Yikri 5 - SEBR SÕNGO

Pipi sɛk ne Ezipt dĩma

¹ A Moyiiz ne a Aarõ waa n tɩ yãenda Ezipt tẽng dĩma n yeel-a: «Soaala-Wẽnde, a Israyɛl Wẽnnaam, n yet woto: Bas m neba tɩ b yi n tɩ maan kibs mam yĩng we-raoogẽ.»

² Tɩ dĩma yeele: «Fo Wẽnda la ãnna tɩ m tog n deeg a noor n bas a Israyɛl t'a looge? M ka mi, ba sẽn paoode, fo Wẽnda sẽn ya a soab ye, m kõn sak t'a Israyɛl loog ye.»

³ A Moyiiz ne a Aarõ yeel-a lame: «Yaa Ebre rãmb Wẽnnaam n lik tõndo. Woto wã, kõ-y tõnd sor tɩ d kẽn da-yɩten-daar kẽnde, n ta we-raoogẽ wã n kʋ maoong n waoog bãmba. Sã n ka rẽ b na n kʋ-d-la ne sʋʋga bɩ ne nod-tãoodre.»

⁴ Dẽ la Ezipt dĩma leok yã: «Yaa bõe la yãmb baooda, Moyiiz ne a Aarõ, n na n sãam neba tʋʋma? Leb-y y tʋʋmnẽ!»

⁵ Dĩma le paasame: «Neba sẽn lebg wʋsga la yãmb na n kẽ sʋk n sãam tʋʋma?»

Dĩma noore

⁶ Badaare bala, dĩma kõo sẽn get-b tʋʋma la sẽn gʋlsd-b sɛba noor kãngã:

⁷ «Da le bao-y moodo n kõ nin-bãmba tɩ b wẽed tãn-koɛɛma wala y sẽn da maand pĩnda ye. B kẽng b toore n tɩ bao moodo.

⁸ La modg-y-ba tɩ b paam tãn-koɛɛm wala zaamẽ la rabɩtẽ. Tãn-koɛɛma sõor pa tog n woog ye. Israyɛl kamba yaa kʋɩɩm dãmba, yaa rẽ la b sẽn yetã: d kẽng n tɩ kʋ maand Soaala-Wẽnd yĩnga.

⁹ Paas-y b tʋʋmna tɩ b da le paam n vʋʋs ye la b ra le paam vɩʋʋg n gomd zirẽ-be-goam ye.»

¹⁰ Sẽn da get-b tʋʋma la sẽn gʋlsd-b sɛba tɩ yeela zãma wã: «Dĩma noor la woto: M ka na n le kõ-y mood ye.

¹¹ Kẽng-y y toore n tɩ bao moodã y sẽn tõe n paam zĩig ning fãa. La tʋʋmd ka be y sẽn da tʋmd pĩnda, y sẽn ka na n kell n tʋm ye.»

¹² Zãma wã sẽega zãnga n na n bao moodo n wa wẽ tãn-koɛɛma.

¹³ Sẽn get-b tʋʋma da tãsd-b lame: Y tog n paama y sẽn paamd daar fãa wala b sẽn waa n baood moodã n kõt yãmbã.

¹⁴ B kɩtame tɩ b pãb sɛb gʋlsdba, dĩma sẽn da tũus Israyɛl kamba sʋka; b ra pãbd-b lame la b sokdẽ: Bõe tɩ zaame la rũnna y tãn-koɛɛma sõor pa ta y sẽn da paamd dasem kam?

Sɛb-gʋlsdba leokre

¹⁵ Israyɛl kamb sẽn gʋlsd-b sɛba waa n guglma ne dĩma: «Bõe tɩ y tar y yemsa woto?

¹⁶ Tõnd ka le paamd mood sẽn kʋʋs ye la b pʋgda tõnd wakat buud fãa, tɩ yaa: wɩng-y ne tãn-koɛɛma, wɩng-y ne tãn-koɛɛma! Tõnd meng n le paamd pãbre. Dẽ ka segd ye!»

¹⁷ Dĩma leok-b lame: «Yãmb yaa kʋɩɩm dãmba, kʋɩɩm dãmb menga, yaa rẽ la y sẽn yete: tõnd dat n tɩ kʋʋ maoong n kõ Soaala-Wẽnde.

¹⁸ Yik-y tao n leb y tʋʋmnẽ! Moodã, y kõn paam-a, la sõng-y tɩ tãn-koɛɛma sõor taase.»

Israyɛl kamb sũur pa noom ye

¹⁹ Seb gʋlsdba yika ne yɩɩre b sẽn wʋm tɩ b yet-ba: Tãn-koɛɛma y sẽn tog n paam daar fãa wã, da sak-y tɩ b sõora paoog ye.

²⁰ B yi-la dĩma nengẽ n zoe n ta a Moyiiz la a Aarõ nengẽ. Bãmb me ra gũud-b lame.

²¹ La b yeel-b lame: «Bɩ Soaala ges y sẽn maana la b ning-y taale. Yãmb kɩtame tɩ dĩma ne a poorẽ dãmb maand beem ne tõndo; yaa wa y rɩka sʋʋg n ning b nugẽ tɩ b kʋ tõndo.»

²² A Moyiiz lɛɛg n waa Soaala-Wẽnd taoor n yeele: «Soaala, bõe tɩ yãmb namsd y nebã, bõe tɩ y kõ maam tʋʋm kãnga?

²³ Mam sẽn wa Ezipt dĩma nengẽ tɛka, m sẽn wilg yãmb daabã, a namsda y nebã la yãmb ka maand fɩ n na n fãag-b ye.»