Yikri 40 - SEBR SÕNGO

Sɛka roog tiib la a bark ningri

¹ Soaala-Wẽnd yeela a Moyiiz:

² «Ti ro-sõnga pipi kiuuga pipi raare.

³ Ning kuga walsa koglg a pʋgẽ, peen-lilla poore.

⁴ Wa ne te-roagendgã ne a teedã, n ning bũmb fãa a zĩigẽ. Wa ne fitil kãsenga la f widg a bugma.

⁵ Dɩgl yũ-noog maan-kugra kuga walsa koglgo taoore, yagl peen-lillã.

⁶ Dɩgl tɩdara maan-kugrã dooga noore, sɛka rooga noore.

⁷ Dɩgl ko-sĩnga sɛka roog ne maan-kugra tẽnsʋka la pids-a ne koom.

⁸ Ka zaka pɛɛla la yagl zaka noor peennã.

⁹ Dɩk kaama n taag roogã la bũmb ning fãa sẽn be a pʋgẽ. Dɩk-ba n kõ Soaala-Wẽnd tɩ b lebg bũmb sẽn ya sõng zãng-zãnga.

¹⁰ Taag yũ-noog maanda maan-kugr, ne a teeda fãa, ne ka-sõngo n dɩk-ba n kõ Soaala-Wẽnde tɩ b lebg bũmb sẽn ya sõng zãnga.

¹¹ Taag ko-sĩnga ne a sãngrã tɩ b lebg bõn-sõma.

¹² Kɩt t'a Aarõ ne a kamba kolg roogã n so koom.

¹³ Dẽ poore yeelg a Aarõ a tʋʋmna futu la f taag-a kaam n dɩk-a n kõ Wẽnde t'a tʋm maan-kʋʋr tʋʋmde.

¹⁴ Kɩt t'a kamba me kolg tɩ f yeelg-b futu.

¹⁵ Taag-b kaam tɩ b tʋm maan-kʋʋr tʋʋmde. Kaama na n kõ-b-la maan-kʋʋr naam yʋʋm sẽn tong taab n ka be sɛɛbo.»

A Moyiiz reegda Wẽnd noore

¹⁶ A Moyiiz deega Wẽnd noor n maan fãa wa b sẽn da wilgã.

¹⁷ Yʋʋmd a yiib soaba, pipi kiuugã pipi daare, b tii roogã.

¹⁸ A Moyiiz kɩtame tɩ b reng n dɩgl te-sendsã n yaool n ning ra-lug-yalemsã, ra-paadsã, ra-lug-gilsã.

¹⁹ B yɛdga sugra pɛɛl, wa Soaala-Wẽnd sẽn da wilgã.

²⁰ B rɩka kuga wals koglgo n kẽes rooga pʋga; b ninga a ra tuiidsã la b rɩka a lingã n dogl a zugu.

²¹ B kẽesa kuga walsa koglga rooga pʋga la b yagla peen-lillã n na n solg-a wala Soaala sẽn da wilg a Moyiiz.

²² B kẽesa te-roagendgã sɛka roogẽ, nug goabga, peen-lilla taoore.

²³ B tẽgna burã Soaala-Wẽnd taoore, wala b sẽn da wilg a Moyiiz.

²⁴ B ninga sãnem fitil kãsenga sɛka roogẽ, dooga rɩtgo, t'a tot te-roagendgã.

²⁵ B yõgna bugma, wa Soaala-Wẽnd sẽn da wilg a Moyiiz.

²⁶ B rɩgla sãnem maan-kugrã sɛka roog pʋga, peen lilla taoore.

²⁷ B yõoga a zugu tɩdar bãaneg sẽn tar yũ-noogo, wala b sẽn da togs a Moyiiz.

²⁸ B yagla peenna sɛka roog noore.

²⁹ B yalsa yũ-nood maan-kugrã sɛka roog noore n kʋ maand a zugu, yũ-noog maoongo la b kõo bõn-koodi kũuni, wala Soaala-Wẽnd sẽn da togs a Moyiiz.

³⁰ B rɩgla ko-sĩngã maan-kugrã ne sɛka roog tẽnsʋka la b pids-a-la koom, waasg yĩnga.

³¹ Yaa ko-kãng la a Aarõ ne a kamba da tar n pegd b nusi la b nao.

³² B sã n da kẽed sɛka roogẽ bɩ b sã n da kolgda maan-kugrã, b da rengd n peka b mense, wala Soaala-Wẽnd sẽn da togs a Moyiiz.

³³ A Moyiiz yagla zaka pɛɛla n gilgi sɛka roogã la maan-kugrã. A yagla zaka noor peenda me. Yaa woto la a Moyiiz baas rooga tʋʋma.

Wẽnd kẽeda b roogẽ

³⁴ Sawadga luda sɛka roogo la Soaala-Wẽnd pids-a-la ne b ziiri.

³⁵ A Moyiiz ka tõog n kẽ rooga pʋg ye tɩ sawadga ra lud-a lame la Wẽnnaam da pids-a-la ne b ziiri.

Sawadg n wilgd Israyɛl kamb sore

³⁶ B sẽn da ta zĩig ning fãa n yalse b paada zĩ-kãnga tɩ sawadga wa zẽk n loog n bas sɛka roogo tɩ bãmb me yaool n sɩng kẽnde.

³⁷ Sawadga sã n ka yiki, bãmb me yɛs n gũud-a lame.

³⁸ Wĩntoogo, sawadga ra yɛsa sɛka roog zugu la yʋngo a widigda bugum tɩ Israyɛl kamba fãa be b zagsẽ n ne-a. La b sẽn yals zĩig ning fãa yɩɩ boto.