Yikri 7 - SEBR SÕNGO

¹ Soaala-Wẽnd leoka a Moyiiz: «Ade, m na n kõ-f-la Wẽnd tõog, Ezipt dĩma taoore la f kẽem, a Aarõ, n na n yɩ f no-rɛɛsa.

² Mam sẽn yet tɩ f togs bũmb ninga la f na n togse la f kẽem, a Aarõ, na reeg-a n taas dĩma la a na bas Israyɛl kamba tɩ b yi a tẽngẽ.

³ M na n kɩtame tɩ dĩma yɩ zãgsda tɩ m maan bõn-bãna la yɛl-soalma ka tɛk, Ezipt tẽnga.

⁴ M miime tɩ Ezipt naaba ka na n sak n kelg-y ye la m na maan Ezipt pãnga n yiis m buudã ne a tãb-biisã la na n yɩɩ pakre tɩ m sɩbg Ezipt rãmb wʋsgo.

⁵ Na n yɩɩ tɩlɛ ne Ezipt rãmba fãa tɩ b reeg tɩ maam la Soaala-Wẽnde, tɩ m na n zẽka m nug n sɩbg-ba n paam n yiis Israyɛl kamb b tẽngẽ.»

⁶ A Moyiiz la a Aarõ sakame n tũ Soaala-Wẽnd noora zãnga.

⁷ A Moyiiz yʋʋm da yaa pis-nii t'a Aarõ dẽnd ya pis-nii la a tãabo, b sẽn waa n tɩ yãend Ezipt dĩma.

YEL-BEED LƲƖTA EZIPT TẼNGA A Moyiiz dasaara lebga waafo

⁸ Wẽnnaam yeela a Moyiiz:

⁹ «Dĩma sã n yeel-y tɩ y maan bõn-bãnde, bɩ f yeel a Aarõ t'a rɩk a dasaarã n lob a taoore t'a na lebg wag-bãnde.»

¹⁰ A Moyiiz ne a Aarõ kẽnga dĩma taoore la b maana wala b sẽn da yeel-bã. A Aarõ loba a dasaarã dĩma taoore, a neba taoore, la dasaara lebga wag-bãnde.

¹¹ Naaba me boola neb sẽn tar yam zulunga, a bagba la a tɩt rãmba. Bãmb me tõogame n maan bõn-bãnd kãnga.

¹² Ned kam fãa loba a dasaare tɩ dasaar fãa tedg n legb wag-bãnde la a Aarõ dasaara vel-b-la zãnga.

¹³ Ne rẽ fãa dĩma kidba a sũuri, a ka kelg a Moyiiz ne a Aarõ ye.

-1- Koom lebgda zɩɩm

¹⁴ Soaala-Wẽnd yeela a Moyiiz: «Dĩma yaa zug koɛɛng soaba, a zãgsame tɩ m neba kõn loog ye.

¹⁵ Kẽng, beoog yibeoogo, n tɩ yãend-a, a sẽn wat n dabd kʋɩlgẽ; gũ-a kʋɩlga noore, zã dasaar ning sẽn tedg n legb waafã, f nugẽ.

¹⁶ Gom ne dĩma woto: Soaala-Wẽnde, a Israyɛl Wẽndã tʋma maam f nengẽ tɩ m wa yeel-fo: bas m neba tɩ b yi n tɩ waoog-m we-raoogẽ. Sẽn ta marsã, fo yẽda f tʋba.

¹⁷ Ad-m sẽn yet-fo: ges bũmb ning sẽn na n wilg tɩ maam la Soaala-Wẽnde: m na n dɩka dasaarã m sẽn zãadã n wẽ kʋɩlga koom la a na n lebga zɩɩm.

¹⁸ Kʋɩlga zĩma fãa na n kiime, b na n põogame, kooma na n lebga yũugu la Ezipt rãmb na n maka a yũub n konge.»

¹⁹ Soaala-Wẽnd yeela a Moyiiz: «Gom ne a Aarõ: dɩk f dasaarã, tẽeg f nug Ezipt kʋɩlga zugu: A ko-soy wã, a ko-ralma, a ko-bao wã, a bãtã, a bulsã, koom sẽn tõe n tẽgnẽ fãa, tɩ fãa na lebg zɩɩm; laoka peesa ne kugri, bɩ a peesa ne raoogo, koom sẽn tẽgen a pʋgẽ fãa na lebg zɩɩm.»

²⁰ A Moyiiz ne a Aarõ maana wala Soaala sẽn togs-bã. A Aarõ zẽka a dasaare, dĩma ne a poorẽ dãmb nifẽ, n wẽ kʋɩlga koom la a lebga zɩɩm zãnga.

²¹ Kʋɩlga zĩma kiime, kʋɩlga lebga yũugu, a kooma ra ka le tõe n yũ ye. Ezipt tõr lebga zɩɩm.

²² Ezipt bagba la b tɩt-rãmb me tõog n maana boto tɩ dĩma na n kidb a sũur n paase; wala Soaala-Wẽnd sẽn da yeelã, a zãgsa a Moyiiz ne a Aarõ kelgre.

²³ Dĩma gesa rẽ fãa wa zaalem la a leba a zakẽ.

²⁴ Tẽnga rãmb kong n tuu buls kʋɩlga noore, tɩ kʋɩlga meng koom da ka le tõe n yũ ye.

²⁵ Sẽn maan dasem a yopoe, bõn-bãnd a to n le maane.

-2- Loms reega Ezipt tẽng n yãmbe

²⁶ Soaala-Wẽnd yeela a Moyiiz: «Ta dĩma nengẽ la f yeel-a: Soaala-Wẽnd koɛɛg la woto: bas m neba tɩ b loog n tɩ kʋ maoong n waoog-ma.

²⁷ F sã n ka sake m na kɩt tɩ loms deeg tẽnga fãa n yãmbe.

²⁸ Kʋɩlga na n pida ne lomse. B na n yiime n kẽ f zakẽ, n kẽ f do gãagẽ, n dʋ f gãag zugu. Na n yɩɩ boto me ne f poorẽ dãmba, ne f neba fãa. Bur wʋnga, bura sẽn bĩngd zĩig ninga, fãa na pida ne lomse.

²⁹ Lomsa na n lolma foo, f poorẽ dãmba, f sõgen-kambã.»