Zakari 2 - SEBR SÕNGO

Yãeeb a yiib soaba: Yɩɩla

¹ Mam sẽn zẽk m neng yĩngri m yãenda bũmb a to: yɩɩl a naase.

² Tɩ m yeel Malɛkã sẽn da gomd ne maamã: «Bõe yɩɩl la woto?» T'a leoke: «Yaa bu-zẽmb niyns yɩɩl sẽn tã Zɩɩda, Israyɛl ne Zerizalɛɛm dãmb n sẽeg dũniya.»

³ La rẽ poore Soaala-Wẽnd wilg-m-la sẽeb a naase.

⁴ Tɩ m soke: «Nin-bãmba wat n na maana bõe?» Tɩ b leoke: «B wat n na n yɛɛsame la b tus n lub bu-zẽmb niyns sẽn yik zabre ne Zɩɩda tẽnga, n sẽeg a neba, la b maand b sẽn dat marsã.»

Yãeeb a 3 soaba: Wĩ-magdga

⁵ M sẽn le zẽk m nenga m yãee woto: Raoa sẽn zãad wĩiri a nugẽ n na n mage.

⁶ Tɩ m sok-a: «Fo rabda yɛ?» T'a leoke: «M dabd n na n tɩ maga Zerizalɛɛm n bãng a yalem ne a woglem sẽn zem tɛka.»

⁷ Malɛka sẽn da gomd ne maama, kolga malɛk a to sẽn da wat a segbo.

⁸ A kõ-a-la no-kãnga: «Zoe n tɩ wilg da-sãngã, sẽn zãad-a wĩirã tɩ Zerizalɛɛm ka tog m me lals n gũbg ye, tɩ neba la rũmsa sẽn na n vɩɩnd a pʋgẽ wã na n yɩɩ ka tɛka.»

⁹ Ad Soaala meng sẽn yete: «Mam meng n na n gũbg tẽnga wa bugum lalga la m na n puka m ziira be.»

Pa-weta boolgo

¹⁰ Maam, Naaba-Wẽnd, n gomd ne-yã: «Yãmb fãa m sẽn da sẽeg ween-vɩɩs a naasã, lɛɛg-y n zoe-y n wa-y yã! Bas-y nug goabg sẽnẽ rãmba la y wa!

¹¹ Zerizalɛɛm dãmb sẽn ya pa-wet Babilon, ning-y pãnga n zoe n wa!»

¹² Sɩda dũni fãa Soaala sẽn tʋm maama tɩ m wa taas-y b koe kãsenga, gomda woto ne buud niyns sẽn kẽes-b yãmb yemdo la b zɛ yãmbã: «Ned ning fãa sẽn le sɩɩsa yãmba, a soab bãng t'a sɩɩsa m fãa-fãa.

¹³ Ade, m na n yika ne bu-zẽmbã. Bãmb sẽn kẽes b rãmb yemdã na zɛɛ bãmb me, wa b sẽn zɛ b taabã. Woto, yɛla sã n wa pidsi, y na bãnge tɩ yaa dũni fãa Soaala n tʋm maam.»

¹⁴ Soaala le yetame: «Kɩdem n lange, Zerizalɛɛm, tɩ m wat n na n zĩnda yãmb sʋka.

¹⁵ Badaare, buud kʋʋng na n kẽe maam, dũni fãa Soaala, n lebg m buudu la yaa yãmb sʋk la m na n zĩndi. Dẽ sã n wa beẽ, y na bãng tɩ sẽn tʋma maam yãmb nengẽ wã yaa dũni fãa Soaala.

¹⁶ Soaala na n sooga a Zɩɩda wala b meng pʋɩɩre, b tẽn sõngẽ wã, la Zerizalɛɛm n na n yɩ b yamleoog tẽnga.

¹⁷ Sẽn vʋʋsda ne yõor yɩ sɩɩ, tɩ vugr bala Soaala na n yi-la b ro-sõngẽ.»