Zakari 3 - SEBR SÕNGO

Yãeeb a Naas soaba: A Zozuwe

¹ Soaala-Wẽnd kɩtame tɩ mam yãe a Zozuwe, maan-kʋʋd kãsengã; a ra yɛsa yĩngri, Soaala malɛka taoore. Sʋtãan waa n yaasa maan-kʋʋda rɩtgo n na n dõd-a.

² Soaala malɛka yeela Sʋtãana: «Bɩ Soaala-Wẽnd pag f noorã, Sʋtãana, bɩ b pag f noorã tɩ bãmb yam n kẽ Zerizalɛɛm! A Zozuwe ka wẽnd ra-giiga b sẽn foog bugmẽ sɩda?»

³ A Zozuwe da yɛsa malɛka taoore, n yer fu-rẽgdo.

⁴ Tɩ malɛka na n yeel a tũud-n-taasã tɩ b yees a futã. A yaoolame marsã n yeel a Zozuwe: «M pidga f beegrã la m na n le yeelg-f-la kibs futu.»

⁵ A kõo noor tɩ b fõgneg pugl neere a Zozuwe zugu. Dɩlla, malɛka taoore b yeelga a Zozuwe fu-paala la b kõ-a-la pugla.

⁶ La Soaala malɛka yaool n zẽk a koɛɛg n yeel a Zozuwe woto:

⁷ «Ad dũni fãa Soaala sẽn pʋlemde: ‹F sã n deeg m noya, n tũ wa m sẽn datã, f na lebg m do-sõngã ne a zaka gũuda, la m na kẽes-f sẽn tʋmd-b mam tʋʋmda sʋka.› »

Wẽnd tʋʋm-tʋmda na n waame

⁸ «Kelg neere, Zozuwe, maan-kʋʋd kãsenga, yaa dũni fãa Soaala n gomde, kelg-y neere, yãmba, maan-kʋʋdba, a tũud-n-taase, yãmb fãa yaa fãagra sẽn wata makre. M na n waa ne sõgne b sẽn boond a soab tɩ Bullã.

⁹ Ad kugr la m na n dɩgl a Zozuwe taoore. Kugra yaa a ye la bõn-pɩndi a yopoe n be a zugu. Kug kãng zugu m na n gʋlsa m gʋlsem la daar a ye bala, m na n yẽesa tẽn-kãnga rẽgdã. N-ye, maam n yet rẽnna, mam dũni fãa Soaalã!

¹⁰ Badaare, Wẽnd n gomde, y na n boola taaba n sõse y sãbse, la y kankams tẽngre.»