Yikri 8 - SEBR SÕNGO

¹ Wẽnnaam yeela a Moyiiz: «Kõ a Aarõ no kanga: tẽeg f nug la f dasaarã, kʋɩlga zugu, ko-soy wã la tãnagda zugu, n kɩt tɩ loms kẽ Ezipt tẽnga.»

² A Aarõ tẽega a nug Ezipt kʋɩlga zugu la loms yiime n deeg Ezipt tẽng n yãmbe.

³ La ne b rabaar la b tɩto, Ezipt rãmb me tõogame tɩ lomsa yi n pid tẽngã.

⁴ Dẽ la dĩma bool a Moyiiz ne a Aarõ n yeel-ba: «Pʋʋs-y Soaala-Wẽnd t'a zãag lomsã ne maam la m poorẽ dãmba tɩ woto m na bas-y tɩ y tɩ kʋ y maoongã n waoog y Wẽnnaam.»

⁵ T'a Moyiiz leoke: «Wilg maam sẽn ya wakat ning la m na n pʋʋs f yĩnga, f zak rãmb yĩnga, f neba fãa yĩnga, tɩ lomsa zãage ne foom ne f zaka, ne f poorẽ dãmba, ne f neba fãa, n pa kʋɩlga pʋgẽ bala.»

⁶ Tɩ dĩma leoke: «Beoog bala.» A Moyiiz yeelame: «M na maan wala f sẽn datã la woto f na bãng tɩ tõnd Wẽnnaam ka be taar ye.

⁷ Lomsa na n zãaga ne foom, ne f yirã, ne f poorẽ dãmba, ne f soolma fãa; kʋɩlga pʋgẽ bal la b na n kelle.»

⁸ A Moyiiz ne a Aarõ loogame n bas dĩma la b pʋʋsa Wẽnde tɩ lomsa zãage.

⁹ Wẽnnaam deega a Moyiiz kosgo, lomsa kii rotẽ, zagsẽ, pʋtẽ.

¹⁰ B wʋk-b lame n sam la tẽnga fãa lebga yũugu.

¹¹ Dĩma sẽn paam laafi, a le kidba a sũuri, wala Soaala-Wẽnd sẽn da wilgi, n zãgs a Moyiiz ne a Aarõ kelgre.

-3- Rũm-pigli namsda Ezipt rãmba

¹² Soaala-Wẽnd yeela a Moyiiz: «Kõ a Aarõ no-kãnga: tẽeg f nug n wẽ tẽnga tom ne f dasaarã tɩ lebg rũm-pigli, n pid Ezipt tẽnga.»

¹³ A Aarõ zẽka a nug n wẽ tẽnga ne a dasaare. Rũms yiime n na n wãb bũmb fãa. Tẽnga tom gill tedgame n legb rũm-pigli.

¹⁴ Bagbã la tɩt rãmb makame n na n bool dũm-pigli la b pa tõog ye. Rũmsa wãba ninsaalba la bõn-vɩɩli wã fãa.

¹⁵ Dẽ la tɩta rãmb leok dĩma: «Woto yaa Wẽnd tõogo.» La wala Soaala-Wẽnd sẽn da togsã, Ezipt dĩma le kidba a sũur n paase, a zãgsa a Moyiiz ne a Aarõ kelgre.

-4- Keooda sɩbgda Ezipt rãmba

¹⁶ Soaala-Wẽnd yeela a Moyiiz: «Sãd beoog pĩnd n tɩ yaas dĩma sora zugu, a sã n wa rabd kʋɩlgẽ. F na yeel-a: Soaala-Wẽnd koɛɛg la woto: bas m neba tɩ b loog n tɩ waoog-ma.

¹⁷ F sã n zãgse, yaa keooda la m na n tʋm tɩ b wa kẽ f zakẽ, f rotẽ, f neba zagsẽ la b rotẽ. B na n pida Ezipt rota fãa la tẽnga fãa.

¹⁸ Yaa Gosen tẽng bal la m na n welg toore tɩ be yaa m neba tẽnga la keoodr kõn ta be ye. Woto f na bãng tɩ maam a Naaba-Wẽnde n be f soolma tẽnsʋka.

¹⁹ M na n welga m buud ne fo rẽnna la yaa beoog bala la keooda wã wata.»

²⁰ Soaala-Wẽnd maana wala b sẽn yeele la keooda ka tɛk kẽe dĩma zakẽ, n kẽ a meng rotẽ, n kẽe a neba rotẽ n kẽ Ezipt tẽnsa fãa n yaal-b zãnga.

²¹ Dĩma boola a Moyiiz la a Aarõ n yeel-ba: «Bao-y zĩig tẽnga pʋgẽ n kʋ y maoongã n waoog y Wẽnde.»

²² T'a Moyiiz leoke: «Tõnd pa tõe rẽ ye. Tõnd sẽn koot dũms niynsã, Ezipt rãmb get-b-la wa wɩɩbdo; tõnd sã n kʋʋd b nifẽ bũmb b sẽn kisi, b kõn lab tõnd ne kug sɩda?

²³ Dẽn tõnd kẽn da-yɩten-daar kẽnde n ta we-raoogẽ, n kʋ d maoong n waoog Naaba-Wẽnde, n kʋ maand niyns b sẽn na n wilg-du.»

²⁴ Dẽ la dĩma yeel yã: «M na bas-y tɩ y yi n ta we-raoogẽ n kʋ maoong n waoog y Soaala-Wẽnde, la rẽnd yamb me kãabe tɩ y kõn zãag zĩig ye, tɩ y na tẽeg m yelle.»

²⁵ A Moyiiz yeelame: «M sã n yi ka bala m na n sɩnga Soaala pʋʋsgo la beoog yibeoog tɩ keooda wã basa dĩma laafi yẽ ne a poorẽ dãmb la a soolem dãmba. La naaba me maan sugri n da le belg-d ye la a bas d buudã t'a tɩ maan a maoongã.»

²⁶ A Moyiiz yii dĩma zakẽ la a yõka Soaala sɛɛga,

²⁷ la b deega a kosgo la keooda wã zãaga ne dĩma, ne a poorẽ dãmba, ne a soolma rãmba, a ye meng ka kell ye.

²⁸ La Dĩma baas n le kidba a sũur, n zãgs tɩ b kõn loog ye.