Yikri 9 - SEBR SÕNGO

-5- Ezipt rãmb rũms kiidame

¹ Soaala-Wẽnd yeela a Moyiiz: «Kẽng dĩma nengẽ n tɩ yeel-a woto: Ad Soaala-Wẽnd, Ebre rãmb Wẽndã, sẽn yete: bas m neba tɩ b loog n tɩ waoog-ma.

² F sã n zãgse, tɩ b le kaoos ka, n pa looge,

³ Soaala nug na n sɩɩsa f rũmsã sẽn be bãoogẽ: wiidi, bõeense, yʋgma, niisi, rũm-bõonese; bã-toaag n na n loog ne b fãa gilli.

⁴ Soaala-Wẽnd na n welga a Israyɛl rũmsa toore la b rũng ba a ye kõn ki ye.»

⁵ Soaala-Wẽnd yãka raare, b yeelame tɩ yaa beoog la b na n yãe yel-bãnda Ezipt tẽnga.

⁶ Beoog sẽn vẽege, Soaala-Wẽnd sɩd pidsa b kãabgo, Ezipt rãmb rũmsa fãa kii gill kasi. A Israyɛl rũng ba a ye ka ki ye.

⁷ Dĩma kɩtame tɩ b saag n ges la yɩɩ sɩda, a Israyɛl rũng ba a ye ka ki ye. Ne rẽ fãa dĩma pa sak tɩ b loog ye.

-6- Nod-tãoodr namsda Ezipt rãmba

⁸ Soaala-Wẽnd yeela a Moyiiz ne a Aarõ: «Kõdg-y rʋk vũundu n pids y nugu la y sã n ta dĩma taoore bɩ a Moyiiz lob a rẽnd yĩngri.

⁹ Bug-vũunda na n yɛdga wala wubs-bãanega, n kẽ Ezipt tõre tɩ rũmsa ne neba yĩns pus yũya.»

¹⁰ B taa rĩma nengẽ ne rʋk vũundu t'a Moyiiz lob vũunda yĩngri tɩ rũmsa la neba yĩns pus yũya.

¹¹ Tɩta rãmb ka tõog n wa a Moyiiz taoore ye, tɩ yũya ra pusa bãmb me wala Ezipt rãmb fãa.

¹² Soaala-Wẽnd kidba dĩma sũuri la wala b sẽn da pĩnd n togsã, a zãgsa a Moyiiz la a Aarõ kelgre.

-7- Sapɩlem sãamda kood la rũmsi

¹³ Soaala-Wẽnd kõ-la a Moyiiz no-kãnga: «Sãd beoog pĩnd n kẽng dĩma nengẽ. Yeel-a tɩ Ebre rãmb Wẽnnaama goma woto: bas m neba tɩ b yi n tɩ waoog-ma.

¹⁴ Yeel dĩma tɩ marsã wã yẽ, m datame tɩ yel-beed buud fãa lʋɩ a zugu, n lʋɩ a poorẽ dãmba zugu t'a yaa n bãng tɩ m ka tar m to moog ye.

¹⁵ M sã n da kɩtẽ tɩ bãag ninga sẽn kʋ a rũmsa yõkẽ yẽnda me ne a poorẽ dãmba, marsã tɩ d zĩig zãrẽ.

¹⁶ M bas-a lame n ka kʋ ye t'a bãng m pãnga la a pẽg m yʋʋr tɩ ta tẽnga satmẽ.

¹⁷ A ket n maanda tɩtaam ne m kambã n pa rat n bas-b tɩ b loog ye.

¹⁸ La ade, beoog yibeoog pĩnd-pĩnda, sapɩlem n na n wa ne pãnga, wala b sẽn zɩ n yãend a taar Ezipt tẽng ye.

¹⁹ Yeel-a t'a bao zĩig n solg a rũmsi la bũmb ning fãa a sẽn so, tɩ kẽnd yɩnga. Bũmb ning fãa sẽn be yɩnga, ninsaal bɩ rũnga, tɩ b pa tall-a n wa yiri, sapɩlem n na n kʋ.»

²⁰ Dĩma poorẽ dãmba wʋma Wẽnd sẽn dat bũmb ningã la b yɛɛsame la b bao zĩig b zakẽ n ning b yem-daad la b rũmsi.

²¹ Kẽer n yaool n tẽ tɩ Soaala-Wẽnd gomd yaa belgre la b basa b yem-daado la b rũms tɩ pa yɩnga.

²² Soaala-Wẽnd yeela a Moyiiz: «Zẽk f nug n tees yĩngri tɩ sapɩlem dʋʋg Ezipt tẽng tõre, n pãb neba, n pãb rũmsi la sẽn be pʋtẽ, Ezipt tẽn-peelmẽ.»

²³ A Moyiiz zẽka a dasaar n tees yĩngri la saag tãsame, tɩ sapɩlem dʋʋg zĩig zãnga.

²⁴ Saaga yãgdame tɩ sapɩlma dʋʋgdẽ la sapɩlma da fõta ne pãnga wa b sẽn zɩ n yãend a taar Ezipt tẽnga, a sẽn sɩng n yet t'a yaa tẽnga.

²⁵ Ezipt tẽn-peelma zãnga, sapɩlma sãama sẽn da be yɩng fãa. A kʋʋ neb la rũmsi, a kʋʋsa tẽnga mood fãa la tɩɩse.

²⁶ Yaa Gosen tẽng bal n põse, yaa be la Israyɛl kamb da kẽeda.

²⁷ Dĩma tʋmame tɩ b tɩ bool a Moyiiz ne a Aarõ la a yeel-b lame: «Marsã m deega m kongre. Wẽnd n so bʋʋm la maam ne m nebã n konge.

²⁸ Pʋʋs-y tɩ sa-tãsa la sapɩlma yaas tɩ m na bas-y tɩ y looge la kõn kaoos ye.»

²⁹ T'a Moyiiz yeel-a: «M sã n yɩ tẽngã, m na pʋʋs Soaala tɩ sa-tãsa la sapɩlma yalse tɩ f bãng tɩ Soaala-Wẽnd n so tẽngã.

³⁰ La ka foo bɩ f poorẽ dãmba n na n zoe Wẽnd nif ye, dẽ yaa vẽenega.»

³¹ Beren-dɩga la alkam pugsgu sãama zãnga; alkam pugsga da zoe n wekame, la beren-dɩga da zoe n yaa puudu.

³² Alkam pɛɛlga la alkam gilsã n põse tɩ bãmb yaa yaoose.

³³ A Moyiiz yii Ezipt dĩma nengẽ, n yi tẽnga zãnga, n tẽeg a nus n tees Naaba-Wẽnde tɩ sa-tãsa la sapɩlma yaase. Saaga sɩd ka le ni ye.

³⁴ A sẽn mik tɩ saaga pa le niida, tɩ sapɩlem pa le rʋʋgdẽ, tɩ sa-tãsa ka le tãsdẽ, dĩma le rɩka a pĩnd zʋgo.

³⁵ A kidba a sũuri, yẽnda ne a poorẽ dãmba, n pa sak tɩ Israyɛl kamb loog ye, wala Wẽnd sẽn da zoe n wilgi.