Zakari 14 - SEBR SÕNGO

Soaala Waoongo

¹ Ad Wẽnd sũ-puura daar sẽn wate; badaare, Zerizalɛɛm kẽedba, b na n pʋɩ-la y laoga fãa.

² Sɩda Soaala na n tigma bu-zẽmbã tɩ b bob zabr ne Zerizalɛɛm. B na n pãba tẽngã n deege, b na n zɛɛ rotã, b na n yõga pagbã, b na n basa tẽnga pʋɩ-sʋka, n loog pa-weer ne pʋɩ-sʋka.

³ Dẽ poore, Soaala-Wẽnd na n yii n zaba ne bu-zẽmba zabr menga.

⁴ Badaare b nao wã na n yaasa tãng zugu, tãng ning sẽn be Zerizalɛɛm yaangã, Oliviye tãngã. Tãngã na n wesga sʋka, al yaanga n digd taoore, n bas bãg-faag sʋka. Bogr a ye na n sergame n leb goabga tɩ bogr a ye serg n leb rɩtgo.

⁵ Zerizalɛɛm dãmba na n tũu bãg-faaga sẽn wedg sʋkã n paam n zoe n tɩ tãag Asal tẽnga. Y na n zoee wala y yaab rãmba sẽn maan Zɩɩda dĩm a Oziyas wẽnnẽ; y na n zoeeme, tẽnga sẽn na n miima yĩnga. Wakat kãng marsã la m Soaala-Wẽnd na n sigi tɩ nin-sõma fãa yãagd-ba.

⁶ Badaare, wĩntoog vẽenem bɩ kiuug vẽenem ka le tar tʋʋmd ye, waood la wulg kõn le zĩnd ye.

⁷ Daar n na n zĩndi, la Wẽnd bal n mi, zĩiga na n kell n yɩɩ vẽenega, b kõn bãng n welg wĩntoogo ne yʋng ye. Zaabr na n yɩɩ vẽenem.

⁸ Badaare, ko-vɩɩg n na n pusg Zerizalɛɛm. Kooma pʋɩ-sʋk na n kẽnga yaang mogrã, yamsem mogre, tɩ pʋɩ-sʋka me kẽng nin-taoore mogrã, Tẽnsʋk Mogre. Kooma na n zoe tʋʋlg wakato wa sẽoogo.

⁹ Wakat kãng la Soaala na n dɩ naam dũni fãa pʋgẽ. Bãmb bal la neba na n waoog wa b Wẽnde, ãndũni rãmb fãa na n gesa bãmb bala wala Wẽnde.

¹⁰ Tãmsã fãa sẽn gũbg Zerizalɛɛm na n lebga pʋto, al Geba sẽn be nug goabga n tɩ tãag Rimõ sẽn be nug rɩtgo. Zerizalɛɛm na n zao yĩngri. Tẽnga sɩngda a Bẽnzame dignoorã n tɩ tãag pipi Gõdrã; n sɩng no-kʋdgã, a Ananeyɛl ro-lug-lugã, n tɩ tãag b sẽn kõgd naab rãama zĩiga.

¹¹ Neb na tõog n kẽ n vɩɩnd tẽnga pʋga. Wãab kõn le wã ye la ned kam fãa na n zĩnda ne laafi. B na n kẽe be; kãab-wẽng kõn le zĩnd ye, b na n kẽe Zerizalɛɛm ne laafi.

¹² Ad sɩbgr ning Soaala-Wẽnd sẽn na n kõ neb niynsi sẽn na n zab ne Zerizalɛɛm: b na n kɩtame tɩ b yĩng põoge tɩ b ket n yɛs b nao zutu, b nini na n põoga b bogdẽ, tɩ b zelemde põog b noorẽ.

¹³ Wakat kãng la Soaala na n kɩt tɩ b rig rabeem kãsenga. Ned kam fãa na n yik n teega ne a yaka.

¹⁴ Zɩɩda rãmb na n zabame n fãag Zerizalɛɛm. A na deega a yagsa laoga fãa. B na n wʋka sãnem, wanzurf la fut ka tɛka.

¹⁵ Yel-beed ning sẽn na n pak ninsaalba na n paka rũmsã. Bɛɛba wiidi, b bõn-weese, b yʋgma la b bõeense, fãa na n kiime.

¹⁶ Tẽns niynsi sẽn zab-b ne Zerizalɛɛm, neb niyns fãa sẽn põs-ba na n waa Zerizalɛɛm yʋʋmd-yʋʋmd fãa n wõgemd dũni fãa Soaala taoore n waoog-ba, la b maan Sẽgda kibsa.

¹⁷ Buud ninga sẽn ka kẽnga Zerizalɛɛm n waoog dũni fãa Soaala, a bãng t'a kõn paam sa-koom ye.

¹⁸ Ezipt buudã sã n ka kẽng Zerizalɛɛm n maan Sẽgda kibsa, a na n paam sɩbgr ning Wẽnd sẽn sɩbgd tẽns niynsi sẽn ka maand Sẽgda kibsã.

¹⁹ Yaa woto la b na sɩbg tẽns niynsi sẽn ka na n kẽng b Zerizalɛɛm n tɩ maan Sẽgda kibsa.

²⁰ Wakat kãnga b na n gʋlsa wiidi wã loamba zutu: Soaala-Wẽnd soolem. Wẽnd dooga rʋgdã, rʋgd zaalsã, fãa na n lebga Wẽnd soolem wa zɩ-mesdma laase, sẽn dɩg maan-kugra taoore.

²¹ La rʋgda fãa sẽn be Zerizalɛɛm la Zɩɩda na n lebga dũni fãa Soaala soolem. Neb niyns fãa sẽn dat-ba n kʋ maoongo na wa n dɩk-ba n dʋg b nemdo. Wakat kãng sã n wa ta, lɛɛbdba kõn le zĩnd dũni fãa Wẽnda roogẽ ye.