugu b gʋlsame tɩ b na n maana boto me ne neb niyns fãa sẽn ka pidsd b pʋlengo.

⁴ Dũni fãa Soaala yetame tɩ yaa bãmb meng n kãabd kãab wẽngã. A na n lʋɩɩ wagdr fãa la pʋlen-vaal soab fãa zakẽ la mam yʋʋr yĩnga a na n paa be la fãa na sãame, dooga kuga wala a sugra da bɛda.»

Yãeebo a 7 soaba: pʋg-toaaga a ka mi sugri

⁵ Malɛkã sẽn da gomd ne maama kolg n yeel-m lame: «Zẽk f nenga n gese yaa bõe n watã!»

⁶ Tɩ m soke: «Yaa bõe?» T'a leoke: «Yaa peoogo sẽn pid ne tẽnga fãa yel-wẽna.»

⁷ La peooga ling sẽn da ya namdã fõkame, la m yãenda pag sẽn zĩ a pʋgẽ.

⁸ Tɩ Malɛkã yeele: «Yaa wẽnem naaba.» La malɛka tusa pagã n lebs peooga pʋga n yaool n lebs namda lingã n fõgneg a noorã.

⁹ M sẽn zẽk m neng yĩngri m yãee pagba a yiibu. B ra yɩgda yĩngri. Sobg n da tusd-ba la b ra tara pɩgs sẽn wẽnd kʋl-pesg rẽnna. Bãmb n tʋk peoogã n loog yĩngri.

¹⁰ Tɩ m sok malɛkã sẽn da gomd ne maamã, b sẽn tar-a n dabd zĩig ninga.

¹¹ T'a leok-ma: «B rabda Sinear tẽnga n na n tɩ me roog be a yĩnga, la b maneg zĩig be n dogl-a.»